စော (NSS) - နိုဝင်ဘာ ၅

ဂျပန်-မြန်မာ အောင်ဆန်းသက်မွေးပညာသင်တန်းကျောင်း အပါအဝင် အစိုးရစက်မှုလက်မှုသိပ္ပံကျောင်းပေါင်း (၃ဝ) အတွက် A.G.T.I ပထမနှစ်သင်တန်းသားများ ခေါ်ယူသွားမည်ဖြစ်ကြောင်း သိရသည်။

နည်းပညာ၊ သက်မွေးပညာနှင့် လေ့ကျင့်ရေးဦးစီးဌာနက ယနေ့(နိုဝင်ဘာ ၅ ရက်) တွင် အထက်ပါကဲ့သို့ ထုတ်ပြန်ထားခြင်းဖြစ်သည်။

ဂျပန်-မြန်မာအောင်ဆန်းသက်မွေးပညာသင်တန်းကျောင်း၊ မိုးညှင်း၊ ပူတာအို၊ လွိုင်ကော်၊ ဟားခါး၊ မော်လမြိုင်၊ သံတွဲ၊ အင်းစိန်၊ ရွှေပြည်သာနှင့် သန်လျင်တို့ရှိ အစိုးရစက်မှုလက်မှုသိပ္ပံကျောင်းများတွင်  (၂ဝ၂၃ - ၂ဝ၂၄) ပညာသင်နှစ်အတွက် ပထမနှစ် သင်တန်းသားများ ခေါ်ယူသွားမည်ဖြစ်ကြောင်း သိရသည်။

ထို့ပြင် ပြင်ဦးလွင်၊ မြင်းခြံ၊ ကျောက်ပန်းတောင်း၊ ကျောက်ဆည်၊ မိတ္ထီလာ၊ ရမည်းသင်း၊ ကန့်ဘလူ၊ ခန္တီး၊ ချောက်၊ ရေနံချောင်း၊ သရက် နှင့် မကွေးတို့ရှိ အစိုးရစက်မှုလက်မှုသိပ္ပံကျောင်းများတွင်လည်း ပထမနှစ် သင်တန်းသားများ ခေါ်ယူသွားမည်ဖြစ်ကြောင်း သိရသည်။

အလားတူ လက်ပံတန်း၊ တောင်ငူ၊ ပဲခူး၊ ဝါးခယ်မ၊ လပွတ္တာ၊ ကျိုက်လတ်၊ ထားဝယ်နှင့် နေပြည်တော်စသည့် အစိုးရစက်မှုလက်မှုသိပ္ပံကျောင်းပေါင်း (၃ဝ)ကျောင်းအတွက် ပထမနှစ်သင်တန်းသားများ ခေါ်ယူသွားမည်ဖြစ် ကြောင်း ထုတ်ပြန်ထားသည်။

အဆိုပါ အစိုးရစက်မှုလက်မှုသိပ္ပံကျောင်းများတွင် မြို့ပြအင်ဂျင်နီယာသင်တန်း အီလက်ထရောနစ်အင်ဂျင်နီယာ သင်တန်း၊ လျှပ်စစ်စွမ်းအားအင်ဂျင်နီယာသင်တန်း ၊ စက်မှုအင်ဂျင်နီယာသင်တန်း နှင့် သုတနည်းပညာသင်တန်း တို့တွင် သင်ကြားပို့ချသွားမည်ဖြစ်ကြောင်း သိရသည်။ 

ထို့ပြင် စက်မှုလုပ်ငန်းအင်ဂျင်နီယာသင်တန်း၊ စက်မှုလယ်ယာနည်းပညာသင်တန်း၊ မော်တော်ယာဉ်ပြုပြင် ထိန်းသိမ်းမှု နည်းပညာသင်တန်း နှင့် စက်မှုလုပ်ငန်းဆိုင်ရာ လျှပ်စစ်အင်ဂျင်နီယာသင်တန်း တို့တွင် သင်ကြားပို့ချ သွားမည်ဖြစ်ကြောင်း သိရသည်။

အထက်ပါသင်တန်းများအတွက် သင်တန်းကာလမှာ (၃)နှစ်ဖြစ်ပြီး သတ်မှတ်အရည်အချင်းများပြည့်စုံပါက  B.Tech နှင့် B.E သင်တန်းများသို့ ပေါင်းကူးတက်ရောက်နိုင်ရေးအတွက် လျှောက်ထားနိုင်ကြောင်း သိရသည်။

လျှောက်ထားသူများသည် တက္ကသိုလ်ဝင်ခွင့်စာမေးပွဲတွင် သင်္ချာ၊ ရူပဗေဒ၊ ဓာတုဗေဒဘာသာများပါဝင်သော မည့်သည့်ဘာသာတွဲများဖြင့် အောင်မြင်သူများ လျှောက်ထားနိုင်ကြောင်း သိရသည်။

အဆိုပါဝင်ခွင့်လျှောက်လွှာများကို အစိုးရသိပ္ပံကျောင်းများ၌ နိုဝင်ဘာလ(၁)ရက်မှ စတင်၍ ထုတ်ယူနိုင်ပြီး နိုဝင်ဘာ (၂ဝ)ရက် နောက်ဆုံးထား၍ ပေးပို့ရမည်ဖြစ်ကြောင်း ထုတ်ပြန်ချက်အရ သိရသည်။