ပုံစာ - ၂ဝ၁၁ ခုနှစ်က တိုင်းရင်းသားကျေးရွာ၌ ကျင်းပခဲ့သည့် ပျားဖွတ်ပြိုင်ပွဲ

Pearl (NSS) - ဇန်နဝါရီ ၉

ရန်ကုန်တွင် “၅” နှစ်ခန့် မကျင်းပဖြစ်ခဲ့သည့် ကရင်ရိုးရာပျားဖွတ်ပြိုင်ပွဲ ပြန်လည်ပြုလုပ်မည်ဖြစ်ကြောင်း သိရသည်။ 

လာမည့် ဇန်နဝါရီလ (၁၁)ရက် ၊ ကရင်နှစ်သစ်ကူးနေ့တွင် ရန် ကုန်တိုင်း၊ သာကေတမြို့နယ်ရှိ ပြည်ထောင်စုတိုင်းရင်းသားကျွေးရွာတွင် ကရင်ရိုးရာပျားဖွတ်ပြိုင်ပွဲကို အခြားသော ကရင်ရိုးရာ နှစ်သစ်ကူးအစီအစဉ်များနှင့်အတူ ကျင်းပပြုလုပ်မည်ဖြစ် ကြောင်း သိရသည်။ 

ကရင်ရိုးရာပျားဖွတ်ပြိုင်ပွဲနှင့်ပတ်သက်၍ ကရင်စာပေနှင့် ယဉ်ကျေးမှုအသင်း ဥက္ကဋ္ဌ မန်းသန်းဝင်းဦးက “သူကတော့ ၈ ပေ ဝါးလုံးပါတာပေါ့နော်။ ၈ ပေ ဝါးလုံးကို နှစ်ယောက်ထမ်းထားမှာပေါ့။ နောက်တစ်ယောက်ကတော့ ထမ်းထားတဲ့ တစ်ယောက်ကိုကျော် ၊ ကျော်ပြီး ဝါးလုံးကို တွားသွား၊ တွားသွားပြီး ဝါးလုံးတစ်ဖက်က တစ်ယောက်ရဲ့ ပေါင်းကြားထဲကနေပြန်ဝင် ၊ ဝင်ပြီးတော့မှ ဝါးလုံးပေါ် ပြန်တတ်၊ ပြန်တတ်ပြီး တွားသွား၊ ဟိုဘက်တစ်ယောက်ရဲ့ ပေါင်ကြားထဲက ပြန်ဝင်။ အဲဒီလိုပေါ့။ ဟိုဘက်ပြန်ရောက်ရင် တစ်ပတ်ပေါ့။  နောက်တစ်ခုကလည်း အဲဒီလိုမျိုးပတ်ရင်းနဲ့မှ မြေကြီးနဲ့ ထိသွားမယ်ဆိုရင်တော့ ပြီးသွားပြီပေါ့။ ၅မိနစ်အတွင်း အပတ်ရေ အများဆုံးရတဲ့ လူက ပထမရမှာပေါ့နော်။ ၅ မိနစ်အတွင်းမှာ ရတဲ့ပေါ်ကို မူ တည်ပြီး ဆုပေးမှာဖြစ်ပါတယ်”ဟု  NP News ကို ပြောသည်။ 

ပြိုင်ပွဲတွင် (၅)မိနစ်အတွင်းရရှိသည့် အကြိမ်အရေအတွက် ပေါ်မူတည်၍ ပထမဆု - (၂)သိန်းကျပ်၊ ဒုတိယဆု (၁)သိန်းခွဲကျပ်၊ တတိယဆု (၁)သိန်းကျပ် နှင့် အထူးဆု (၅)သောင်းကျပ်စသည်ဖြင့် ဆုချီးမြှင့်မည်ဖြစ်ကြောင်းလည်း သိရသည်။ 

“ဒီဟာကလည်း ကျွန်တော်တို့ရဲ့ ရိုးရာအားကစားဖြစ်တာ ဟိုးရှေး ဘိုးဘွားတွေကတည်းက ဒီတောတောင်တွေထဲမှာ နေရင်းနဲ့ ဒီပျားစွဲထားတဲ့ အပင်ကိုကြည့်ပြီးတဲ့ အခါမှ သူတို့ ပျားဖွတ်တဲ့ဟာ ဖြစ်တည်လာတဲ့ အားကစား ဖြစ်ပါတယ်။ ဒီအားကစားကို ကြည့်မယ်ဆိုရင် Team Work ပေါ့နော်။ အဖွဲ့လိုက် ဆောင်ရွက်တတ်ဖို့လိုတယ်။ တစ်ယောက်နဲ့ တစ်ယောက်နားလည်မှုရှိဖို့လိုတယ်။ ပြီးတော့ အဲဒီမှာ Team mate ပေါ့ ။ အဲဒီမှာ ဆော့နေတဲ့ တစ်ယောက်က ဝါးလုံးကို နည်းနည်းလေး ကစားပေးရတယ်။အနိမ့်အမြင့်ပေါ့နော် ။ နောက် သက်လုံကောင်း ဖို့လိုတာပေါ့။  နောက် Training  လိုတယ်။ ဒီအတိုင်းကြီး သွားပြီး လုပ်လို့ မရဘူး။ သွားလုပ်လို့တော့ ရတယ် အပတ်ရေ နည်းမှာပေါ့နော်” ဟု ၎င်းက ဆက်လက်ပြောသည်။ 

ပြီးခဲ့သည့် ၂၀၂၀ ခုနှစ်ခန့်မှစ၍ အခြေအနေအမျိုးမျိုးကြောင့် ကရင်ရိုးရာပျားဖွတ်ပြိုင်ပွဲကို ရပ်နားထားခဲ့ရာမှ ယခုနှစ်ကျင်းပသည့် ကရင်နှစ်သစ်ကူးပွဲ၌ ပြန်လည်ထည့်သွင်းဆောင်ရွက်ခြင်းဖြစ်ပြီး အာဆီယံအဆင့် အားကစားဖြစ်ရန် ရည်ရွယ်ကာ ဆောင် ရွက်ခြင်းဖြစ်ကြောင်းလည်း သိရသည်။