သန့်ဇင် (NSS) - ဒီဇင်ဘာ ၁၃

မူးယစ်မှောင်ခိုဂိုဏ်းကို ကျပ် ၁ဝ ဘီလျံကျော်တန်ဖိုးရှိ မူးယစ်ဆေးဝါးများနှင့်အတူ ဖမ်းဆီးရမိခဲ့ပြီး ၎င်းဂိုဏ်း၏ ပိုင်ဆိုင်မှုများကို ငွေကြေးခဝါချမှုဖြင့် သိမ်းဆည်းရန် မူးဆေးဝါးတားဆီးနှိမ်နင်းရေးရဲတပ်ဖွဲ့က ပြင်ဆင်နေကြောင်း သိရသည်။

ပြီးခဲ့သော ဒီဇင်ဘာ ၁ ရက်၊ ည ၇ နာရီအချိန်တွင် နေပြည်တော်နယ်မြေ၊ လယ်ဝေးမြို့နယ်၊ တောင်စဉ်အေး ကျေးရွာအနီး၌ တင်ဇော် ဆိုသူမောင်းနှင်၍ ကျော်စန်းဌေး လိုက်လာသည့် CHENGLONG ကားပေါ်မှ ဘိလပ်မြေ အိတ်များဖြင့် အုပ်၍သယ်ဆောင်လာသော စိတ်ကြွရူးသွပ်ဆေးပြား ၄၂ သိန်းကို စတင်ဖမ်းဆီးရမိခဲ့ကြောင်း ရဲတပ်ဖွဲ့က ထုတ်ပြန်ထားသည်။

ထို့နောက် ၎င်းတို့(၂)ဦးအား စစ်ဆေးချက်အရ ည ၁၁ နာရီအချိန်တွင် စိတ်ကြွရူးသွပ်ဆေးပြားများ သယ်ဆောင်ခိုင်း သူ ထန်ခိုဆေး ဆိုသူအား မန္တလေးတိုင်း၊ ချမ်းအေးသာစံ မြို့နယ်၊ ၂၇ x ၂၈ကြား၊ ၆၃(C)လမ်းရှိ Hotel တွင် ဆက်လက်ဖမ်းဆီးရမိခဲ့ကြောင်း သိရသည်။

ဆက်လက်၍ ရန်ကုန်တိုင်း၊ မှော်ဘီမြို့နယ်၊ တပ်ကြီးကုန်းကျေးရွာရှိ ထန်ခိုဆေး၏ နေအိမ်မှ မူးယစ်ဆေးဝါးများ သယ်ဆောင်ရာတွင် အသုံးပြုသည် TOYOTA LANDCRUISER ကားတစ်စီးနှင့်အတူ မူးယစ်ဆေးဝါးများရောင်းရ ငွေကျပ် ၁၂ဝ၂ သိန်း ထပ်မံ သိမ်းဆည်းရမိခဲ့ကြောင်း သိရသည်။

ထို့ပြင် ကွင်းဆက်ဖော်ထုတ်ချက်အရ ဒီဇင်ဘာ ၂ ရက်၊ နံနက် ၄ နာရီအချိန်တွင် ချမ်းအေးသာစံမြို့နယ်၊ အောင်နန်း (အရှေ့)ရပ်ကွက်၌ ဝင်းအောင်အား PRADO ကားတစ်စီးနှင့်အတူ စိတ်ကြွရူးသွပ်ဆေးပြား ၁၈ သိန်း ထပ်မံဖမ်းဆီး ရမိခဲ့ကြောင်း မူးယစ်ဆေးဝါးတားဆီးနှိမ်နင်းရေးတပ်ဖွဲ့က ထုတ်ပြန်ထားသည်။

ဆက်လက်ပြီး မူးယစ်ဆေးဝါးများ သယ်ဆောင်ရောင်းဝယ်သည့် ငွေကြေးစီးဆင်းမှုများကို စိစစ်ဖော်ထုတ်ခဲ့ရာတွင် ဒီဇင်ဘာ ၅ ရက်၊ နံနက် ၁ဝ နာရီအချိန်၌ မန္တလေးတိုင်း၊ ပုသိမ်ကြီးမြို့နယ်၊ အိုင်ကြီးကျေးရွာနေ သန်းသန်းထွန်း (ခ) အိုက်စိုင်းအား SUPER CUSTOM ကားတစ်စီးနှင့်အတူ စိတ်ကြွရူးသွပ်ဆေးပြား ၁ ဒသမ ၇၆ သိန်း နှင့် ဘိန်းဖြူ ၈ ဒသမ ၈ ကီလို ဖမ်းဆီးရမိခဲ့ကြောင်း သိရသည်။

ထို့နောက် ဒီဇင်ဘာ ၉ ရက်၊ ညနေ  ၃နာရီ ၃ဝ မိနစ်အချိန်တွင် စစ်ကိုင်းတိုင်း၊ ကလေးမြို့၊ တာဟန်းရပ်ကွက်ရှီ မလားဆန်းခူးမီး အား ထိန်းချုပ်ဓာတုပစ္စည်း ကဖင်း ၃ ဒသမ ၂ တန်နှင့်အတူ ထပ်မံဖမ်းဆီးရမိခဲ့ကြောင်း မူးယစ် ဆေးဝါးတားဆီးနှိမ်နင်းရေးတပ်ဖွဲ့က သတင်းထုတ်ပြန်ထားသည်။

၎င်းအား စစ်ဆေးဖော်ထုတ်ချက်အရ သိမ်းဆည်းရမိခဲ့သည့် မူးယစ်ဆေးဝါးများကို မူးယစ်မှောင်ခိုဂိုဏ်းဖွဲ့၍ ရှမ်းပြည်နယ်မှ မန္တလေးနှင့် ရန်ကုန်တိုင်း၊ စစ်ကိုင်းတိုင်းသို့ သယ်ဆောင် ရောင်းဝယ်ခြင်းဖြစ်ကြောင်း သိရသည်။

ထို့ပြင် စိတ်ကြွရူးသွပ်ဆေးပြားများထုတ်လုပ်ရာတွင် အသုံးပြုသည့် ထိန်းချုပ်ဓာတုပစ္စည်း ကဖင်းများကို ကလေး မြို့မှ ရှမ်းပြည်နယ်သို့ သယ်ဆောင်ရောင်းဝယ်ခြင်းများပြုလုပ်မည်ဖြစ်ကြောင်းလည်း စစ်ဆေးချက်များအရ သိရသည်။

ထို့ကြောင့် အဆိုဖြစ်စဉ်အတွင်းမှ ငွေကျပ် ၁ဝ ဒသမ ၄၄ ဘီလျံကျော်တန်ဖိုးရှိ မူးယစ်ဆေးဝါးများ နှင့် ဆက်စပ်သူ (၆)ဦးကို ဖမ်းဆီးရမိခဲ့ခြင်းဖြစ်ကြောင်း သိရသည်။

“နောက်ထပ် ကွင်းဆက်တွေလဲရှိသေးတယ်။ အခုလိုဖမ်းမိတာလောက်နဲ့ မရပ်တန့်ပဲနဲ့ ကွင်းဆက်တွေကို ဆက်ဖမ်းဖို့ ရှိသေးတယ်။ အခုဖမ်းမိတာကလည်း မြန်မာတစ်နိုင်ငံလုံးမှာရှိတဲ့ ရဲတပ်ဖွဲ့တွေဆီ ဖြန့်ကျက်ပြီးတော့မှ ချက်ချင်းစစ်ဆေးချက်တွေကို ဆက်တိုက်လုပ်တဲ့အတွက် အခုလိုကွင်းဆက်တွေရတာ။ အခုဖမ်းမိတဲ့လူထဲက အဓိကကျတဲ့တစ်ယောက်က ရန်ကုန်မှာ နေတာဆိုတော့ သူအိမ်သွားပြီး ထောက်လှမ်းတဲ့အခါမှာ အခုလိုဖမ်းမိတာ ပါ” ဟု မူးယစ်ရဲတပ်ဖွဲ့မှ အရာရှိကြီးတစ်ဦးက ပြောသည်။

ထို့ကြောင့် ၎င်းမူးယစ်မှောင်ခိုဂိုဏ်အား မူးယစ်ဆေးဝါးနှင့်စိတ်ကိုပြောင်းလဲစေသောဆေးဝါးများဆိုင်ရာဥပဒေအရ အရေးယူထားပြီး ကွင်းဆက်ကျူးလွန်သူများ နှင့် မူးယစ်ဆေးဝါးသယ်ဆောင်ရောင်းဝယ်ရာမှ ရရှိသည့် ငွေကြေး အကျိုးအမြတ်များ၊ ပိုင်ဆိုင်မှုများကို ပြည်သူ့ဘဏ္ဍာအဖြစ် သိမ်းဆည်းအရေးယူသွားမည်ဖြစ်ကြောင်း သိရသည်။

“အခုဖြစ်စဉ်မှာ မူးယစ်ဆေးဝါးသယ်ဆောင်တာတို့၊ ရောင်းချတာတို့အသုံးပြုတဲ့ကားတွေနဲ့ သူတို့ရဲ့ ပိုင်ဆိုင်မှုတွေ ကို ငွေကြေးခဝါချမှုနဲ့ အရေးယူဖို့ သွားပြီးသိမ်းဆည်းထားတာပေါ့။ အဲဒါပြီးတာနဲ့ သူတို့ရဲ့ပိုင်ဆိုင်မှုတွေကို သက်ဆိုင်ရာတပ်ဖွဲ့တွေကနေ စိစစ်ပြီးတော့မှ ငွေကြေးခဝါချမှုတိုက်ဖျက်ရေးအဖွဲ့ကို လွှဲပေးဖို့ရှိတယ်။ အဲဒီကနေမှ သီးခြားငွေကြေးခဝါချအဖွဲ့ဖွဲ့ပြီး စိစစ်အရေးယူမှာပါ” ဟု ၎င်းက ဆက်လက်ပြောသည်။

လက်ရှိ နစကလက်ထက်၌ မူးယစ်ဆေးဝါးနှင့်ပတ်သက်၍ သယ်ဆောင်ရောင်းချသည့် ဖြစ်စဉ်များ အများအပြား တွေ့ရှိနေရလျက်ရှိပြီး ငွေကျပ်ဘီလျံနှင့်ချီကာ တန်ဖိုးရှိသည့် မူးယစ်ဆေးဝါးဖမ်းဆီးရမိမှုဖြစ်စဉ်များလည်း ရှိနေသည်။