Pearl (NSS) - နိုဝင်ဘာ ၂၄

ရခိုင်ပြည်နယ်၌ ကျောင်းများပိတ်ထားခြင်းမရှိသော်လည်း ‌ကျောင်းသားများအနေဖြင့် လုံခြုံရေးအရ ကျောင်းမတတ်နိုင်သည့် အခြေအနေများရှိနေကြောင်း ဒေသခံများထံမှ သိရသည်။ 

ရခိုင်လက်နက်ကိုင်အဖွဲ့  ULA/AA သည် ပြီးခဲ့သော နိုဝင်ဘာလ (၁၃)ရက်မှစ၍ ရခိုင်ပြည်နယ်၌ တကျော့ပြန်စစ်ပွဲများကို ပြန်လည်ဖော်ဆောင်ခဲ့မှုကြောင့် ဒေသခံပြည်သူများအနေဖြင့် နေရပ်စွန့်ခွာ ထွက်ပြေးတိမ်းရှောင်မှုများရှိခဲ့သည်။ 

လက်တလော စစ်ပွဲကာလအတွင်း၌ ရခိုင်ပြည်နယ်တွင် လက်နက်ကိုင်များ၏ အကြမ်းဖက်လုပ်ရပ်များကြောင့် ရခိုင်ပြည်နယ်(မြောက်ပိုင်း) ဘူးသီးတောင်၊ မောင်တော၊ ရသေ့တောင်၊ ပုဏ္ဏားကျွန်း၊ ပေါက်တော၊ မင်းပြား၊ မြေပုံ၊ ကျောက်တော်၊ မြောက်ဦး နှင့် စစ်တွေ စသည့် မြို့နယ်(၁၀)မြို့နယ်၌ စာသင် ကျောင်း ၁၂၀၀ ခန့်ပိတ်ထားကြောင်း လူမှုကွန်ရက်စာမျက်နှာများတွင် ရေးသားဖြန့်ဝေမှုများရှိနေသည်။ 

ထိုသို့ ရေးသားဖြန့်ဝေမှုများနှင့်ပတ်သက်၍   ရခိုင်ပြည်နယ်မြောက်ပိုင်းတွင် စာသင်ကျောင်းများပိတ်ထားမှုမရှိဘဲ ကျောင်းများပုံမှန်အတိုင်း ဖွင့်လှစ်လျက်ရှိကြောင်း ရခိုင်ပြည်နယ် ပညာရေးမှူးရုံးမှ တာဝန်ရှိသူတစ်ဦး၏ ပြောကြားချက်အရ သိရှိရသည်ဟု နစကဘက်က ပြန်လည်တုံ့ပြန်ထားသည်။ 

"စစ်တွေမှာ မနက်ကတောင် စာသင်ကျောင်းကို သွားတဲ့ကလေးတွေ တွေ့လိုက်သေးတယ်။ တခြားမြို့တွေမှာ ကိုယ်မြင်သလောက်တော့ ဖွင့်နိုင်မှာ မဟုတ်ဘူး။ ပညာရေးဘက်ကတော့ ပိတ်တာ မဟုတ်ဘူး။ ကျောင်းတတ်တဲ့ ကလေးတွေ  မသွားရဲတာ။ မိဘတွေ မလွှတ်ရဲတာပေါ့။ မြို့ပေါ်မှာ မနေရဲအောင် တစ်ဖက်က ဖိအားပေးတာတွေ ရှိတယ်။  မြောက်ဦးဘက်မှာကျတော့ မြို့ပေါ်မှာ မနေနဲ့ရှောင်ကြလို့ အဲဒီလိုမျိုးတွေ သတင်းလွှင့်တဲ့အခါကျ လူတွေက ကောလာဟလကြောင့် ရွာတွေဘက်ကို တိမ်းရှောင်နေကြတာတွေရှိတော့ ကျောင်းဘယ်တတ်နိုင်မလဲ။ အဲဒီလိုပုံစံမျိုးလေးတွေလည်းရှိတယ်"ဟု စစ်တွေမြို့ခံတစ်ဦးက NSS ကို ပြောသည်။ 

လက်ရှိတွင် ရခိုင်ပြည်နယ်ရှိ စစ်တွေမြို့၌ အခြေခံပညာကျောင်းများကို ပုံမှန်ဖွင့်လှစ်သင်ကြားပေးလျက်ရှိပြီး အခြားသောမြို့များ၌ ကျောင်းများပိတ်ထားခြင်းမရှိသော်လည်း လုံခြုံရေးအခြေအနေအရ လာရောက်ကျောင်းမတတ်နိုင်သည့် ကျောင်းသားများရှိနေသည့်အတွက် ကျောင်းပိတ်ထားရသည့်အခြေ အနေများလည်းရှိနေကြောင်း ဒေသခံများက ပြောသည်။

"ပုဏ္ဏားကျွန်းမြို့မှာ အ.ထ.ကကျောင်း  (၂)ကျောင်း၊ မူလတန်းကျောင်း (၄)ကျောင်းရှိတယ်။ ခုတော့ ပိတ်ထားတယ်။ မိဘတွေက ကြောက်ပြီးတော့ ကျောင်းမပို့ရဲတာပါ"ဟု ပုဏ္ဏားကျွန်းမြို့ခံတစ်ဦးက NSS ကို ပြောသည်။ 

ဒေသခံများအနေဖြင့် လူမှုကွန်ရက်စာမျက်နှာများတွင် ပညာရေးနှင့်ပတ်သက်၍ မဟုတ်မမှန်ရေးသားဖြန့်ဝေသည့် သတင်းများကို မယုံကြည်ရန် နှင့် မိမိတို့၏ သားသမီးများ၏ ပညာရေးကို ဆက်လက်အားပေးရန် လိုအပ်ကြောင်း နစကမှ တိုက်တွန်းပြောကြားထားသည်။

လက်ရှိတွင် ရခိုင်ပြည်နယ်၌ တပ်မတော်နှင့် ရခိုင်လက်နက်ကိုင်အဖွဲ့ AA တို့ကြား တိုက်ပွဲများဖြစ်ပွားလျက်ရှိပြီး ၎င်းတိုက်ပွဲများကြောင့် ရေ‌ကြောင်း၊ ကုန်းကြောင်း လမ်းပန်းဆက်သွယ်ရေးသည်လည်း ပိတ်ဆို့ရပ်တန့်လျက်ရှိသည်။