Pika (NSS) - ဒီဇင်ဘာ ၆

အိန္ဒိယကျန်းမာရေးဝန်ကြီးဌာန လက်အောက်ရှိ  အမျိုးသားကိုယ်တွင်းအင်္ဂါနှင့် တစ်ရှူးအစားထိုးအဖွဲ့ (NOTTO) သည် Indraprastha Apollo ဆေးရုံ ပါဝင်ပတ်သက်သည့် ငွေသား-ကျောက်ကပ် အရောင်းအဝယ် အရှုပ်တော်ပုံ စွပ်စွဲချက်များကို စုံစမ်းစစ်ဆေးမှုများ စတင်လုပ်ဆောင်ခဲ့ကြောင်း News18 သတင်းစာ၏ ဖော်ပြချက်အရ သိရသည်။

အဆိုပါ ပုဂ္ဂလိကဆေးရုံအဖွဲ့သည် မြန်မာနိုင်ငံမှ လူတစ်ဦးချင်းစီ၏ ကိုယ်အင်္ဂါအစိတ်အပိုင်းများကို ငွေကြေးရရှိရန် အတွက် ရောင်းစားရန် ဖြားယောင်းသွေးဆောင်မှုများတွင် ပါဝင်ပတ်သက်နေကြောင်း ဗြိတိန်အခြေစိုက် သတင်းစာ The Telegraph က ဖော်ပြခဲ့ပြီးနောက် စုံစမ်းစစ်ဆေးမှုများကို စတင်လုပ်ဆောင်ခဲ့ခြင်းဖြစ်ကြောင်း သိရသည်။

အိန္ဒိယကျန်းမာရေးဝန်ကြီးဌာန အကြီးတန်းအရာရှိက "ဒီကိစ္စနဲ့ပတ်သက်ပြီး စုံစမ်းစစ်ဆေးမှုတွေကို စတင် လုပ်ဆောင်နေပြီလို့ NOTTO က ကျွန်တော်တို့ကို အကြောင်းကြားခဲ့ပါတယ်။ ဒီကိစ္စမှာ နိုင်ငံတကာချိတ်ဆက်မှု တွေလည်း ပါဝင်တာကြောင့် စုံစမ်းစစ်ဆေးဖော်ထုတ်နိုင်ဖို့ အချိန်တစ်ခုတော့ပေးရပါလိမ့်မယ်" ဟု ပြောခဲ့သည်။

ဒီဇင်ဘာလ(၃)ရက်က ထုတ်ပြန်ခဲ့သော အစီရင်ခံစာတွင် "မြန်မာနိုင်ငံက လူငယ်တွေဟာ ချမ်းသာတဲ့ မြန်မာလူမျိုး တွေဆီကို သူတို့ရဲ့ကျောက်ကပ်တွေကို လှူဒါန်းခြင်းဖြင့် လျော်ကြေးငွေရရှိဖို့အတွက် Indraprastha Apollo ဆေးရုံကို သွားခဲ့ကြပါတယ်" ဟု ဖော်ပြထားသည်။ 

အဆိုပါစွပ်စွဲပြောဆိုချက်များကို Indraprastha Medical Corporation Ltd (IMCL) က ငြင်းဆိုခဲ့ပြီး ယင်းစွပ်စွဲ ချက်များမှာ မဟုတ်မမှန်ဘဲ လှည့်ဖြားထားသော ပြောဆိုချက်များသာဖြစ်ကြောင်း ပြန်လည်တုံ့ပြန်ထားသည်။ Apollo ဆေးရုံသည် အိန္ဒိယ၏ အကြီးဆုံးဆေးရုံတစ်ခုဖြစ်ပြီး နှစ်စဉ် အစားထိုးကုသမှုပေါင်း(၁၂၀၀)ကျော် လုပ်ဆောင်ကာ ကမ္ဘာတစ်ဝန်းမှ ချမ်းသာသော လူနာများကို ဆွဲဆောင်လျက်ရှိသည်။

IMCL က "အချက်အလက်တွေအားလုံးကို သက်ဆိုင်ရာသတင်းထောက်တွေကို အသေးစိတ်မျှဝေထားပါတယ်။ ပြောရမယ်ဆိုရင် IMCL ဟာ အစိုးရက ချမှတ်ထားတဲ့လမ်းညွှန်ချက်တွေ အပါအဝင် အစားထိုးခြင်းဆိုင်ရာလုပ်ထုံး လုပ်နည်းတွေအတွက် ဥပဒေနဲ့ကျင့်ဝတ်ဆိုင်ရာလိုအပ်ချက်တွေအတိုင်း လိုက်နာဆောင်ရွက်ပါတယ်" ဟု ပြောခဲ့ သည်။

မြန်မာနိုင်ငံမှ လူငယ်များသည်  Apollo ဆေးရုံသို့သွားရောက်ခဲ့ပြီးနောက် ချမ်းသာသော မြန်မာလူမျိုးများကို ၎င်းတို့၏ ကျောက်ကပ်များရောင်းချနိုင်ရန် လုပ်ဆောင်ခဲ့ကြောင်း The Telegraph သတင်းစာ၏ စုံစမ်းစစ်ဆေးမှုများအရ သိရသည်။

အစီရင်ခံစာတွင် "ဒါဟာ တကယ်ကိုကြီးမားတဲ့ စီးပွားရေးတစ်ခုပါ။ လိမ်လည်မှုတွေမှာ အထောက်အထား စာရွက် စာတမ်းတွေကို အသေးစိတ်ကအစ အတုလုပ်တာမျိုးတွေလည်း ပါဝင်ပါတယ်" ဟု ဖော်ပြထားသည်။ 

အိန္ဒိယနှင့် မြန်မာဥပဒေများအရ လူနာတစ်ဦးသည် ပုံမှန်အခြေအနေများတွင် သူစိမ်းထံမှ ကိုယ်တွင်းအင်္ဂါ လှူဒါန်း မှုများကို လက်ခံ၍မရကြောင်း သိရသည်။