NSS - နိုဝင်ဘာ ၂၄

မန္တလေးတိုင်း၊ ပျော်ဘွယ်မြို့နယ်တွင် မိုင်းထောင်နေသည့် PDF အဖွဲ့ဝင်(၂)ဦးအား ပလပ်စတစ်ကောက်သူအမျိုးသားကတွေ့ရှိခဲ့သဖြင့် နှုတ်ပိတ်ရန်သေနတ်ဖြင့်ပစ်ခတ်လုပ်ကြံခံခဲ့ကြောင်း ရဲတပ်ဖွဲ့၏ ထုတ်ပြန်ချက်အရ သိရသည်။

ဖြစ်စဉ်မှာ ပြီးခဲ့သော နိုဝင်ဘာလ ၂၁ ရက်၊ နံနက် ၇နာရီ ၅၅မိနစ်ခန့်တွင် ပျော်ဘွယ်မြို့နယ်၊ ငွေပုလဲကျေးရွာအနီး၊ ရန်ကုန်-မန္တလေး ကားလမ်းမကြီး၏ မိုင်တိုင်အမှတ်(၂၉၆/၁)၌ အထက်ပါကဲ့သို့ ဖြစ်ပွားခဲ့ခြင်းဖြစ်ကြောင်း သိရသည်။

ပျော်ဘွယ်မြို့နယ်၊ ယင်းတော်ကျေးရွာတွင်နေထိုင်သည့် ဦးညီညီ(၃၃)နှစ်သည် ရန်ကုန်-မန္တလေးကားလမ်းမဘေး၌ ပလပ်စတစ်ဘူးခွံများ လိုက်လံကောက်နေစဉ် ကျီနီကျေးရွာအနီး၌ PDF အဖွဲ့ဝင်(၂)ဦးက မိုင်းထောင်နေသည်ကို တွေ့ခဲ့ကြောင်း ရဲတပ်ဖွဲ့၏ ထုတ်ပြန်ချက်အရ သိရသည်။

၎င်းတို့မိုင်းထောင်နေသည်ကို တွေ့မြင်သွားခဲ့သော ဦးညီညီအား PDF အဖွဲ့ဝင်(၂)ဦးက နှုတ်ပိတ်ရန် သေနတ်ဖြင့် ပစ်ခတ်လုပ်ကြံခဲ့ကြကြောင်း သိရသည်။

သေနတ်ဖြင့် ပစ်ခတ်ခံရမှုကြောင့် ဦးညီညီ၏ ဝဲတင်ပါးမှကျည်ဖောက်ဝင်ပြီး ဝဲပေါင်ကျည်ဖောက်ထွက် ဒဏ်ရာရရှိခဲ့သဖြင့် မိတ္ထီလာခရိုင် ပြည်သူ့ဆေးရုံကြီးသို့ ပို့ဆောင်ပေးခဲ့ရကြောင်း သိရသည်။

ထို့ပြင် လုံခြုံရေးတပ်ဖွဲ့ဝင်များက PDF အဖွဲ့ဝင်(၂)ဦးမိုင်းထောင်ခဲ့သည့် ကျီနီကျေးရွာအနီး ရန်ကုန်-မန္တလးကားလမ်းမကြီး မိုင်တိုင်အမှတ် (၂၉၂)မိုင် ၅ဖာလုံနှင့် ၆ဖာလုံအကြားအား စစ်ဆေးရှာဖွေခဲ့ရာ ဝိုင်ယာကြိုးဖြင့် ချိတ်ဆက်ထားသည့် လက်လုပ်မိုင်းတစ်လုံးအား တွေ့ရှိခဲ့သဖြင့် သက်မဲ့ပြုလုပ်သိမ်းဆည်းခဲ့ရကြောင်း သိရသည်။

ထို့ကြောင့် ပြစ်မှုကျူးလွန်သူများအား ဥပဒေအရ ထိရောက်စွာအရေးယူနိုင်ရန် လုံခြုံရေးတပ်ဖွဲ့ဝင်များက စုံစမ်း စစ်ဆေးမှုများ ပြုလုပ်လျက်ရှိကြောင်း သိရသည်။