မြူနစ်/ယွန်း (NSS) - ဒီဇင်ဘာ ၂၅

ရခိုင်ပြည်နယ်၊ မြောက်ဦးမြို့၌ တိုက်ပွဲများ ဆက်လက်ပြင်းထန်းလျက်ရှိပြီး လက်နက်ကြီးကျရောက်ပေါက်ကွဲမှုကြောင့် ယဉ်ကျေးမှုပြတိုက်ရှိ ရှေးဟောင်းအမွေအနှစ် အာနန္ဒစန္ဒြကျောက်စာ ပျက်စီးဆုံးရှုံးခဲ့ကြောင်း သိရသည်။

မြောက်ဦးမြို့နှင့်အနီးတစ်ဝိုက်ရှိ လုံခြုံရေးစခန်းများကို ပြီးခဲ့သော ရက်ပိုင်းအတွင်းမှစတင်ကာ ရခိုင်လက်နက်ကိုင်အဖွဲ့ ULA/AA သည် လာရောက်တိုက်ခိုက်ခဲ့ပြီး လက်ရှိအချိန်ထိ နှစ်ဖက်အကြား တိုက်ပွဲများ ပြင်းထန်နေဆဲ ဖြစ်သည်။

ယမန်နေ့(ဒီဇင်ဘာလ ၂၄ ရက်) နံနက်အစောပိုင်းတွင်လည်း မြောက်ဦးခရိုင်ရဲတပ်ဖွဲ့ရုံးကို AA အဖွဲ့က ပစ်ခတ်တိုက်ခိုက်မှုများ ပြုလုပ်ခဲ့ကြောင်း သိရသည်။

“မြောက်ဦးမှာတော့ တိုက်ပွဲက ဆက်ဖြစ်တုန်းပဲ။ မနေ့ကလည်း ဖြစ်တာပဲ။ သူတို့ဘက်က ဆုတ်ခွာသွားတာ မရှိသေးဘူး။ Drop ဗုံးနဲ့ လာချတာတွေလည်း ရှိတယ်။ ညတုန်းက ၁၂ နာရီလောက်မှာ တော်တော်လေးပြင်း ပြင်းထန်ထန်ဖြစ်တယ်။ အခုလည်း ဆက်ဖြစ်နေတုန်းပါပဲ” ဟု မြောက်ဦးမြို့လုံခြုံရေးအဖွဲ့နှင့်နီးစပ်သူက NSS ကို ပြောသည်။

ထို့ပြင် ယနေ့ နံနက်ပိုင်းတွင်လည်း မြောက်ဦးမြို့၌ တပ်မတော်လုံခြုံရေးအဖွဲ့နှင့် AA လက်နက်ကိုင်အဖွဲ့ကြား ဖြစ်ပွားသည့် တိုက်ပွဲကြောင့် ‌ရှေး ဟောင်းအမွေအနှစ်များထားရှိရာ မြောက်ဦးယဉ်ကျေးမှုပြတိုက်တွင် ထိခိုက်ပျက်စီးမှုများ ရှိခဲ့ကြောင်း သိရသည်။

“မြောက်ဦးမှာရှိတဲ့‌ ရှေးဟောင်းယဉ်ကျေးမှုအမွေအနှစ်တွေအားလုံးကို ကျွန်တော်တို့ကတော့ ဝိုင်းပြီးထိန်းသိမ်းနေကြပါတယ်။ ဖြစ်တာကတော့ တိုက်ပွဲဖြစ်ပြီး လက်နက်ကြီးကျည်ဆံကျရောက်ပေါက်ကွဲတယ်။ ဒီနေ့မနက်(၅)နာရီမှာ လက်နက် ကြီးကျည်ဆံကျရောက်ပေါက်ကွဲတယ်လို့သိရတယ်။ ကျွန်တော်တို့က အရင်ထဲက ပြတိုက်ထဲမှာရှိတဲ့‌ ရွှေ့ပြောင်းလို့ရတဲ့ ပစ္စည်းတွေကို ကြိုတင်သိမ်းဆည်းထားတယ်။ အခုပေါက်ကွဲတာကကြတော့ ဘယ်သူက ပစ်မှန်းလဲမသိဘူး။ ဝန်ထမ်းတွေ စစ်ဆေးတဲ့အခါမှာတော့ ပုံစံတူပြန်ပြီးတော့လုပ်ထားတဲ့ အာနန္ဒစန္ဒြကျောက်စာတော့ ပျက်စီးသွားပါတယ်”ဟု ရှေးဟောင်း သုတေသနနှင့် အမျိုးသားပြတိုက်ဦးစီးဌာနမှ ဒုညွှန်မှူးဦးညိုမြင့်ထွန်းက NSS ကို ပြောသည်။

ယင်းကဲ့သို့ လက်နက်ကြီးကျည် ကျရောက်ပေါက်ကွဲမှုဖြစ်စဉ်အတွင်း အာနန္ဒစန္ဒြကျောက်စာနှင့်အတူ ပြတိုက်အဆောက်အဦး ထိခိုက်ပျက်စီးမှုရှိခဲ့သော်လည်း အခြားသောအမွေအနှစ်များမှာ ပျက်စီးမှုမရှိခဲ့ကြောင်း သိရသည်။

“ယဉ်ကျေးမှုအမွေအနှစ်ဆိုတာတော့ အားလုံးကတန်ဖိုးထားကြတာလေ။ အားလုံးလည်း ထိန်းသိမ်းစောင့်ရှောက်နေကြပါတယ်။ ဒီလိုဖြစ်သွားတဲ့အပေါ်မှာ ဘယ်သူကမှတော့ ဖြစ်ချင်ကြမှာမဟုတ်ဘူး။ မဖြစ်ချင်တဲ့ကြားထဲကနေဖြစ်သွားတယ်။ ပြီးတော့ ရှေးဟောင်းအမွေအနှစ်လည်းဖြစ်တော့ စိတ်မကောင်းပါဘူး”ဟု ဦးညိုမြင့်ထွန်းက ဆက်လက်ပြောသည်။

လက်ရှိတွင် မြောက်ဦးမြို့၌ ဖြစ်ပွားနေသည့် တိုက်ပွဲများကြောင့် အရပ်သားသေဆုံးသူဦးရေသည် (၅)ဦးထက်မနည်းရှိနေပြီး ထိခိုက်ဒဏ်ရာရရှိသူ အများအပြားရှိနေကြောင်း သိရသည်။

“တစ်မြို့လုံးမှာ လက်နက်ကြီးတွေ ကျတယ်။ ပြတိုက်တွေမှာရော၊ လူနေအိမ်တွေမှာရောကျလို့ အကုန်လုံး ထွက်ပြေးနေရတယ်။ မြို့ပေါ်မှာ လူတွေ မရှိတော့ဘူး။ အကုန်လုံး ထွက်ပြေးနေရတယ်။ ကျွန်တော်ဆိုရင် မနေ့က ထွက်ပြေးလာရတာ။ လက်နက်ကြီးတွေက တစ်မြို့လုံးမှာလိုလို ကျနေတာ” ဟု စစ်ဘေးရှောင် မြောက်ဦးမြို့ခံ ဦးအောင်သန်းထွန်းက NSS ကို ပြောသည်။

ရခိုင်ပြည်နယ်၌ ပြီးခဲ့သော နိုဝင်ဘာလ ၁၃ ရက်မှစတင်ကာ တပ်မတော်နှင့် ရခိုင်လက်နက်ကိုင်အဖွဲ့ AA တို့ကြား တစ်ကျော့ပြန်တိုက်ပွဲများ ပြန်လည်ဖြစ်ပွားလာခဲ့ခြင်းဖြစ်သည်။