ကျော် (NSS)- နိုဝင်ဘာ ၃၀

နယ်မြေတည်ငြိမ်အေးချမ်းမှုမရှိသည့်ဒေသများ၌ ပိတ်ထားရသည့်ကျောင်းများအား အခြေအနေပေးပါက ပုံမှန်အတိုင်းပြန်လည်ဖွင့်လှစ်နိုင်ရန် ဆောင်ရွက်သွားမည်ဖြစ်ကြောင်း နစက ဥက္ကဋ္ဌက ပြောကြားသည်။

နစက ဥက္ကဋ္ဌက နိုဝင်ဘာလ ၂၉ ရက်၊ နံနက်ပိုင်းက နေပြည်တော်ရှိ နစက ဥက္ကဋ္ဌရုံး၌ကျင်းပသည့် နစက အစည်းအဝေး(၆/၂၀၂၃)တွင် ပြောကြားခဲ့ခြင်းဖြစ်သည်။

KNPP နှင့် PDF အဖွဲ့ဝင်များသည် လွိုင်ကော်တက္ကသိုလ်မှ ပါမောက္ခချုပ်အပါအဝင် ဆရာ၊ ဆရာမများ၊ ကျောင်းသား၊ ကျောင်းသူများ၊ မိသားစုဝင်များကို အတင်းအဓမ္မဖမ်းဆီးခေါ်ဆောင်သွားခဲ့ကြသည်ဟု ၎င်းကပြောသည်။

"တိုက်ပွဲဖြစ်ပွားနေတုန်းမှာ စစ်ရေးနဲ့မသက်ဆိုင်တဲ့ ပညာရေးဝန်ထမ်းတွေ ကျောင်းသား၊ကျောင်းသူတွေကို ဖမ်းဆီးခေါ်ဆောင်ခြင်းဟာ ဂျီနီဗာကွန်ဗင်းရှင်းပါအချက်တွေကို ချိုးဖောက်နေတာကြောင့် လုံးဝလက်သင့်ခံလို့မရပါဘူး"ဟု နစက ဥက္ကဋ္ဌက ပြောသည်။

ထို့ကြောင့် အမြန်ဆုံးပြန်လွှတ်ပေးရန် သတင်းထုတ်ပြန်ခဲ့ခြင်း၊ ငြိမ်းချမ်းရေးကိုလိုလားသည့်ဒေသခံများ နှင့် ဘာသာသာသနာပြုအဖွဲ့အစည်းများက တိုက်တွန်းခြင်းများပြုလုပ်ခဲ့ကြသည်ဟု ပြောသည်။

ထိုသို့ ထုတ်ပြန်တိုက်တွန်းမှုများကြောင့် KNPP နှင့် PDF အဖွဲ့ဝင်များသည် ၎င်းတို့ဖမ်းဆီးခေါ်ဆောင်သွားခဲ့သူ ၂၀၄ ဦးအနက် ၁၉၃ ဦးကိုပြန်လွှတ်ပေးခဲ့သဖြင့် ၁၁ ဦးသာကျန်ရှိတော့ကြောင်း နစက ဥက္ကဋ္ဌက ပြောသည်။

ထို့ပြင် KNPP နှင့် PDF အဖွဲ့ဝင်များ၏ အကြမ်းဖက်လုပ်ရပ်များကြောင့် လွိုင်ကော်တက္က သိုလ်တွင်ဖြေဆိုမည့် အဝေးသင်တက္ကသိုလ်စာမေးပွဲများကိုဖျက်သိမ်းခဲ့ရသည်။

"စာမေးပွဲဖြေဆိုကြမယ့် ကျောင်းသား၊ ကျောင်းသူတွေ ကျောင်းသားမိဘတွေ ထိခိုက်နစ်နာခဲ့ကြရသလို ဒေသခံတွေရဲ့ လူမှုစီးပွားဘဝတွေလည်း ထိခိုက်ခဲ့ရပါတယ်။ လွိုင်ကော်နည်းပညာတက္ကသိုလ်၊ ကွန်ပျူတာတက္ကသိုလ်၊ ပညာရေးဒီဂရီကောလိပ်တွေကိုလည်း ပိတ်ခဲ့ရပါတယ်။ ဟားခါးတက္ကသိုလ်ကလည်း ဖွင့်လှစ်နိုင်ခြင်းမရှိသေးပါဘူး"ဟု နစက ဥက္ကဋ္ဌကပြောသည်။

တက္ကသိုလ်အားလုံးကို နိုဝင်ဘာလ ၂၃ ရက်မှစတင်၍ ပုံမှန်အတိုင်းဖွင့်လှစ်ခဲ့သော်လည်း နယ်မြေတည်ငြိမ်အေးချမ်းမှုမရှိသည့်ဒေသများ၌ ကျောင်းတက်ရောက်သူနည်းပါးလျက်ရှိသည်ဟု ၎င်းကပြောသည်။

"ပိတ်ထားရတဲ့ ကျောင်းတွေလည်းရှိပါတယ်။ အခြေအနေပေးခဲ့မယ်ဆိုရင် အဲဒီကျောင်းတွေကို ပုံမှန်အတိုင်းပြန်ဖွင့်နိုင်ဖို့ ဆောင်ရွက်သွားမှာပါ။ နယ်မြေအခြေအနေအရ တာဝန်ထမ်းဆောင်ကြမယ့် ဆရာ၊ ဆရာမတွေရဲ့ အသက်ဘေးအန္တရာယ်လုံခြုံစိတ်ချမှုရှိစေဖို့အတွက်လည်း ထည့်သွင်းစဉ်းစားဆောင်ရွက်သွားပါမယ်"ဟု နစက ဥက္ကဋ္ဌကပြောသည်။

ထို့အတူ မြန်မာတစ်နိုင်ငံလုံးရှိ အခြေခံပညာကျောင်းများကိုလည်း ပုံမှန်အတိုင်းဖွင့်လှစ်နိုင်ရန် ဆောင်ရွက်သွားမည်ဟု နစက ဥက္ကဋ္ဌက ပြောကြားခဲ့သည်။

ရှမ်းပြည်နယ်(အရှေ့ပိုင်း)၊ ကယားပြည်နယ် နှင့် ချင်းပြည်နယ်တို့သည် ပညာရေးနှင့်ပတ် သက်၍ အားနည်းသည့် ဒေသသုံးခုဖြစ်ပြီး ယခုဖြစ်ပွားခဲ့သည့် ပြဿနာများကြောင့် ကယားပြည်နယ် နှင့် ချင်းပြည်နယ်တို့ရှိ တက္ကသိုလ်များ ပိတ်ထားရခြင်းကြောင့် ၎င်းဒေသများသည် ပညာရေးတွင် နောက်ကျကျန်ခဲ့ကြောင်း နစက ဥက္ကဋ္ဌ ဗိုလ်ချုပ်မှူးကြီး မင်းအောင်လှိုင်က ပြောသည်။