NSS - နိုဝင်ဘာ ၅ 

ရှမ်းပြည်နယ်(မြောက်ပိုင်း)တွင် အောက်တိုဘာ ၂၇ ရက်မှစတင်ကာ ဖြစ်ပေါ်လျက်ရှိသော စစ်ရေးပဋိပက္ခဒဏ်ကို ခံစားနေရသောဒေသခံတိုင်းရင်းသားများသည် စစ်သုံ့ပန်းများလောက်မျှအရေးမပါလားဟု ရှမ်းနီတိုင်းရင်းသားများ ညီညွတ်ရေးအစည်းအရုံး (SNUA) က ထုတ်ပြန်မေးခွန်းထုတ်ခဲ့သည်။

အဆိုပါ ထုတ်ပြန်ချက်အား SNUA ၏ အလုပ်အမှုဆောင်အဖွဲ့မှ နိုဝင်ဘာ ၄ ရက်က ထုတ်ပြန်ခဲ့ခြင်းဖြစ်သည်။

စစ်ရေးပဋိပက္ခကြားတွင် ရှမ်းပြည်မြောက်ပိုင်းတွင်နေထိုင်သည့် တိုင်းရင်းသားများမှာ စစ်ဘေးရှောင်များအဖြစ် တိမ်းရှောင်နေရခြင်းအပြင် အိုးအိမ်များ ပျက်စီးခြင်း၊ ခြေလက်အင်္ဂါများ ဆုံးရှုံးခြင်း၊ သေဆုံးခြင်းများ နေ့စဉ်နှင့်အမျှ ရှိနေသည်ဟု ထုတ်ပြန်ချက်၌ ရေးသားထားသည်။

ရှမ်းပြည်မြောက်ပိုင်းရှိ မြို့၊ ရွာများအတွင်း မြောက်ပိုင်းမဟာမိတ်တပ်ဖွဲ့များဦးဆောင်သည့် BPLA, PLA တပ်ဖွဲ့များ နှင့် နစက၏ လုံခြုံရေးတပ်ဖွဲ့တို့၏ တိုက်ပွဲများဖော်ဆောင်ခြင်းသည် အပြည်ပြည်ဆိုင်ရာလူသားချင်းစာနာ ထောက်ထားမှု ဥပဒေ(IHL)၊ အပြည်ပြည်ဆိုင်ရာလူ့အခွင့်အရေးဥပဒေ(IRHL) တို့ကို ချိုးဖောက်ခြင်းဖြစ်၍ အ ပြင်းအထန် ကန့်ကွက်ရှုတ်ချသည်ဟုလည်း ရေးသားထားသည်။

စစ်ပွဲအတွင်းဖမ်းဆီးရမိသည့် စစ်သုံ့ပန်းများကို ဆေးကုပေးခြင်းများ၊ ထိုက်သင့်သည့်ခံစားခွင့်များ ပေးအပ်ခြင်း ရှိသည်ဟု ဖော်ပြထားကြသော်လည်း နေ့စဉ်နှင့်အမျှ ထိခိုက်သေဆုံးလျက်ရှိသည့် ဒေသခံတိုင်းရင်းသားများကိုမူ မည်သည့်အကာအကွယ် နှင့် အကူအညီများမပေး၍ ပြည်သူများသည် စစ်သုံ့ပန်းလောက်မျှ အရေးမပါလားဟု SNUA က မေးခွန်းထုတ်ခဲ့သည်။

လက်ရှိအချိန်၌ မြို့ရွာများတွင် စစ်ဘေးရှောင်ဦးရေ ၅ဝဝဝ ကျော်အထိ ရှိလာခြင်း၊ ကုန်စည်စီးဆင်းမှုလမ်းကြောင်း များ ပြတ်တောက်နေ၍ ကုန်ဈေးနှုန်းများမြင့်တက်ပြီး ဆေးဝါးနှင့်စားနပ် ရိက္ခာများရှားပါးလာနေခြင်းများ ဖြစ်ပွား နေသည်ဟု ထုတ်ပြန်ချက်အရ သိရသည်။

ထို့ကြောင့် စစ်ရေးနှင့်မသက်ဆိုင်သော ဆေးဝါးနှင့်စားနပ်ရိက္ခာလှူဒါန်းခြင်းများရရှိရန် ကူညီကယ်ဆယ်ရေး လမ်းကြောင်းများကို ဖွင့်ပေးကြရန်လည်း SNUA က တောင်းဆိုခဲ့သည်။

ထို့ပြင် စစ်ရေးပဋိပက္ခဖြစ်ပွားရာဒေသများသည် တရုတ်နိုင်ငံမှ ဆောင်ရွက်မည့် BIR လမ်းကြောင်းပေါ်တွင် ဖြစ်ပွား နေခြင်းဖြစ်၍ တရုတ်နိုင်ငံမှ ထိန်းကြောင်းပေးရန်လည်း တောင်းဆိုခဲ့သည်။

ထို့အတူ ရှမ်းပြည်မြောက်ပိုင်းသည် ဂါဇာအသွင်ဖြစ်လာနေ၍ ကုလသမဂ္ဂဆိုင်ရာအဖွဲ့အစည်းများနှင့် ကမ္ဘာ့ ကြက်ခြေနီအဖွဲ့အစည်းများသည် ဂါဇာအရေးအခင်းတွင် လူသားချင်းစာနာထောက်ထားမှုဆိုင်ရာ ညှိနှိုင်းမှုများ၊ ကူညီကယ်ဆယ်ရေးလုပ်ငန်းများ၊ ဆေးဝါး နှင့် စားနပ်ရိက္ခာထောက်ပံ့မှုများ ပေးသကဲ့သို့ ရှမ်းပြည်မြောက်ပိုင်းကို လည်း အလားတူကူညီမှုများ လျင်မြန်စွာပေးအပ်ပေးပါရန်လည်း ရှမ်းနီတိုင်းရင်းသားများညီညွတ်ရေးအ စည်းအရုံး (SNUA) က တောင်းဆိုခဲ့သည်။