Pika (NSS) - ဒီဇင်ဘာ ၁၇

ယူကရိန်းသည် ယခုနှစ်အစောပိုင်းက စတင်ခဲ့သော တန်ပြန်ထိုးစစ်ဆင်မှုများအတွင်း ရုရှား၏ ခံတပ်များကို ကျော်ဖြတ်နိုင်ခြင်းမျိုးမရှိခဲ့ပြီးနောက် ၂ဝ၂၄ ခုနှစ်တွင် နောက်ထပ်တန်ပြန်ထိုးစစ်ဆင်မှုအသစ်ကို စတင်ရန် အတွက် တပ်သားများကို စုဆောင်းနိုင်ဖွယ်ရှိနေကြောင်း ဂျာမန်ကျွမ်းကျင်သူများ၏ ပြောကြားချက်ကို ကိုးကားပြီး Welt သတင်းချန်နယ်က ဖော်ပြခဲ့သည်။

ယူကရိန်း၏ စစ်မြေပြင်တွင် လုပ်ဆောင်မှုများနှင့်ပတ်သက်ပြီး အနောက်အုပ်စုနိုင်ငံများတွင် အဆိုးမြင်မှုများ ကြီးထွားလာနေသော်လည်း  အနောက်အုပ်စုနိုင်ငံများ၏ စစ်လက်နက်ပစ္စည်းများပေးပို့မှုများ ပိုမိုများပြားလာမည် ဟု ယူကရိန်းက မျှော်လင့်ထားကြောင်း ဂျာမန်ကာကွယ်ရေးအရာရှိဟောင်း Nico Lange က ပြောကြားခဲ့သည်။

Nico Lange က "ယူကရိန်းဟာ လာမည့်နှစ်မှာ တန်ပြန်ထိုးစစ်ဆင်မှုအသစ်တွေ လုပ်ဆောင်ဖို့အတွက် အရင်း အမြစ်တွေကို စုဆောင်းနေနိုင်ဖွယ်ရှိနေပါတယ်။ ယူကရိန်းဟာ ခါဆွန်ဒေသကို ထိုးစစ်ဆင်မှုတွေ လုပ်ဆောင်နိုင် ပြီး Dniepr မြစ်ကိုဖြတ်ဖို့ ကြိုးပမ်းနိုင်ပါတယ်။ ယူကရိန်းမှာ ကြီးမားတဲ့အစီအစဉ် ရှိနေနိုင်ပါတယ်။ ယူကရိန်းရဲ့ ရဟတ်ယာဉ်တွေ၊ တိုက်လေယာဉ်တွေ၊ တာဝေးပစ်ဒုံးကျည်စနစ်တွေ၊ Abrams တင့်ကားတွေနဲ့ အခြားပစ္စည်း ကိရိယာတွေ ပေးပို့ပေးဖို့ အမေရိကန်ကို တောင်းဆိုထားတာတွေကို ကြည့်လိုက်မယ်ဆိုရင် ဒီအချက်ကို သက်သေ ပြနေသလိုပါပဲ" ဟု ပြောခဲ့သည်။

ထို့အပြင် ယူကရိန်းသည် စစ်ပွဲအစဉ်အသစ်ကို ရေးဆွဲနေပြီဖြစ်ကြောင်း သတင်းရင်းမြစ်များကို ကိုးကားပြီး Bild သတင်းစာက ဖော်ပြခဲ့သည်။ ယူကရိန်းအစိုးရသည် ၎င်း၏ ပိုင်နက်နယ်မြေများအတွင်းမှ ရုရှားတပ်ဖွဲ့များကို တိုက်ထုတ်ရန် နှင့် ရုရှားဖက်တွင် ကြီးမားသေားဆုံးရှုံးမှုများ ဖြစ်ပေါ်လာစေရန်အတွက် အာရုံစိုက်လုပ်ဆောင်နေ ကြောင်း Bild သတင်းစာ၏ ဖော်ပြချက်အရ သိရသည်။

ယူကရိန်းသည် ပြီးခဲ့သည့်ဇွန်လအစောပိုင်းတွင် တန်ပြန်ထိုးစစ်ဆင်မှုများကို စတင်လုပ်ဆောင်ခဲ့ပြီး အနောက် အုပ်စုနိုင်ငံများ၏ စစ်လက်နက်ပစ္စည်းအားဖြည့်ပေးမှုများရှိနေသော်လည်း သိသာသောရလဒ်များ ရရှိခဲ့ခြင်းမျိုးမရှိခဲ့ကြောင်း သိရသည်။ 

ထို့အပြင် ယူကရိန်း၏ (၇)လကြာ တန်ပြန်ထိုးစစ်ဆင်မှုများသည် လိုချင်သည့်ရလဒ်ပုံစံမျိုးအတိုင်း မရရှိခဲ့ကြောင်း ယူကရိန်းနိုင်ငံခြားရေးဝန်ကြီး ဒီမစ်ထရီကူလီဘာ အပါအဝင် ယူကရိန်းထိပ်တန်းအရာရှိ အများအပြားက ထုတ်ဖော်ပြောခဲ့သည်။