Pika (NSS) - အောက်တိုဘာ ၂

 ရုရှားနိုင်ငံဟာ ၎င်းရဲ့အရေးပေါ်အများပြည်သူသတိပေးစနစ်တွေ စမ်းသပ်မှုကို အောက်တိုဘာလ(၂)ရက်နေ့မှာ လုပ်ဆောင်ခဲ့တယ်လို့သိရပါတယ်။ရုရှားနဲ့ယူကရိန်းကြား စစ်ပွဲဖြစ်ပွားမှုမြင့်တက်နေတဲ့အချိန်မှာ ရုရှားက ဒီလိုစမ်းသပ်မှုတွေကို လုပ်ဆောင်ခဲ့တာလည်းဖြစ်ပါတယ်။

အောက်တိုဘာလ(၂)ရက်နေ့ နံနက်(၁၀)နာရီခွဲအချိန်လောက်မှာ ဥဩသံ တွေက အချိန်(၁)မိနစ်လောက်ကြာအောင် အသံမြည်ခဲ့ပြီး အသံချဲ့စက်တွေက "အားလုံးသတိထားကြပါ"ဆိုတဲ့ အသံကို ထုတ်လွှင့်ခဲ့ကြောင်းသိရသည်။အဲဒီစမ်းသပ်လေ့ကျင့်မှုဟာ သတိပေးစနစ်တွေကို စစ်ဆေးဖို့၊သတိပေးစနစ်တွေကိုစတင်ဖို့ တာဝန်ရှိသူတွေရဲ့ အဆင်သင့်ဖြစ်မှုကို စမ်းသပ်ဖို့နဲ့ အများပြည်သူတွေရဲ့သတိထားမှုတွေကို မြှင့်တင်ပေးနိုင်ဖို့ဖြစ်တယ်လို့ ရုရှားအရေးပေါ်ဝန်ကြီးဌာနကပြောကြားခဲ့ပါတယ်။ ဒါ့ပြင် အရာအားလုံးက စီစဉ်ထားတဲ့အတိုင်းဖြစ်ခဲ့တယ်လို့လည်း အရေးပေါ်ဝန်ကြီးဌာနကပြောကြားခဲ့ပါတယ်။ ရုရှားအစိုးရဟာ ၂၀၂၀ ခုနှစ်မှာ အရေးပေါ်အများပြည်သူစနစ်တွေ စမ်းသပ်မှုကို စတင်လုပ်ဆောင်ခဲ့တာဖြစ်ပြီး လေ့ကျင့်မှုအကြိမ်ရေဟာ ပြီးခဲ့တဲ့နှစ်ကနေစတင်ပြီး နှစ်ဆတိုးလာခဲ့တယ်လို့လည်း သိရပါတယ်။

ရုရှား-ယူကရိန်းစစ်ပွဲဖြစ်ပွားနေတာဟာ အချိန်(၂)နှစ်ကျော်ထိ ကြာမြင့်နေပြီဖြစ်ပေမယ့်လည်း ယခုအချိန်အထိ နှစ်ဘက်စလုံးက ငြိမ်းချမ်းရေးအတွက် သဘောတူညီချက်ရယူနိုင်တာမျိုးမရှိသေးဘူးလို့လည်း သိရပါတယ်။ ဒါ့ပြင် ပြီးခဲ့တဲ့ရက်ပိုင်းက လုပ်ဆောင်ခဲ့တဲ့ နျူကလီးယား လက်နက်မူဝါဒဆိုင်ရာပြောင်းလဲမှုဟာ ရုရှားကိုတိုက်ခိုက်မှုတွေပါဝင်ခဲ့မယ်ဆိုရင် နောက်ဆက်တွဲအကျိုးဆက်တွေရှိလာမယ်ဆိုတဲ့အချက်ကို အနောက်အုပ်စုနိုင်ငံတွေအား သတိပေးတဲ့အနေနဲ့ အချက်ပြတာမျိုးဖြစ်တယ်လို့ ရုရှားအစိုးရက ထုတ်ဖော်ပြောဆိုခဲ့ဖူးပါတယ်။ ရုရှားကို ပုံမှန်အသုံးပြုနေကျ ဒုံးကျည်တွေနဲ့တိုက်ခိုက်ခဲ့မယ်ဆိုရင်တောင် နျူကလီးယားလက်နက်တွေကို ရုရှားက အသုံးပြုနိုင်တယ်လို့ သမ္မတပူတင်က ပြီးခဲ့တဲ့ရက်ပိုင်းမှာ ထုတ်ပြန်ပြောဆိုခဲ့ပါတယ်။ ပြီးတော့ ရုရှားအပေါ်တိုက်ခိုက်မှုမှန်သမျှကို နျူကလီးယားလက်နက် အသုံးပြုထားတဲ့ ပူးတွဲတိုက်ခိုက်မှုအဖြစ် ထည့်သွင်းစဉ်းစား သွားမှာဖြစ်တယ်လို့လည်း ပူတင်က ပြောကြားခဲ့ပါတယ်။