ကျော် (NSS) - ဒီဇင်ဘာ ၁

ကရင်ပြည်နယ်၊ ကော့ကရိတ်မြို့တွင် တပ်မတော် နှင့် KNU ၊ PDF ပူးပေါင်းအဖွဲ့တို့ကြား တိုက်ပွဲပြင်းထန်နေသဖြင့် ဌာနဆိုင်ရာရုံးများနှင့်နေအိမ်အချို့မီးလောင်ကာ မြဝတီ-ကော့ကရိတ်သွား အာရှလမ်းမကြီးကိုလည်း ဖြတ်သန်းခွင့်ယာယီပိတ်ထားကြောင်း ဒေသခံလူမှုကူညီရေးအသင်းများမှ သိရသည်။

ကော့ကရိတ်မြို့ရှိ တပ်မတော်စခန်းများနှင့်မြို့တွင်းနေရာအချို့အား KNU၊ PDF ပူးပေါင်းအဖွဲ့က ယမန်နေ့ (နိုဝင်ဘာလ ၃၀ ရက်)၊ ညပိုင်းမှစတင်ကာ လက်နက်ကြီးများဖြင့် ပစ်ခတ်တိုက်ခိုက်ခဲ့ကြောင်း သိရသည်။

"မနေ့ည ၇ နာရီလောက်ကစပြီး လက်နက်ကိုင်အဖွဲ့က လက်နက်ကြီးတွေနဲ့စပစ်တဲ့အသံကိုကြားရတယ်။ တပ်ဖက်ကလည်းပြန်ပစ်တယ်။ ညတုန်းက အပြန်အလှန်လက်နက်ကြီးနဲ့ပစ်တာလောက်ပဲရှိခဲ့တယ်။ ညနက်ပိုင်းလောက်ရောက်တော့ လက်နက်ကြီးပစ်သံတွေမကြားရတော့ဘူး"ဟု ဒေသခံလူမှုကူညီရေးအသင်းဝင်တစ်ဦးက NSS ကိုပြောသည်။

ယမန်နေ့ ညနက်ပိုင်းက လက်နက်ကြီးအပြန်အလှန်ပစ်ခတ်မှုများဖြစ်ပေါ်ခဲ့ပြီးနောက် ယနေ့ (ဒီဇင်ဘာလ ၁ ရက်)၊ နံနက်အစောပိုင်း ၄ နာရီခန့်တွင် လက်နက်ကြီးပစ်ခတ်မှုများ နှင့်အတူ အပြန်အလှန်ပစ်ခတ်မှုများလည်းရှိခဲ့ကြောင်း သိရသည်။

လက်နက်ကြီးပစ်ခတ်မှုကြောင့် ကော့ကရိတ်မြို့တွင်းရှိ ဌာနဆိုင်ရာရုံးအချို့နှင့်နေအိမ်အချို့ လက်နက်ကြီးကျည်ထိမှန်မှုနှင့်မီးလောင်မှုတို့ဖြစ်ပွားကာ ပျက်စီးမှုများဖြစ်ပေါ်ခဲ့ကြောင်း သိရသည်။

"ဒီနေ့မနက်အစောပိုင်းရောက်တော့ လက်နက်ကြီးပစ်သံတွေရော၊ သေနတ်ပစ်သံတွေရောကြားရတယ်။ အခုချိန်ထိ တိုက်ပွဲဖြစ်နေတုန်းပဲ။ ပစ်ခတ်တာတွေရှိတယ် လက်လှမ်းမီသလောက်စုံစမ်းကြည့်တော့ တပ်မတော်စခန်းတွေနားမှာ တိုက်ပွဲဖြစ်တာပိုများတယ်လို့သိရတယ်"ဟု ဒေသခံလူမှုကူညီရေးအသင်းဝင်တစ်ဦးက ပြောသည်။

ကော့ကရိတ်မြို့ရှိ တံတားဦး၊ ခင်နိမ်းမူ၊ ဝင်းကြီး၊ သပြေကုန်း၊ မြို့တော်ဦး၊ ချောင်းတောင်၊အောက်ရွာ နှင့် မွေးမြူရေးဇုန်အနီးတို့တွင် အပြန်အလှန်ပစ်ခတ်မှုအများဆုံးဖြစ်ပေါ်လျက်ရှိပြီး အချို့နေရာများတွင်လည်း ပစ်ခတ်မှုအနည်းငယ်ဖြစ်ပေါ်လျက်ရှိကြောင်း သိရသည်။

တိုက်ပွဲဖြစ်ပွားမှုတွင် မြဝတီ-ကော့ကရိတ်သွား အာရှလမ်းမကြီးပေါ်သို့လည်း လက်နက်ကြီးကျည်ကျရောက်ပေါက်ကွဲမှုများဖြစ်ပေါ်လျက်ရှိသဖြင့် ဖြတ်သန်းသွားလာနေသည့် ကုန်တင်ကားများ၊ ခရီးသည်တင်ကားများ နှင့် အိမ်စီးကားများသည် ရောက်ရှိသည့်နေရာ၌ရပ်တန့်ထားရပြီး တာဝန်ရှိသူများမှလည်း အာရှလမ်းမကြီးပေါ်၌ ဖြတ်သန်းသွားလာခွင့်ကို ယာယီပိတ်ထားခဲ့ကြကြောင်း သိရသည်။

"ကားတွေအကုန်လုံးကို လမ်းဘေးမှာထိုးရပ်ထားပြီး လူတွေက လမ်းဘေးမြောင်းတွေထဲမှာ ဝင်ပုန်းနေရတယ်။ လက်နက်ကြီးပစ်သံရော၊ ပေါက်ကွဲသံရော၊ သေနတ်ပစ်သံတွေရော ဆက်တိုက်ကြားနေရတာ ကလေးတွေဆိုရင် ကြောက်လို့ငိုနေတာ မနည်းချော့မော့နေရတယ်"ဟု အာရှလမ်းမကြီးပေါ်၌ပိတ်မိနေသည့် အဝေးပြေးခရီးသည်တင်ကားမောင်းသူတစ်ဦးက NSS ကိုပြောသည်။

လက်ရှိအချိန်၌ တိုက်ပွဲဖြစ်ပွားမှုနှင့်အတူ တပ်မတော်စခန်းအချို့အား KNU ၊ PDF ပူးပေါင်းအဖွဲ့မှ သိမ်းပိုက်ခဲ့ခြင်း၊ လုံခြုံရေးအဖွဲ့ဝင်အချို့ ဖမ်းဆီးခံရခြင်း၊ ဒေသခံများ သေဆုံးခြင်း၊ဒဏ်ရာရခြင်းများရှိနေသည်ဟု သတင်းများထွက်ပေါ်လျက်ရှိသော်လည်း NSS အနေဖြင့် သီးခြားအတည်ပြုနိုင်ခြင်းမရှိသေးပေ။

ကော့ကရိတ်မြို့တွင် တာဝန်ထမ်းဆောင်လျက်ရှိသည့် ဌာနဆိုင်ရာဝန်ထမ်းများအား KNU က မြို့တွင်းမှတစ်ပတ်အတွင်းထွက်ခွာရန် ပြီးခဲ့သည့် နိုဝင်ဘာလ ၁၇ ရက်က ခြိမ်းခြောက်စာထုတ်ပြန်ခဲ့ပြီးနောက် ယနေ့တွင် တပ်မတော်စခန်းများ နှင့် ကော့ကရိတ်မြို့တွင်းသို့ ဝင်ရောက်တိုက်ခိုက်လျက်ရှိခြင်းဖြစ်သည်။