မြူနစ် (NSS) - ဒီဇင်ဘာ ၁

အမျိုးသားဒီမိုကရေစီပါတီသစ်ဥက္ကဋ္ဌ ဦးသန်းထွန်းကို အကြမ်းဖက်အဖွဲ့က နေအိမ်အတွင်း ဝင်ရောက်ကာ သေနတ် ဖြင့် လုပ်ကြံသတ်ဖြတ်ခဲ့ကြောင်း သတင်းရရှိသည်။

ဖြစ်စဉ်မှာ ယနေ့(ဒီဇင်ဘာ ၁ ရက်) နံနက် ၈ နာရီအချိန်ခန့်တွင် ရန်ကုန်တိုင်း၊ သင်္ဃကျွန်းမြို့နယ်၊ ငမိုးရိတ် ရပ်ကွက်၊ (၃) လမ်းရှိ ဥက္ကဋ္ဌ ဦးသန်းထွန်း၏ နေအိမ်၌ ဖြစ်ပွားခဲ့ခြင်းဖြစ်ကြောင်း သိရသည်။

“မနက် ၈ နာရီလောက်မှာ ဖြစ်သွားတာ။ သူ့အိမ်မှာရှိတဲ့ မိတ္တူဆိုင်မှာ မိတ္တူကူးဖို့ လာတယ်ဆိုပြီးတော့ အဲဒီမှာ ဝင်ပစ်သွားတာ။ (၄)ချက်ထိသွားတယ်။ အဲဒီမှာ မြောက်ဥက္ကလာဆေးရုံကို ပို့တယ်။ ဒါပေမယ့် ဆုံးသွားတယ်” ဟု အမျိုးသားဒီမိုကရေ စီပါတီသစ်(NNDP)ပါတီမှ တာဝန်ရှိသူတစ်ဦးက NP News ကို ပြောသည်။

အမျိုးသားဒီမိုကရေစီပါတီသစ်(NNDP)ဥက္ကဋ္ဌ ဦးသန်းထွန်းသည် သေနတ်ဖြင့် (၄)ချက် ပစ်ခတ်ခံခဲ့ရခြင်းဖြစ်ပြီး ၎င်းအား ဆေးရုံသို့ ပို့ဆောင်ပေးခဲ့သော်လည်း ကွယ်လွန်သွားခဲ့ကြောင်း သိရသည်။

“ကိုသန်းထွန်းဟာ တစ်သက်လုံးတောက်လျှောက်ပေါ့ ၈၈ ကတည်းက ကျောင်းသားလှုပ်ရှားမှုကနေ ဒီမိုကရေစီ အရေးမှာ ပါဝင်ခဲ့တယ်။ ပြီးတော့ သင်္ဃန်းကျွန်းမှာ NLD စတင် တည်ထောင်ကတည်းကလည်း သင်္ဃန်းကျွန်း NLD တစ်ယောက်အနေနဲ့ သူလုပ်ခဲ့တယ်။ ၂ဝ၁ဝ မှာ သူ ရွေးကောက်ပွဲလမ်းစဉ်ကို ယုံကြည်တော့ ဦးသိန်းညွန့်တို့နဲ့ အတူတူ NDF ပါတီကနေ တက်တက်ကြွကြွလှုပ်ရှားခဲ့တယ်။ ၂ဝ၁ဝ ရွေးကောက်ပွဲ ပြီးသွားတော့ ဦးသိန်းညွန့်တို့ရဲ့ NNDP ပါတီပေါ့၊ အမျိုးသားဒီမိုကရေစီပါတီသစ်ပေါ့ ခမောက်သုံးလုံးပါတီ တည်ထောင်တဲ့အခါမှာ ပါတီ စတည် ထောင်သူတစ်ဦးအနေနဲ့ ပါဝင်ခဲ့တယ်။ ဒုဥက္ကဋ္ဌ အနေနဲ့ တာဝန်ယူခဲ့တယ်” ဟု ၎င်းပါတီမှ တာဝန်ရှိသူက ဆက်လက်ပြောသည်။

လုပ်ကြံသတ်ဖြတ်ခံခဲ့ရသော ဦးသန်းထွန်းသည် ၂ဝ၂၁ ခုနှစ်တွင် ဥက္ကဋ္ဌဟောင်းဦးသိန်းညွန့်က နိုင်ငံတော် တာဝန်ထမ်း ဆောင်သွားစဉ်အချိန်တွင် NNDP ပါတီဥက္ကဋ္ဌအဖြစ် တာဝန်လွှဲပြောင်းရယူခဲ့သူတစ်ဦးဖြစ်ကြောင်း သိရသည်။

လက်ရှိတွင် NNDP ပါတီဥက္ကဋ္ဌ ဦးသန်းထွန်း လုပ်ကြံသတ်ဖြတ်ခံရမှုနှင့်ပတ်သက်၍ ပါတီဝင်များကလည်း ကန့်ကွက်ရှုတ်ချထားသည်။

“ပြောချင်တာကတော့ ကိုသန်းထွန်းလိုမျိုး ဒီမိုကရေစီနဲ့ရွေးကောက်ပွဲလမ်းစဉ်ကို ယုံကြည်တဲ့ လူတစ်ယောက်၊ ငြိမ်းချမ်းစွာ အသွင်ကူးပြောင်းရေးကို ယုံကြည်တဲ့လူတစ်ယောက်ကို အခုလိုလုပ်ကြံခံတယ်ဆိုတာက သူရဲဘောကြောင်တဲ့ လူတွေရဲ့လုပ်ရပ်လို့ မြင်တယ်။ သူတို့ ဒီသူရဲဘောကြောင်တဲ့ အကြမ်းဖက်တဲ့လုပ်ရပ်က ကျဆုံးမှာပဲ အနှေးနဲ့အမြန်။ တစ်ခုပဲပေါ့ ဒီလိုငြိမ်းငြိမ်းချမ်းချမ်းနဲ့ အသွင်ကူးပြောင်းရေးကို ယုံကြည်တဲ့သူ၊ ဒီမိုကရေစီကို ရိုးရိုးသားသားယုံကြည်တဲ့သူတစ်ယောက် တိုင်းပြည်အတွက်၊ ပါတီအတွက် ဆုံးရှုံးသွားရတာပေါ့။ အစ်ကိုတို့ကတော့ သူယုံကြည်တဲ့ လမ်းစဉ်အတိုင်း ဆက်ပြီးတော့ လျှောက်ဖို့ လုပ်ရမှာပဲ” ဟု NNDP ပါတီမှ တာဝန်ရှိသူက ပြောသည်။

NNDP ပါတီဥက္ကဋ္ဌဦးသန်းထွန်းသည် အကြမ်းဖက်လုပ်ကြံခံရပြီးနောက် သေဆုံးချိန်တွင် အသက်(၅၄)နှစ် အရွယ်ရှိ ပြီဖြစ်ကာ ၎င်း၌ သား/သမီးနှင့် မြေးအရွယ်ကလေးငယ်များ ကျန်ရစ်ခဲ့ကြောင်း သိရသည်။

နိုင်ငံအတွင်း၌ အကြမ်းဖက်သမားများ၏ လုပ်ကြံသတ်ဖြတ်မှုများကြောင့် ရဟန်းသံဃာ၊ နိုင်ငံ့ဝန်ထမ်း၊ နိုင်ငံရေး ပါတီဝင်နှင့် အရပ်သားစုစုပေါင်း (၆၇ဝဝ)ကျော် သေဆုံးခဲ့ရပြီး ယင်းကဲ့သို့ လုပ်ကြံသတ်ဖြတ်ခံရမှုများအပေါ် နိုင်ငံတော်တာဝန်ရယူထားသည့် နစကအနေဖြင့် အကာအကွယ်ပေးနိုင်ခြင်း မရှိသည့်အပြင် အကြမ်းဖက်အဖွဲ့များ ကလည်း ၎င်းတို့၏ သတ်ဖြတ်မှုများကို ရပ်တန့်သွားခြင်းမျိုး မရှိသေးပေ။