စော (NSS) - ဖေဖော်ဝါရီ ၁၁

ရန်ကုန်တိုင်း၊ မရမ်းကုန်းမြို့နယ်၊ ကမ္ဘာအေးဘုရားလမ်း ၁ဝ၆ မှတ်တိုင်အနီးတွင် EV ကား နှင့် Hijet တို့ တိုက်မိခဲ့ရာ အမျိုးသားနှစ်ဦး ထိခိုက်ဒဏ်ရာရရှိခဲ့ကြောင်း သိရသည်။

ဖြစ်စဉ်မှာ ယမန်နေ့(ဖေဖော်ဝါရီလ ၁ဝ ရက်)၊ ည (၇)နာရီ ၃ဝ မိနစ်ဝန်းကျင်အချိန်တွင် မရမ်းကုန်းမြို့နယ်၊ အမှတ် (၁ဝ)ရပ်ကွက်၊ ကမ္ဘာအေးဘုရားလမ်း နှင့် ကန်ရိပ်သာလမ်းထောင့်၊ ၁ဝ၆ မှတ်တိုင်အနီး၌ အထက်ပါကဲ့သို့ဖြစ်ပွားခဲ့ ခြင်းဖြစ်ကြောင်း ရွှေရုပ်လွှာပရဟိတအသင်းထံမှ သိရသည်။

“EV ကား နဲ့ Hijet ပါ။ ယာဉ်တိုက်မှုစဖြစ်တဲ့ ဖြစ်စဉ်ကိုတော့ မသိဘူး။  accident မှာ ထိခိုက်ဒဏ်ရာရထားတဲ့ လူနာ နှစ်ယောက်ရှိတဲ့အတွက် အဲဒီလူနာနှစ်ယောက်ကို ရန်ကုန်ပြည်သူ့ဆေးရုံကို ပို့ဆောင်ပေးခဲ့ပါတယ်” ဟု ရွှေရုပ်လွှာ ပရဟိတသင်းမှ တာဝန်ရှိသူတစ်ဦးက NP News ကို ပြောသည်။

ယာဉ်တိုက်မှုကြောင့် Hijet ယာဉ်ပေါ်တွင် လိုက်ပါလာသည့် အမျိုးသား (၂)ဦး ထိခိုက်ဒဏ်ရာရရှိခဲ့ပြီး ၎င်းတို့ကို ရန်ကုန်ပြည်သူ့ဆေးရုံသို့ ပို့ဆောင်ပေးခဲ့ကြောင်း သိရသည်။

အလားတူ ပြီးခဲ့သည့် (ဖေဖော်ဝါရီလ ၉ ရက်)၊ ည ၁၂ နာရီဝန်းကျင်အချိန်တွင် ပဲခူးတိုင်း၊ တောင်ငူမြို့နယ်၊ ရန်ကုန်-မန္တလေးအမြန်လမ်းတွင် ကား(၅)စီးဆင့် ယာဉ်တိုက်မှုဖြစ်ပွားခဲ့ရာ လူ (၄)ဦး သေဆုံးခဲ့ကြောင်း သိရသည်။