ဂျန်ဇက် (NSS) - နိုဝင်ဘာ ၉

အမေရိကန်နိုင်ငံအနေနဲ့ ယူကရိန်းနိုင်ငံကို ရုရှားနဲ့စေ့စပ်ဆွေးနွေးမှုတွေလုပ်ဖို့ တွန်းအားပေးခြင်းများ မရှိကြောင်း အမေရိကန်နိုင်ငံခြားရေးဝန်ကြီးဌာန ပြောရေးဆိုခွင့်ရှိသူတစ်ဦးကထုတ်ဖော်ပြောဆိုလိုက်ပါတယ်။ 

အမေရိကန်နိုင်ငံဟာ ယူကရိန်းအစိုးရတာဝန်ရှိသူများနဲ့ တံခါးပိတ်ဆွေးနွေးခဲ့ပြီးနောက် ယူကရိန်းကို ရုရှားနဲ့ဆွေးနွေးဖို့ တွန်းအားပေးနေတယ်လို့ သတင်းများ ထွက်ပေါ်လာပြီးနောက် အမေရိကန်နိုင်ငံခြားရေးဝန်ကြီး ဗီဒန့်ပါတယ်လ် က ထုတ်ဖော်ပြောကြားလိုက်တာဖြစ်ပါတယ်။

ယူကရိန်းသမ္မတ ဇီလန်စကီးကိုင်တိုင်ကလည်း ယူကရိန်းကို ကူညီထောက်ပံ့ပေးနေတဲ့ အနောက်အုပ်စုနိုင်ငံအချို့ဟာ ၎င်းတို့ကို ရုရှားနဲ့ စေ့စပ်ဆွေးနွေးရေးလမ်းကြောင်းသွားဖို့လိုလားနေကြောင်း ပြီးခဲ့တဲ့သီတင်းပတ်အတွင်း ပြောခဲ့ဖူးပါတယ်။ 

အမေရိကန်နိုင်ငံခြားရေးဝန်ကြီးဌာန ပြောရေးဆိုခွင့်ရှိသူ ပါတယ်လ်က "ယူကရိန်းနဲ့ ရုရှားကြားစေ့စပ်ဆွေးနွေးမှုတွေဖြစ်လာမှာ မဟုတ်ဘူး။ ရုရှားအစိုးရကိုယ်တိုင်ကလည်း ယူကရိန်းနဲ့စေ့စပ်ဆွေးနွေးဖို့၊ စစ်ပွဲအအဆုံးသတ်ဖို့ စိတ်ဝင်စားမှုမရှိဘူး။ အမေရိကန်အစိုးရကိုယ်တိုင်ကလည်း ယူကရိန်းကို ရုရှားနဲ့စေ့စပ်ဆွေးနွေးဖို့ လုပ်ဆောင်မှာ မဟုတ်ဘူး" လို့ ပြောပါတယ်။ 

ယူကရိန်းသမ္မတဇီလန်စကီးက "အနောက်အုပ်စုနိုင်ငံအချို့ရဲ့ခေါင်းဆောင်တွေရဲ့အကြံပေးတွေ၊ ထောက်လှမ်းရေးအဖွဲ့ခေါင်းဆောင်တွေဟာရုရှားနဲ့ စေ့စပ်ဆွေးနွေးတာမျိုးတွေရှိနေတယ်။ အဲဒီသူတွေဟာ ယူကရိန်းစစ်ပွဲအဆုံးသတ်ရေးအတွက် စီမံခန့်ခွဲမှုလုပ်ဆောင်ဖွယ်ရှိနေပါတယ်" လို့ပြောပါတယ်။ 

ယူကရိန်းသမ္မတက ရုရှားတပ်ဖွဲ့တွေဟာ ၁၉၉၁ ခုနှစ်က သတ်မှတ်ထားတဲ့ ယူကရိန်းပိုင်နက်နယ်မြေအားလုံးက ပြန်မထွက်ဘူးဆိုရင် စေ့စပ်ဆွေးနွေးမှုတွေဖြစ်လာမှာ မဟုတ်ကြောင်း ဆိုပါတယ်။ 

ယူကရိန်းနဲ့ ရုရှားနိုင်ငံကြားစစ်ပွဲဖြစ်ပွားခဲ့ပြီးနောက်ပိုင်း အနောက်အုပ်စုနိုင်ငံတွေဟာ ယူကရိန်းကို စစ်ရေးအကူအညီပေးခဲ့ပေမယ့် ယူကရိန်းဟာ ရုရှားကို နိုင်အောင်တိုက်နိုင်ခြင်းမရှိကြောင်း သိရပါတယ်။

ရုရှားဟာ ယူကရိန်းနဲ့ ဖြစ်ပွားနေတဲ့စစ်ပွဲ ၂ နှစ်နီးပါးအတွင်း  ယူကရိန်းပိုင်နက် နယ်မြေ လေးခုကို ထပ်မံသိမ်းယူခဲ့ကြောင်း သိရပါတယ်။ ရုရှားဟာ ပြီးခဲ့တဲ့ ၂ဝ၁၄ ခုနှစ်တုန်းကလည်း ယူကရိန်းပိုင်နက်ဖြစ်တဲ့ ခရိုင်းမီးယားကျွန်းဆွယ်ကို သိမ်းပိုက်ခဲ့ဖူးပါတယ်။