ကျော် (NSS) - နိုဝင်ဘာ ၃၀

ရှမ်းပြည်နယ်(အရှေ့မြောက်ပိုင်း)တွင် ဖြစ်ပေါ်ခဲ့သည့် တိုက်ပွဲများ၌ တိုင်းရင်းသားလက်နက်ကိုင်အဖွဲ့များသည် လက်ရှိအချိန်ထိ  Drop Bomb အလုံးပေါင်း ၂၅၀၀၀ ကျော်ခန့် နှင့် ၁၀၇ မီလီမီတာ ရှော့တိုက်ဒုံးအလုံး ၁၂၀ ခန့်အသုံးပြုခဲ့ကြောင်း ဗိုလ်ချုပ်မှူးကြီးမင်းအောင်လှိုင်က ပြောသည်။

ယမန်နေ့(နိုဝင်ဘာလ ၂၉ ရက်)က ပြုလုပ်ခဲ့သည့် နစက အစည်းအဝေးတွင် အထက်ပါကဲ့သို့ ထည့်သွင်းပြောကြားခဲ့ခြင်းဖြစ်သည်။

ရှမ်းပြည်နယ်(အရှေ့မြောက်ပိုင်း)တွင် ဖြစ်ပေါ်ခဲ့သည့်ဖြစ်စဉ်များ၌ သာလွန်အင်အားများစုစည်းခြင်းနှင့်နည်းပညာသာလွန်မှုကိုအသုံးချ၍ စစ်သုံးအဆင့် Drone များဖြင့် Drop Bomb များအသုံးပြုတိုက်ခိုက်ခဲ့ခြင်းများရှိခဲ့သည်ဟု ပြောသည်။

"လက်ရှိအချိန်အထိ Drop Bomb အလုံးပေါင်း ၂၅၀၀၀ ကျော်အသုံးပြုထားပြီး ၁၀၇ မီလီမီတာ ရှော့တိုက်ဒုံး အလုံး ၁၂၀ ခန့်လောက်နဲ့လည်း ပစ်ခတ်တိုက်ခိုက်ခဲ့ကြတာကိုတွေ့ရပါတယ်"ဟု နစက ဥက္ကဋ္ဌကပြောသည်။

ထို့ပြင် အောက်တိုဘာလအတွင်း ရှမ်းပြည်နယ် (မြောက်ပိုင်း)၊ ကိုးကန့်ဒေသအတွင်းရှိ တပ်မတော်လုံခြုံရေးစခန်းများကိုတိုက်ခိုက်ရာ၌ TNLA၊ KIA၊ AA အဖွဲ့တို့အပြင် စုစည်းထားသည့် အခြားတပ်ဖွဲ့များမှ ကိုးကန့်များ၊ ပြည်ပမှ Drone ပညာရှင်များ (စုစုပေါင်းအင်အား ၆၅၀၀ ခန့်) ပါဝင်ခဲ့သည်ဟုလည်း နစက ဥက္ကဋ္ဌကပြောသည်။

၎င်းတို့သည် Drone ကြီးများသုံး၍ Drop Bomb များဖြင့်တိုက်ခိုက်ခဲ့ကြပြီး နယ်စပ်ဒေသကုန်သွယ်ရေးအတွက်အဓိကနေရာဖြစ်သည့် မူဆယ်ကိုလည်း လာရောက်တိုက်ခိုက်လျက်ရှိသည်ဟု ပြောသည်။

ထို့ပြင် MNDAA နှင့်ပူးပေါင်းအဖွဲ့ဝင်များက Drop Bomb များဖြင့်တိုက်ခိုက်ခြင်း၊ သာလွန်အင်အားများဖြင့်တိုက်ခိုက်ခြင်းများကြောင့် မိသားစုဝင်များ၏ အသက်အန္တရာယ်လုံခြုံရေးအရ အချို့နေရာများကိုစွန့်ခွာပေးခဲ့ရသည်ဟု ပြောသည်။

"ဒါ့ပြင် နယ်စပ်ဒေသဖြစ်တာကြောင့် တစ်ဖက်နိုင်ငံက အထင်အမြင်မလွဲမှားစေဖို့ ကန့်သတ်ထိန်းသိမ်းဆောင်ရွက်ရပြီး အရပ်သားအပြစ်မဲ့ပြည်သူတွေကို မထိခိုက်အောင်လည်း ဆောင်ရွက်ခဲ့ရတာတွေရှိပါတယ်"ဟု နစက ဥက္ကဋ္ဌက ပြောသည်။

KNPP/KNDF အဖွဲ့သည် နိုဝင်ဘာလ ၁၁ ရက်မှစတင်၍ လွိုင်ကော်မြို့သို့ အင်အားအလုံး အရင်းဖြင့်ဝင်ရောက်တိုက်ခိုက်ခဲ့ကြသည်ဟု ၎င်းကဆက်လက်ပြောသည်။

ထိုသို့ ဝင်ရောက်တိုက်ခိုက်ခြင်းမပြုမီ ၎င်းတို့ လက်နက်စုဆောင်းနေခြင်းသတင်းအရ ၂၀၂၂ ခုနှစ်၊ ဒီဇင်ဘာလ ၁၇ ရက်တွင် လက်နက်အလက် ၅၀၀ နှင့် ခဲယမ်းများကို ဟိုပုံးမြို့နယ်အတွင်း ဖမ်းဆီးရမိခဲ့ပြီး နိုဝင်ဘာလ ၁၆ ရက်တွင်လည်း လက်နက်မျိုးစုံ ၁၃၀ လက်၊ ကျည်မျိုးစုံ ၁၃၀၀၀ ကျော်၊ လက်ပစ်ဗုံး ၇၆၀၀ ကျော်၊ လက်နက်ငယ်ပြောင်းပို ၅၀၀ ချောင်းနှင့် အခြားခဲယမ်းများကို ဖမ်းဆီးရမိခဲ့သည်ဟု နစက ဥက္ကဋ္ဌက ပြောသည်။

တိုင်းရင်းသားလက်နက်ကိုင်အဖွဲ့များသည် ငြိမ်းချမ်းရေးကိုအကြောင်းပြု၍ အင်အားစုစည်းခြင်း၊ လက်နက်ခဲယမ်းမီးကျောက်များ အပြိုင်အဆိုင်တည်ဆောက်ထုတ်လုပ်ခြင်း၊ PDF အဖွဲ့များကို အကြမ်းဖက်သင်တန်းများဖွင့်လှစ်သင်တန်းပေးခြင်း၊ လက်နက်/ခဲယမ်း/မီးကျောက်များ ရောင်းချပေးခြင်းတို့ကို လုပ်ဆောင်လျက်ရှိကာ ငြိမ်းချမ်းရေးအပေါ် အမြတ်ထုတ်လျက်ရှိသည်ဟု နစက ဥက္ကဋ္ဌက ပြောကြားခဲ့သည်။