ခရိုင်းမီးယားကျွန်းဆွယ်နှင့် Azov ပင်လယ်တို့တွင် ယူကရိန်း၏ ဒရုန်းအများအပြားကို ဖျက်ဆီးပစ်နိုင်ခဲ့ကြောင်း ရုရှားကာကွယ်ရေးဝန်ကြီးဌာနပြော
Pika (NSS) - ဒီဇင်ဘာ ၆
ရုရှားနိုင်ငံရှိ ပစ်မှတ်အများအပြားကို ဦးတည်တိုက်ခိုက်ခဲ့သည့် ယူကရိန်း၏ ဒရုန်းအများအပြားကို ကြားဖြတ်ဟန့်တားကာ ဖျက်ဆီးပစ်နိုင်ခဲ့ကြောင်း ရုရှားကာကွယ်ရေးဝန်ကြီးဌာနက ပြောကြားခဲ့သည်။
ရုရှား၏ လေကြောင်းရန်ကာကွယ်ရေးစနစ်များသည် ယူကရိန်း၏ ဒရုန်း(၂၂)စင်းကို ဖျက်ဆီးပစ်နိုင်ခဲ့ပြီး အခြား ဒရုန်း(၁၃)စင်းကို ခရိုင်းမီးယားကျွန်းဆွယ်နှင့် Azov ပင်လယ်ကြားတွင် ကြားဖြတ်ဟန့်တားနိုင်ခဲ့ကြောင်း ရုရှားကာကွယ်ရေးဝန်ကြီးဌာနက ပြောကြားခဲ့သည်။
ဒီဇင်ဘာလ(၅)ရက် အစောပိုင်းတွင် ရုရှားနှင့်ခရိုင်းမီးယားကျွန်းဆွယ်ကို ဆက်သွယ်ထားသော တံတားပေါ်ရှိ ယာဉ်လမ်းကြောင်းသွားလာမှုများကို ပိတ်ဆို့ထားခဲ့ရကြောင်း အဆိုပါတံတားအော်ပရေတာက ပြောကြားခဲ့သည်။ ထို့အပြင် ယာဉ်မောင်းများကို စိတ်အေးအေးထားကြရန် နှင့် သယ်ယူပို့ဆောင်ရေးလုံခြုံရေးအရာရှိများ၏ ညွှန်ကြားချက်များအတိုင်း လိုက်နာဆောင်ရွက်ကြရန် တာဝန်ရှိသူများက ပြောကြားခဲ့ကြောင်း သိရသည်။
သို့သော်လည်း ယာဉ်လမ်းကြောင်းသွားလာမှုများ ဆိုင်းငံ့ရခြင်းအကြောင်းအရင်းကို အစိုးရအဖွဲ့များက ထုတ်ဖော် ပြောဆိုခဲ့ခြင်းမျိုး မရှိခဲ့ကြောင်းလည်း သိရသည်။ ယူကရိန်းသည် ပြီးခဲ့သည့်လများအတွင်း ခရိုင်းမီးယား ကျွန်းဆွယ်ကို ဒုံးကျည်များ၊ ဒရုန်းများဖြင့် တိုက်ခိုက်မှုကို ပိုမိုအရှိန်မြှင့်လုပ်ဆောင်ခဲ့ကြောင်း သိရသည်။
ပြီးခဲ့သည့် အောက်တိုဘာလတွင် ယူကရိန်း၏ ဒရုန်း ဒါဇင်ပေါင်းများစွာကို ခရိုင်းမီးယားကျွန်းဆွယ် အနောက် မြောက်ပိုင်း နှင့် ပင်လယ်နက်တို့တွင် တွေ့ရှိခဲ့ပြီးနောက် ဖျက်ဆီးပစ်ခဲ့ကြောင်း ရုရှားစစ်တပ်က ပြောကြားခဲ့သည်။ ပြီးခဲ့သည့်စက်တင်ဘာလ(၁၃)ရက်တွင် ယူကရိန်းတပ်ဖွဲ့များသည် ဆီဗာစတိုပိုလ်မြို့ရှိ သင်္ဘောကျင်းတစ်ခုကို ခရုဇ်ဒုံးကျည်များဖြင့် ပစ်ခတ်တိုက်ခိုက်ခဲ့ပြီး ရုရှားရေတပ်သင်္ဘောနှစ်စီး ထိခိုက်ပျက်စီးမှုများရှိခဲ့ကြောင်း ရုရှားစစ်တပ်က ပြောကြားခဲ့သည်။
ထို့နောက် (၉)ရက်အကြာတွင် ဆီဗာစတိုပိုလ်မြို့ရှိ ပင်လယ်နက်ရေယာဉ်စုဌာနချုပ်ကို ဒုံးကျည်တစ်စင်းထိမှန်ခဲ့ ကြောင်းလည်း သိရသည်။ ယူကရိန်းသည် ဆီဗာစတိုပိုလ်မြို့ရှိ ရုရှား၏ ဆိပ်ကမ်းအခြေခံအဆောက်အဦးများကို တိုက်ခိုက်ရန်အတွက် ပင်လယ်ဒရုန်းများကို အကြိမ်ကြိမ်အသုံးပြုခဲ့ကြောင်း သိရသည်။ ထို့အပြင် ပြီးခဲ့သည့်နှစ် ဇူလိုင်လတွင် အရှည်(၁၉)ကီလိုမီတာရှိသော ခရိုင်းမီးယားတံတား တိုက်ခိုက်ခံခဲ့ရသော်လည်း ပြန်လည်ပြင်ဆင်မှု များလုပ်ဆောင်ခဲ့ပြီးနောက် ယခုနှစ် အောက်တိုဘာလတွင် ပြန်လည်ဖွင့်လှစ်နိုင်ခဲ့ကြောင်း သိရသည်။
Comments :
0 comments
မကွေးတိုင်းဒေသကြီး၊ စလင်းမြို့နယ်၊ အုတ်ဖိုကန်ကျေးရွာ၊ မင်းဘူး- စလင်းကားလမ်းပေါ်တွင် သစ်ပင်လဲကျမှုဖြစ်ပွား
ယနေ့ ဒီဇင်ဘာလ ၆ ရက်အတွင်းဖြစ်ပွားခဲ့တဲ့ ပြည်တွင်းနှင့် ပြည်ပက သတင်းများ
RELATED POSTS
22 Sep 2024 | နိုင်ငံရေး,နိုင်ငံတကာ
22 Sep 2024 | နိုင်ငံရေး,နိုင်ငံတကာ
22 Sep 2024 | နိုင်ငံရေး,ပြည်တွင်း