Pika (NSS) - ဒီဇင်ဘာ ၆

ထိုင်ဝမ်ရေလက်ကြားကို ဖြတ်ကျော်ဝင်ရောက်လာသော အမေရိကန်ရေတပ် ကင်းလှည့်လေယာဉ်တစ်စီးကို စောင့်ကြည့်ရန်နှင့် သတိပေးမှုများ လုပ်ဆောင်ရန်အတွက် တိုက်လေယာဉ်များကို စေလွှတ်ခဲ့ကြောင်း တရုတ်စစ်တပ်က ဒီဇင်ဘာလ(၅)ရက်တွင် ပြောဆိုခဲ့သည်။

တရုတ်အစိုးရက ဒီမိုကရေစီနည်းကျအုပ်ချုပ်နေသော ထိုင်ဝမ်ကျွန်းသည် ၎င်း၏ ပိုင်နက်နယ်မြေများထဲမှ တစ်ခုဖြစ်ပြီး ရေလက်ကြားအပေါ် တရားစီရင်ပိုင်ခွင့်ရှိကြောင်းလည်း ပြောဆိုထားသည်။ သို့သော်လည်း ထိုင်ဝမ်ရေလက်ကြားသည် နိုင်ငံတကာရေကြောင်းလမ်းတစ်ခုဖြစ်ကြောင်း ထိုင်ဝမ်နှင့် အမေရိကန်တို့က ပြန်လည်တုံ့ပြန်ပြောဆိုထားသည်။

P-8A Poseidon ရေကြောင်းကင်းလှည့် နှင့် ထောက်လှမ်းရေးလေယာဉ်သည် နိုင်ငံတကာလေပိုင်နက်အတွင်း ထိုင်ဝမ်ရေလက်ကြားကို ဖြတ်ကျော်ပျံသန်းခဲ့ကြောင်း အမေရိကန်ရေတပ်၏ 7th Fleet က ပြောကြားခဲ့သည်။

အမေရိကန်ရေတပ်၏ 7th Fleet က "ထိုင်ဝမ်ရေလက်ကြားကို ကျွန်တော်တို့ရဲ့ ကင်းလှည့်လေယာဉ်ဖြတ်ကျော် ပျံသန်းမှုဟာ လွတ်လပ်ပွင့်လင်းတဲ့ အင်ဒို-ပစိဖိတ်ဒေသအတွက် အမေရိကန်ရဲ့ကတိဝတ်တွေကို သက်သေပြနေပါတယ်။ အမေရိကန်စစ်တပ်ဟာ နိုင်ငံတကာဥပဒေအရ ခွင့်ပြုထားတဲ့ ဘယ်နေရာကိုမဆို ဖြတ်ကျော်ပျံသန်းတာ မျိုးတွေ လုပ်ဆောင်နေပါတယ်" ဟု ပြောဆိုခဲ့သည်။

ထို့အပြင် အမေရိကန်၏ ကင်းလှည့်လေယာဉ်ကို စောင့်ကြည့်ရန်နှင့် သတိပေးမှုများ လုပ်ဆောင်ရန်အတွက် တိုက်လေယာဉ်များစေလွှတ်ခဲ့ခြင်းသည် ဥပဒေ၊ စည်းမျဉ်းများနှင့်အညီ ကိုင်တွယ်ဖြေရှင်းခြင်းမျိုးဖြစ်ကြောင်း တရုတ်စစ်တပ်က ပြောကြားခဲ့သည်။ တရုတ်စစ်တပ်၏ အရှေ့ပိုင်းကွပ်ကဲမှုဌာနချုပ်က "ဌာနချုပ်မှာရှိတဲ့ တပ်ဖွဲ့ဝင်တွေဟာ အမြဲတမ်းသတိရှိနေပြီး တရုတ်နိုင်ငံ လုံခြုံရေးနဲ့ အချုပ်အခြာအာဏာအပြင် ဒေသတွင်း တည်ငြိမ်ရေး နဲ့ ငြိမ်းချမ်းရေးကို ပြတ်ပြတ်သားသားကာကွယ်သွားမှာပါ" ဟု ပြောခဲ့သည်။