မြူနစ် (NSS) - နိုဝင်ဘာ ၂၄

MNDAA နှင့် TNLA ပူးပေါင်းအဖွဲ့က ပစ်ခတ်သော Drop ဗုံးကြောင့် ကားအစီးရေ (၁၂၀)ခန့် မီးလောင်ဆုံးရှုံးခဲ့ပြီး လူထု၏ စီးပွားရေးကို ထိပါးစော်ကားခြင်းဖြစ်ကြောင်း နစကမှ တုံ့ပြန်ထားသည်။

ယမန်နေ့(နိုဝင်ဘာလ ၂၃ ရက်)၊ နံနက် ၉ နာရီ ၄၅ မိနစ်ခန့်တွင် ရှမ်းပြည်နယ်၊ မူဆယ်မြို့နယ်၊ မြန်မာ-တရုတ်နယ်စပ်၊ ကျင်စန်းကျော့ဂိတ်အတွင်းရှိ Seven ဟွာကျင့်ကုမ္ပဏီကားဝန်းအတွင်းသို့ Drop ဗုံးများ ကျရောက်ပေါက်ကွဲခဲ့သည်။

အဆိုပါ Drop ဗုံးများကို MNDAA နှင့် TNLA ပူးပေါင်းအဖွဲ့က ကောင်းခံရွာ၏ တောင်ဘက်မှ Drone များဖြင့် ကြဲချတိုက်ခိုက်ခဲ့ခြင်းဖြစ်ကြောင်း နစကမှ သတင်းထုတ်ပြန်ထားသည်။

ထိုသို့ပစ်ခတ်တိုက်ခိုက်ခြင်းကြောင့် Drop ဗုံးများသည် ကုန်ကားများပေါ်သို့ ကျရောက်ပေါက်ကွဲခဲ့ရာ မီးလောင်ကျွမ်းမှုများဖြစ်ပေါ်ခဲ့ပြီး စုစုပေါင်းကားအစီးရေ (၁၂၀)ခန့် ပျက်စီးဆုံးရှုံးသွားခဲ့ကြောင်း သိရသည်။

“ကားအစီး ၁၂၀ လောက် မီးလောင်ပျက်စီးခဲ့ရပါတယ်။ ဒါနဲ့ပတ်သက်ပြီး ဒီနေရာသည် စစ်ရေးနဲ့ဆိုင်တဲ့နေရာလည်း မဟုတ်ပါဘူး။ ဒါပြည်သူ လူထုနဲ့ဆိုင်တဲ့နေရာပဲဖြစ်ပါတယ်။ နှစ်နိုင်ငံကုန်သွယ်ရေးအတွက် အဓိကအချက်အချာကျတဲ့ နေရာဖြစ်ပါတယ်။ ပြီးရင် တရုတ်နိုင်ငံဘက်ကနေ တင်သွင်းလာတဲ့ မြန်မာ နိုင်ငံအတွက် အခြေခံလိုအပ်ချက်ဖြစ်တဲ့ လူသုံးကုန်၊ ဆေးဝါး၊ ဆောက်လုပ်ရေးသုံးပစ္စည်းတွေဖြစ်ပါတယ်။ ဒါတွေကို ပစ်မှတ်ထားပြီး တိုက်ခိုက်လာခြင်းသည် ပြည်သူလူထုကို တိုက်ရိုက်စော်ကားတာဖြစ်ပါတယ်” ဟု နစကပြောခွင့်ရ ဗိုလ်ချုပ်ဇော်မင်းထွန်းက ပြောသည်။

ထို့ပြင် ဗိုလ်ချုပ်ဇော်မင်းထွန်းက MNDAA နှင့် TNLA ပူးပေါင်းအဖွဲ့၏ လုပ်ရပ်သည် ပြည်သူလူထုနှင့်ပတ်သက်သော စီးပွားရေးကို တိုက်ရိုက်ထိပါးစော်ကားခြင်းဖြစ်ကြောင်းလည်း တုံ့ပြန်ထားသည်။

မီးလောင်ပျက်စီးခဲ့ရသော ကားများသည် မူဆယ်-မန္တလေးပြည်ထောင်စုလမ်းမကြီးတစ်လျှောက်၌ TNLA နှင့် MNDAA ပူးပေါင်းအဖွဲ့များက ကားလမ်းများနှင့် တံတားများကို ဖျက်ဆီးခဲ့ခြင်းကြောင့် သွားလာ၍မရတော့ဘဲ ပိတ်မိနေသည့်ကားများ ဖြစ်ကြောင်း သိရသည်။

MNDAA ဦးဆောင်သော မဟာမိတ်လက်နက်ကိုင် (၃)ဖွဲ့သည် ပြီးခဲ့သော အောက်တိုဘာလ ၂၇ ရက်မှစတင်ကာ (၁၀၂၇ စစ် ဆင်ရေး)အမည်ဖြင့် ရှမ်းပြည်နယ်ရှိ လုံခြုံရေးစခန်းများကို တိုက်ခိုက်ခဲ့ရာ ကုန်စည်သယ်ယူပို့ဆောင်ရေးလမ်းကြောင်းများသည်လည်း ရပ်တန့်သွားခဲ့သည်။

၎င်းကဲ့သို့ စတင်တိုက်ခိုက်မှုများအပေါ် အရပ်ဖက်အဖွဲ့အစည်းအသီးသီး နှင့် လူပုဂ္ဂိုလ်များက ကန့်ကွတ်ရှုတ်ချမှုများရှိခဲ့သော်လည်း ယင်းတို့အနေဖြင့် တိုက်ပွဲများကို ဆက်လက်ဖော်ဆောင်လျက်ရှိသည်။