ကွမ်းလုံမြို့၌တိုက်ပွဲများ ဆက်လက်ပြင်းထန်၊ နှစ်ပေါင်း(၆၀)နီးပါးသက်တမ်းရှိ ကွမ်းလုံကြိုးတံတား ထိခိုက်ပျက်စီးမှုများဖြစ်ပေါ်
မြူနစ် (NSS) - နိုဝင်ဘာ ၁၂
ရှမ်းပြည်နယ်၊ ကွမ်းလုံမြို့၌ တိုက်ပွဲများ ဆက်လက်ပြင်းထန်လျက်ရှိပြီး နှစ်ပေါင်း (၆၀)နီးပါးသက်တမ်းရှိ ကွမ်းလုံကြိုးတံတား ထိခိုက်ပျက်စီးမှုများရှိခဲ့ကြောင်း သတင်းရရှိသည်။
ကိုးကန့်လက်နက်ကိုင်အဖွဲ့ MNDAA ဦးဆောင်သော ပူးပေါင်းအဖွဲ့များနှင့် တပ်မတော်တို့ကြားတွင် ယနေ့(နိုဝင်ဘာလ ၁၂ ရက်)တွင်လည်း ကွမ်းလုံမြို့၌တိုက်ပွဲများ ဆက်လက်ပြင်းထန်နေကြောင်း သိရသည်။
MNDAA ဦးဆောင်သော ပူးပေါင်းအဖွဲ့များသည် ကွမ်းလုံမြို့ကို ထိန်းချုပ်သိမ်းပိုက်နိုင်ရန်အတွက် အင်အားအလုံးအရင်းနှင့်အတူ Drop ဗုံးများစွာကို အသုံးပြုကာ ဝင်ရောက်တိုက်ခိုက်လျက်ရှိကြောင်း သိရသည်။
ထိုသို့ တိုက်ခိုက်မှုများအတွင်း Drop ဗုံးများ ကျရောက်ပေါက်ကွဲမှုကြောင့် နှစ်ပေါင်း(၆၀)နီးပါးသက်တမ်းရှိ သမိုင်းဝင်ကွမ်းလုံကြိုးတံတားသည် ထိခိုက်ပျက်စီးမှုများ ဖြစ်ပေါ်ခဲ့ကြောင်း ကွမ်းလုံဒေသခံအချို့က NSS ကို ပြောသည်။
“တိုက်ပွဲတွေက ဆက်ဖြစ်နေတုန်းပါပဲ။ ကွမ်းလုံကြိုးတံတား ထိခိုက်ပျက်စီးခဲ့တာက မှန်ပါတယ်။ စိတ်မကောင်းလည်း ဖြစ်ရပါတယ်။ တိုက်ပွဲတွေ အမြန်ရပ်စေချင်ပြီ”ဟု ကွမ်းလုံမြို့ခံတစ်ဦးက ပြောသည်။
ကွမ်းလုံကြိုးတံတားသည် ကွမ်းလုံမြို့အနီး၌ သံလွင်မြစ်ကို ဖြတ်ကျော်ကာ ၁၉၆၄ ခုနှစ်တွင် တည် ဆောက်ခဲ့သော တံတားတစ်စင်းဖြစ်ပြီး နယ်စပ်ကုန်သွယ်ရေးလမ်းကြောင်းတွင် အရေးပါသော တံတားတစ်စင်းဖြစ်ကြောင်း သိရသည်။
လက်ရှိတွင် ကွမ်းလုံကြိုးတံတား၏ သက်တမ်းသည် နှစ်ပေါင်း (၅၉)နှစ်ခန့်ရှိနေပြီဖြစ်ကြောင်း သိရသည်။
အလားတူ ယနေ့ နံနက်ပိုင်းတွင်လည်း ရှမ်းပြည်နယ်၊ သီပေါမြို့နယ်၊ ကျင်သီတံတားအနီးရှိ လုံခြုံရေးစခန်းကို MNDAA ၏ မဟာမိတ် တအာင်းလက်နက်ကိုင်အဖွဲ့ TNLA က ဝင်ရောက်တိုက်ခိုက်ပြီးနောက် ကျင်သီတံတားကို မိုင်းခွဲဖျက်ဆီးသွားခဲ့သည်။
“ဒီတံတားဟာ မန္တလေး-မူဆယ်ပြည်ထောင်လမ်းမကြီးပေါ်မှာရှိတဲ့ တံတားဖြစ်တယ်။ အကြမ်းဖက်သောင်းကျန်းသူများအနေနဲ့ ပြည်သူလူထုရဲ့အသက်အိုးအိမ်စည်းစိမ်၊ ပြည်သူ့လူထုရဲ့ လမ်းပန်းဆက် သွယ်ရေးလမ်းကြောင်းကို အဓိကထားပြီးတော့ ဖောက်ခွဲဖျက်ဆီး တိုက်ခိုက်နေတာဖြစ်ပါတယ်။ ဒီဟာတွေသည် အစိုးရကို တိုက်ခိုက်တာမဟုတ်ပါဘူး။ ပြည်သူကို တိုက်ရိုက်စော်ကား တိုက်ခိုက်တာဖြစ်ပါတယ်”ဟု နစကပြောခွင့်ရ ဗိုလ်ချုပ်ဇော်မင်းထွန်းက တုံ့ပြန်ထားသည်။
MNDAA ဦးဆောင်သော ပူးပေါင်းအဖွဲ့များသည် ကွမ်းလုံမြို့ကို တိုက်ခိုက်နေသည်မှာ တစ်ပတ်ခန့်ကြာမြင့်နေပြီဖြစ်ကာ နှစ်ဖက်ကြားတွင် တိုက်ပွဲများ ဆက်လက်ပြင်းထန်နေကြောင်း သိရသည်။
ယနေ့ ညနေပိုင်းအချိန်တွင် ကိုးကန့်လက်နက်ကိုင်အဖွဲ့ MNDAA က ကွမ်းလုံမြို့ကို အပြီးသတ် သိမ်းပိုက်နိုင်ခဲ့ပြီဖြစ်ကြောင်း ထုတ်ပြန်ထားသည်ကိုလည်း တွေ့ရှိရသည်။
သို့သော် ကွမ်းလုံမြို့ သိမ်းပိုက်ခံရမှုသတင်းနှင့်ပတ်သက်၍ NSS အနေဖြင့် နစက၏ သတင်းထုတ်ပြန်ရေးအဖွဲ့ထံ ဆက်သွယ်ခဲ့သော်လည်း အဆက်အသွယ်မရရှိခဲ့ပေ။
Comments :
0 comments
မကွေးတိုင်းဒေသကြီး၊ စလင်းမြို့နယ်၊ အုတ်ဖိုကန်ကျေးရွာ၊ မင်းဘူး- စလင်းကားလမ်းပေါ်တွင် သစ်ပင်လဲကျမှုဖြစ်ပွား
ဒုဌဝတီမြစ်ကူးကျင်သီတံတားကို TNLA အဖွဲ့ မိုင်းခွဲဖျက်ဆီး၊ ၎င်းလုပ်ရပ်သည် ပြည်သူကို တိုက်ရိုက်စော်ကား တိုက်ခိုက်ခြင်းဖြစ်ဟု နစက တုံ့ပြန်
RELATED POSTS
24 Sep 2024 | နိုင်ငံရေး,နိုင်ငံတကာ
24 Sep 2024 | နိုင်ငံရေး,နိုင်ငံတကာ
24 Sep 2024 | နိုင်ငံရေး,နိုင်ငံတကာ
24 Sep 2024 | နိုင်ငံရေး,နိုင်ငံတကာ