ဂျန်ဇက် (NSS) - နိုဝင်ဘာ ၁၂

စင်ကာပူတရားရုံးသည် အသက် (၈၆)နှစ်အရွယ်ရှိ အဘွားအိုကို ထိုးကြိတ်ရိုက်နှက်ခဲ့သော မြန်မာနိုင်ငံသားတစ်ဦးကို ထောင်ဒဏ် (၁၃)လ ပြစ်ဒဏ်ချမှတ်လိုက်ကြောင်းသိရသည်။

စင်ကာပူအိမ်ရှင် တစ်ဦးဖြစ်သူ Xue ဆိုသူက မိခင်ဖြစ်သူကို ပြုစုစောင့်ရှောက်ရန်အတွက် အသက် ၃၂နှစ်အရွယ်ရှိ မြန်မာနိုင်ငံသား ဦးဝင်းကြည်ဆိုသူကို ငှားရမ်းခဲ့ကြောင်း၊ အသက် ၈၆ နှစ်အရွယ်ရှိ ၎င်း၏မိခင်ဖြစ်သူသည် ၂၀၂၂ ခုနှစ်ဖေဖော်ဝါရီလတွင် လေဖြတ်သွားခဲ့ပြီး စိတ်ပိုင်းဆိုင်ရာချို့ယွင်းချက်ရှိနေသည့် အတွက် အိပ်ယာပေါ်တွင် နေထိုင်နေရသူဖြစ်ကြောင်း ပြောသည်။ မိခင်ဖြစ်သူလေဖြတ်သွားခဲ့ပြီးနောက်လအနည်းငယ်အကြာတွင် မိခင်ဖြစ်သူကို ပြုစုစောင့်ရှောက်ရန်အတွက် မြန်မာနိုင်ငံသားကို ငှားရမ်းခဲ့ခြင်းဖြစ်သော်လည်း မြန်မာနိုင်ငံသား ဦးဝင်းကြည်သည် မိခင်ဖြစ်သူကို ကိုယ်ထိလက်ရောက်ရိုက်နှက်ညှင်းပန်းမှုများရှိခဲ့ကြောင်း သမီးဖြစ်သူ Xue ကပြောသည်။

မိခင်ဖြစ်သူ၏ ခန္ဒာကိုယ်တွင်ဒဏ်ရာများတွေ့ရှိခဲ့ပြီးနောက် ဦးဝင်းကြည်ကို မေးမြန်းချိန်တွင်လည်းအကြောင်းအမျိုးမျိုးပြသနေခဲ့ကြောင်း၊ မိခင်ဖြစ်သူဒဏ်ရာများရရှိခြင်းနှင့်ပတ်သက်ပြီး CCTV  မှတ်တမ်းများကို ပြန်လည်ကြည့်ရှုခဲ့ရာတွင် ဦးဝင်းကြည်သည် မိခင်ဖြစ်သူကို ထိုးကြိတ်မှုများလုပ်ဆောင်ခဲ့သည်ကိုတွေ့ရှိခဲ့ရပြီးနောက် အမှုဖွင့်တရားစွဲခဲ့ခြင်းဖြစ်ကြောင်း သမီးဖြစ်သူက ပြောသည်။

၎င်းက "ကျွန်မရဲ့အစ်ကိုဖြစ်သူဟာ မိခင်ဖြစ်သူရဲ့ ခန္ဒာကိုယ်မှာမကြာခဏ ဒဏ်ရာတွေ တွေ့မြင်ခဲ့ရပြီးနောက် မိခင်ဖြစ်သူအခန်းအတွင်းတပ်ဆင်ထားတဲ့ CCTV ကို ကြည့်ရှုစစ်ဆေးခဲ့တယ်။ အဲဒီအချိန်မှာ မြန်မာနိုင်ငံသား ဦးဝင်းကြည်ဟာ မိခင်ဖြစ်သူကို ညှင်းပန်းတာမျိုး၊ ထိုးကြိတ်တာမျိုးတွေ မြင်ခဲ့ရတယ်။ ဒါကြောင့် ချက်ချင်းရဲခေါ်ခဲ့တယ်"ဟု ပြောသည်။

စင်ကာပူတရားရုံးသည် မြန်မာနိုင်ငံသားဦးဝင်းကြည်ကို စုံစမ်းစစ်ဆေးခဲ့ရာ ၎င်းကိုယ်တိုင် အပြစ်များကိုဝန်ခံထားကြောင်း ဆိုသည်။ ထို့အတွက်ကြောင့် စင်ကာပူတရားရုံးသည် အဘွားအို၏မျက်နှာကို ထိုးကြိတ်မှုအပါအဝင် ရိုက်နှက်မှုများလုပ်ဆောင်ခဲ့သောမြန်မာနိုင်ငံသား ဦးဝင်းကြည်ကို ထောင်ဒဏ် ၁၃ လ ပြစ်ဒဏ်ချမှတ်ခဲ့ကြောင်းပြောသည်။