ယွန်း (NSS) - ဇွန် ၁၁

တနင်္သာရီတိုင်းဒေသကြီးအတွင်း၌ ဆီအုန်း စိုက်ဧက (၄)သိန်းနီးပါး စိုက်ပျိုးထားနိုင်သော်လည်း လျာထားချက်အတိုင်း ပြည့်မီစေရန် စိုက်ပျိုးနိုင်ခြင်းမရှိသေးကြောင်း တနင်္သာရီတိုင်းရှိ ဆီအုန်းစိုက်ပျိုးထုတ်လုပ်သူများထံမှ သိရသည်။

ဆီအုန်းကို မြန်မာနိုင်ငံအနှံ့အပြားတွင် စမ်းသပ်စိုက်ပျိုးခဲ့သော်လည်း အီကွေတာနှင့်နီးစပ်သည့် တနင်္သာရီတိုင်းတွင်သာ ဆီအုန်းစိုက်ပျိုးမှုဖြစ်ထွန်းကာ စီးပွားဖြစ်စိုက်ပျိုးနိုင်ခြင်းဖြစ်ကြောင်း သိရသည်။

“ တနင်္သာရီတိုင်းမှာပဲ အဓိကစိုက်ကြတယ်။ တနင်္သာရီတိုင်းဆိုတာတောင် မြိတ် အောက်ပိုင်း မှာပဲ စီးပွားဖြစ်စိုက်နေကြတာ။ မြန်မာတစ်နိုင်ငံလုံးမှာတော့ စမ်းသပ်ပြီး စိုက်ပျိုးခဲ့ကြပါတယ်။ မြိတ်၊ ငပလီ၊ သံတွဲမှာလည်း စိုက်တယ်။ ဒါပေမဲ့ စီးပွားဖြစ်စိုက်နိုင်တာက မြိတ် အောက်ပိုင်းက အီကွေတာနဲ့ ပိုနီးတော့ စိုက်လို့ပိုကောင်းတယ် ” ဟု တနင်္သာရီတိုင်းတွင် ဆီအုန်းစိုက်ပျိုးရေးလုပ်ကိုင်နေသူတစ်ဦးက NSS ကိုပြောသည်။

နိုင်ငံတော်အနေဖြင့် တနင်္သာရီတိုင်းအတွင်း ဆီအုန်းဧက (၅)သိန်းအထိ စိုက်ပျိုးရန်လျာထား သော်လည်း လက်ရှိအချိန်အထိ ဧက (၄)သိန်း ဝန်းကျင်သာ စိုက်ပျိုးမှုရှိနေကာ ပြည်တွင်းစားသုံးဆီ လိုအပ်ချက်ကို တစ်ဖက်တစ်လမ်းမှ ဖြည့်ဆည်းပေးနေကြောင်း သိရသည်။ “ အရင်က လျာထား တာတော့ ဧက (၅)သိန်းဆိုပြီး လျာထားပေမယ့် (၄)သိန်း ဝန်းကျင်လောက်ပဲ ဖြစ်ထွန်းတယ်။ ကော့သောင်းမြို့နယ်နဲ့ ဘုတ်ပြင်းမြို့နယ်မှာ စိုက်တာများတယ်။ ပြည်တွင်း စားအုန်းဆီလိုအပ်ချက်အရ အားလုံးမဟုတ်ရင်တောင်မှ တစ်ဖက်တစ်လမ်းကတော့ ဖြည့်ဆည်းပေးနေပါတယ်။ လက်ရှိမှာ ဆီအုန်းကထွက်တဲ့ ဆီတွေကို ပြည်တွင်းမှာလည်း စားသုံးမှုရှိနေပါတယ်။ ရန်ကုန်မှာဆိုရင် ဆီသန့် စက်ရုံ ရှိတယ်လေ အဲဒီကထွက်တဲ့ဟာတွေနဲ့ စားသုံးနေကြပါတယ်။ ကျွန်တော်တို့ ဝယ်စားနေရတာက တစ်ပိဿာကို ၄၀ဝ၀ ကျော် ၅၀ဝ၀ နဲ့ဝယ်စားနေရပါတယ်”ဟု ၎င်းကပြောသည်။

တနင်္သာရီတိုင်းဒေသကြီးအတွင်း ဆီအုန်း စိုက်ပျိုးမှုကို ၁၉၉၀ ပြည့်နှစ်ဝန်းကျင်မှစတင်စိုက်ပျိုး ခဲ့ပြီး အများစုမှာ ဆီသီးခိုင်ခူး၍ ကော့သောင်းခရိုင်အတွင်းရှိ ဆီကြမ်းစက်ရုံနှစ်ရုံသို့ တင်ပို့ ရောင်းချနေ ကြောင်း သိရသည်။ လက်ရှိတွင် ဆီသီးခိုင် တစ်တန်လျှင် ငွေကျပ်(၃) သိန်းကျော် ပေါက်ဈေးရှိနေပြီး နှစ်စဉ် တစ်ဧကလျှင် ငွေကျပ် (၁၈)သိန်းနီးပါးအထိ ရရှိကြောင်း သိရသည်။

ဆီအုန်းစိုက်ခင်း တစ်ဧကလျှင် ပျမ်းမျှဆီသီးခိုင် (၃)တန်ခန့်ထွက်ရှိပြီး ဆီကြမ်းအနေဖြင့် (ဝ.၆၆) တန်ထွက်ရှိကြောင်း သိရသည်။ မြန်မာနိုင်ငံ၌ နှစ်စဉ် စားသုံးဆီသုံးစွဲမှု တန်ချိန် ၁၂ သိန်းခန့်ရှိပြီး ပြည်တွင်းထုတ်လုပ်မှုမှာ တန်ချိန်သုံးသိန်းခန့်သာ ရှိသဖြင့် နှစ်စဉ် ပြည်ပမှတန်ချိန် ကိုးသိန်းခန့် တင်သွင်းနေရကြောင်း သိရသည်။