ဂျန်ဇက် (NSS) - နိုဝင်ဘာ ၄ 

အစ္စရေးဝန်ကြီးချုပ်နေတန်ရာဟုက ဂါဇာဒေသကိုတိုက်ခိုက်နေတဲ့ တိုက်ခိုက်မှုတွေကို ယာယီရပ်နားဖို့ တောင်းဆိုမှုတွေကို ငြင်းဆန်ပယ်ချလိုက်ကြောင်း သိရပါတယ်။

အမေရိကန်နိုင်ငံခြားရေးဝန်ကြီး အန်တိုနီဘလီကန်ဟာ ပြီးခဲ့တဲ့ရက်ပိုင်းက အစ္စရေးနိုင်ငံကိုထပ်မံရောက်ရှိလာခဲ့ ပြီး လူသားချင်းဆိုင်ရာစာနာမှုအကူအညီပေးမှုတွေ ပိုမိုလုပ်ဆောင်နိုင်ဖို့ ဂါဇာဒေသကို တိုက်ခိုက်နေတာတွေ ရပ်တန့်ဖို့တောင်းဆိုခဲ့တယ်လို့ သိရပါတယ်။ 

အစ္စရေးဝန်ကြီးချုပ်က "ဖမ်းဆီးခံထားရသူတွေ ပြန်မလွှတ်ပေးဘူးဆိုရင် ယာယီအပစ်ခတ်ရပ်စဲရေးဆိုတာ လုပ်မှာ မဟုတ်ဘူး။ ဟားမက်စ်လက်နက်ကိုင်အဖွဲ့တွေအပေါ် အင်အားသုံးတိုက်ခိုက်မှုတွေ ဆက်လက်လုပ်ဆောင်သွား မယ်" လို့ ပြောပါတယ်။ 

အမေရိကန်နိုင်ငံခြားရေးဝန်ကြီးက ဂါဇာဒေသကို ပြီးခဲ့တဲ့တစ်ရက်အတွင်း လူသားချင်းဆိုင်ရာစာနာမှုအကူအညီ ပေးမယ့်ပစ္စည်းတွေတင်ဆောင်လာတဲ့ ကုန်ကားအစီးပေါင်း ၁ဝဝ ကျော် ဝင်ရောက်ခဲ့ကြောင်း၊ ဒါပေမယ့် လုံလောက်မှုမရှိသေးကြောင်း ပြောပါတယ်။ 

အမေရိကန်နိုင်ငံခြားရေးဝန်ကြီးဟာ ဂါဇာဒေသကို လောင်စာဆီ အပါအဝင် လူသားချင်းဆိုင်ရာစာနာမှုအကူအညီ ပေးမှုပစ္စည်းအားလုံး ပေးပို့ကူညီနိုင်အောင် အစ္စရေးအစိုးရကို စည်းရုံးနေကြောင်း သိရပါတယ်။ ဒါပေမယ့် အစ္စရေး ဝန်ကြီးချုပ်က ဂါဇာဒေသကို လောင်စာဆီတွေ ပေးပို့တင်သွင်းတာမျိုးကို လက်ခံမှာ မဟုတ်ကြောင်း ဆိုပါတယ်။

အစ္စရေးဟာ ဟားမက်စ်အဖွဲ့ရဲ့တိုက်ခိုက်မှုတွေကို လက်တုံ့ပြန်တိုက်ခိုက်မှုအဖြစ် ဂါဇာဒေသကို လေကြောင်းက ဗုံးကြဲတိုက်ခိုက်မှုများ ဆက်လက်လုပ်ဆောင်ခဲ့ပြီး အစားအစာ၊ ရေနဲ့ ဆေးဝါးပစ္စည်းများ အပါအဝင် အခြေခံလူသုံး ကုန်ပစ္စည်းများပေးပို့ခြင်းကို ပိတ်ပင်ခဲ့ကြောင်း သိရပါတယ်။

အစ္စရေးနိုင်ငံအနေနဲ့ အရပ်သားတွေထိခိုက်သေဆုံးမှုကို နည်းပါးအောင်လုပ်ဆောင်ရမှာဖြစ်ပေမယ့် ဟားမက်စ်အဖွဲ့ကို အမြစ်ပြတ်ချေမှုန်းရမှာဖြစ်ကြောင်း ပြောပါတယ်။ ဂါဇာဒေသကို တိုက်ခိုက်နေတဲ့ အစ္စရေးနိုင်ငံရဲ့တိုက်ခိုက်မှုတွေကို အဆုံးသတ်ဖို့၊ အပစ်ခတ်ရပ်စဲဖို့ ကုသလမဂ္ဂ အပါအဝင် နိုင်ငံတကာအဖွဲ့အစည်းတွေက တောင်းဆိုလျက်ရှိနေပါတယ်။