တရုတ်မိုးပျံပူဖောင်းများကို ခြိမ်းခြောက်မှုအဆင့်အပေါ်မူတည်ပြီး ကိုင်တွယ်ဖြေရှင်းသွားမည်ဖြစ်ကြောင်း ထိုင်ဝမ်စစ်ဘက်ပြော
Pika (NSS) - ဒီဇင်ဘာ ၂၁
ထိုင်ဝမ်ကျွန်းအနီးတွင် ပျံသန်းနေသော တရုတ်မိုးပျံပူဖောင်းများကို ခြိမ်းခြောက်မှု အကဲဖြတ်မှုအဆင့်အပေါ်မူတည်ပြီး ကိုင်တွယ်ဖြေရှင်းသွားမည်ဖြစ်ကြောင်း ထိုင်ဝမ်ကာကွယ်ရေးဝန်ကြီးဌာနက ဒီဇင်ဘာလ(၂ဝ)ရက်တွင် ထုတ်ဖော်ပြောခဲ့သည်။
ပြီးခဲ့သည့်ဖေဖော်ဝါရီလက အမေရိကန်လေပိုင်နက်သို့ ဖြတ်ကျော်ပျံသန်းခဲ့သော တရုတ်၏မိုးပျံပူဖောင်းတစ်လုံးကို အမေရိကန်ပစ်ချခဲ့ပြီးနောက် တရုတ်နိုင်ငံသည် သူလျှိုလုပ်ရန်အတွက် မိုးပျံပူဖောင်းများကို အသုံးပြုနိုင်သည်ဆိုသည့်ကိစ္စများမှာ ကမ္ဘာလုံးဆိုင်ရာပြဿနာတစ်ခုဖြစ်လာခဲ့ကြောင်း သိရသည်။
သို့သော်လည်း အမေရိကန်အစိုးရက ပစ်ချခဲ့သော မိုးပျံပူဖောင်းမှာ အရပ်ဘက်သုံးမိုးပျံပူဖောင်းတစ်လုံးသာဖြစ်ကြောင်း တရုတ်အစိုးရက ပြောခဲ့သည်။ ထိုင်ဝမ်ကျွန်းသည် လာမည့်ဇန်နဝါရီလ(၁၃)ရက်တွင် ကျင်းပမည့် သမ္မတ နှင့် လွှတ်တော်ရွေးကောက်ပွဲများမတိုင်မီ တရုတ်၏ စစ်ရေးနှင့် နိုင်ငံရေးအရ ဖိအားပေးမှုများကို ရင်ဆိုင်နေရ ကြောင်းလည်း သိရသည်။
တရုတ်အစိုးရသည် ၎င်းတို့အားနှစ်သက်သည့် ကိုယ်စားလှယ်လောင်းများကို ရွေးချယ်ရန်အတွက် မဲဆန္ဒရှင်များကို ဝင်ရောက်စွက်ဖက်ရန် ကြိုးပမ်းနိုင်ကြောင်း ထိုင်ဝမ်အစိုးရက သတိပေးပြောဆိုခဲ့သည်။ ထို့အပြင် ယခုလအတွင်း ထိုင်ဝမ်ရေလက်ကြားအလယ်မျဉ်းကို တရုတ်မိုးပျံပူဖောင်းများ ဖြတ်ကျော်ဝင်ရောက်လာသည့် ဖြစ်ရပ်လေးခုကို ထိုင်ဝမ်ကာကွယ်ရေးဝန်ကြီးဌာနက အစီရင်ခံခဲ့ကြောင်းလည်း သိရသည်။
တရုတ်မိုးပျံပူဖောင်းများသည် ထိုင်ဝမ်ရေလက်ကြားအလယ်မျဉ်းကို ဖြတ်ကျော်ဝင်ရောက်လာပြီးနောက် ကျွန်း၏ မြောက်ဘက်ရေပိုင်နက်သို့ ဦးတည်သွားပြီးနောက် ပျောက်ကွယ်သွားခဲ့ကြောင်း ထိုင်ဝမ်ကာကွယ်ရေးဝန်ကြီးဌာန က ပြောခဲ့သည်။
ထိုင်ဝမ်ကာကွယ်ရေးဝန်ကြီးဌာန ပြောရေးဆိုခွင့်ရှိသူ ဆန်းလီဖန်းက "လေပြင်းတိုက်ခတ်မှုတွေကြောင့် ပြီးခဲ့တဲ့ အောက်တိုဘာလကနေ လာမယ့်နှစ် မတ်လအထိ တရုတ်မိုးပျံပူဖောင်းတွေကို ပိုမိုတွေ့ရှိရနိုင်ပါတယ်။ ကျွန်တော်တို့တွေ့ခဲ့ရတာတွေ အများစုက မိုးလေဝသဆိုင်ရာမိုးပျံပူဖောင်းတွေပါ။ ဒီမိုးပျံပူဖောင်းတွေဟာ တရုတ် နိုင်ငံက လာတာဖြစ်ပေမယ့် တရုတ်စစ်တပ်ရဲ့မိုးပျံပူဖောင်းတွေ မဟုတ်ပါဘူး" ဟု ပြောခဲ့သည်၊၊
ထိုင်ဝမ်ကာကွယ်ရေးဝန်ကြီးဌာနသည် တရုတ်မိုးပျံပူဖောင်းများကို ခြိမ်းခြောက်မှု အကဲဖြတ်မှုအဆင့်အပေါ်မူတည်ပြီး ကိုင်တွယ်ဖြေရှင်းသွားမည်ဖြစ်သော်လည်း အတိအကျလုပ်ဆောင်မည့်အကြောင်းအရင်များကို လျှို့ဝှက်ထားမည်ဖြစ်ကြောင်း ဆန်းလီဖန်းက ပြောကြားခဲ့သည်။
အဆိုပါမိုးပျံပူဖောင်းများနှင့်ပတ်သက်ပြီး မှတ်ချက်ပေးဖို့ တောင်းဆိုမှုများကို တရုတ်ကာကွယ်ရေးဝန်ကြီးဌာနက ပြန်လည်တုံ့ပြန်ဖြေကြားခြင်းမျိုးမရှိသေးကြောင်း သိရသည်။
Comments :
0 comments
မကွေးတိုင်းဒေသကြီး၊ စလင်းမြို့နယ်၊ အုတ်ဖိုကန်ကျေးရွာ၊ မင်းဘူး- စလင်းကားလမ်းပေါ်တွင် သစ်ပင်လဲကျမှုဖြစ်ပွား
ဂျပန်နိုင်ငံရောက် မြန်မာနိုင်ငံသားများပေးဆောင်ရမည့်ဝင်ငွေခွန်အပေါ် သက်သာခွင့်ပေးမည်ဟု မြန်မာသံရုံးအသိပေး
RELATED POSTS
02 Oct 2024 | နိုင်ငံရေး,နိုင်ငံတကာ
02 Oct 2024 | နိုင်ငံရေး,ပြည်တွင်း
01 Oct 2024 | နိုင်ငံရေး,နိုင်ငံတကာ
01 Oct 2024 | နိုင်ငံရေး,နိုင်ငံတကာ