ဂျန်ဇက် (NSS) - နိုဝင်ဘာ ၃ဝ 

ထိုင်းနိုင်ငံ၊ ချင်းမိုင်မြို့ရှိ  စိုက်ခင်းတစ်ခုတွင် နိုဝင်ဘာ ၂၈ ရက် ညနေပိုင်းက စိုက်ခင်းတစ်ခုအတွင်း အပင်များ ရှင်သန်ကြီးထွားစေရန်အသုံးပြုမည့် ရောနှော ဓါတုဆေးရည် ပြုလုပ်ချိန်တွင် ပေါက်ကွဲမှုဖြစ်ပွားခဲ့ရာ မြန်မာနိုင်ငံ သားနှစ်ဦး သေဆုံးခဲ့ကြောင်း ထိုင်းသတင်းများတွင် ဖော်ပြထားသည်။ 

ပေါက်ကွဲမှုဖြစ်ပွားချိန်တွင် မြန်မာနိုင်ငံသားတစ်ဦး နှင့် ထိုင်းနိုင်ငံသားတစ်ဦး ပွဲချင်းပြီးသေဆုံးခဲ့ပြီး အခြား မြန်မာနိုင်ငံသားတစ်ဦးက ပြင်းထန်သည့်ဒဏ်ရာများရရှိခဲ့ကြောင်းသိရသည်။ ဒဏ်ရာရသော မြန်မာနိုင်ငံသား တစ်ဦးသည် နိုဝင်ဘာ ၂၈ ရက် ညပိုင်းတွင် ဒဏ်ရာများကြောင့် ထပ်မံသေဆုံးခဲ့ရကြောင်း သိရသည်။ 

အဆိုပါ ပေါက်ကွဲမှုသည် ချင်းမိုင်ပြည်နယ် Ban Chai Ngam ရွာအနီးတွင်ဖြစ်ပွားခဲ့ခြင်းဖြစ်ကြောင်း၊ အဆိုပါရွာနှင့် မီတာ ၅ဝဝ အကွာအဝေးရှိ သီးခြားအဆောက်အဦးတွင် ပေါက်ကွဲမှုဖြစ်ပွားခဲ့ခြင်းဖြစ်ကြောင်း ယူရီးယား ၅ဝ ကီလို ဂရမ် နှင့် ပိုတက်ဆီယမ် ၇၅ ကီလိုဂရမ်ကို ရောနှောချိန်အတွင်း ပေါက်ကွဲမှုဖြစ်ပွားခဲ့ခြင်းဖြစ်ကြောင်း၊ သိရသည်။ 

အဆိုပါ ပေါက်ကွဲမှုကြောင့် အဆောက်အဦးနှင့် ကားနှစ်စီးလည်း ထိခိုက်ပျက်စီးခဲ့ရကြောင်း၊ ထိုင်းဘန်ကောက်ပိုစ့် သတင်းတွင် ဖော်ပြထားသည်။

ထို့အပြင် ထိုင်းနိုင်ငံ၊ ဆန်ပက်တွန်ခရိုင်တွင် ၁၉၉၉ ခုနှစ်က ပိုတက်စီယမ်ကလိုရိတ် ပြင်းအားမြင့် ပေါက်ကွဲမှုတစ်ခု ဖြစ်ပွားခဲ့ဖူးကြောင်း သိရသည်။