ဂျန်ဇက် (NSS) - အောက်တိုဘာ ၂၈ 

ထိုင်းအထူးစုံစမ်းစစ်ရေးရဲတပ်ဖွဲ့ဟာ မြန်မာနိုင်ငံဘက်ခြမ်းကို ခိုးယူထားတဲ့ကားတွေ ရောင်းချပေးနေတဲ့ ထိုင်းနိုင်ငံ အခြေစိုက်ကား သူခိုးဂိုဏ်းကိုဖြိုခွင်းပြီး ဂိုဏ်းခေါင်းဆောင် အပါအဝင် ဂိုဏ်းဝင် ၁၁ ဦးကို ဖမ်းဆီးနိုင်ခဲ့ကြောင်း သိရပါတယ်။

မြန်မာအမျိုးသမီး ဦးဆောင်တဲ့ အဲဒီကား သူခိုးဂိုဏ်းဟာ မလေးရှားနိုင်ငံက ကားတွေကို ခိုးယူပြီး ထိုင်းနိုင်ငံမှာ ကားတွေကို လိုင်စင်နံပတ်ပြားများနဲ့ လိုအပ်တဲ့စာရွက်စာတမ်းများ လုပ်ဆောင်ပြီး မြန်မာနိုင်ငံဘက်ခြမ်းကို ပို့ဆောင်ရောင်းချခဲ့ကြောင်း ထိုင်းရဲတပ်ဖွဲ့က ပြောပါတယ်။ ထိုင်းရဲတပ်ဖွဲ့ဟာ ပြည်နယ်လေးခုရှိ နေရာပေါင်း ၁၂ နေရာကို စီးနင်းခဲ့ပြီး ခိုးယူထားတဲ့ကားတွေ အပါအဝင် ကားသူခိုးဂိုဏ်းခေါင်းဆောင်နဲ့ ဂိုဏ်းဝင်များကို ဖမ်းဆီးရမိခဲ့ ကြောင်း သိရပါတယ်။

ထိုင်းဒုတိယရဲမှူးကြီး  Anusorn " ကားတွေကို မလေးရှားနိုင်ငံဘက်ခြမ်းကနေ ခိုးယူတယ်။ ထိုင်းနိုင်ငံဘက်ခြမ်းကို ပို့တယ်။ ထိုင်းနိုင်ငံအတွင်းမှာကား လိုင်စင်နံပတ်ပြားအတု၊ အခွန်ဆောင်မှုအတု၊ စာရွက်စာတမ်းအတုတွေ လုပ်ခဲ့ ကြတယ်။ ဖမ်းဆီးခံရသူတွေထဲမှာပါဝင်တဲ့ အသက် ၄၁ နှစ်အရွယ်ရှိ Mr. Nikhom Chanta ဟာ ခိုးယူထားတဲ့ကား တွေကို လိုင်စင်နံပတ်ပြားတွေ အတုလုပ်ဖို့ ဦးဆောင်သူဖြစ်တယ်။ သံသယရှိသူ ၁၁ ဦးကို စစ်ဆေးမေးမြန်းခဲ့ပြီး နှစ်ဦးကတော့ ဝန်ခံထားတယ်။ အဲဒီကားသူခိုးဂိုဏ်းဟာ မလေးရှားနိုင်ငံကနေ ကားတွေခိုးယူပြီး ထိုင်းနိုင်ငံကို တစ်ဆင့်ပို့ဆောင်ခဲ့တယ်။ ထိုင်းနိုင်ငံဘက်ခြမ်းမှာ လိုင်စင်နံပတ်ပြား အပါအဝင် လိုအပ်တဲ့စာရွက်စာတမ်းတွေကို အတုလုပ်ပြီး ရောင်းချဖို့ မြန်မာနိုင်ငံဘက်ခြမ်းကို ကားအစီးရေ ၂ဝဝဝ ကျော် ပို့ခဲ့တယ်" လို့ သတင်းစာရှင်းလင်းပွဲ မှာ ထုတ်ဖော်ပြောဆိုထားပါတယ်။ 

အဲဒီကားသူခိုးဂိုဏ်းကို ဦးဆောင်နေတဲ့ ဂိုဏ်းခေါင်းဆောင်ဟာ မြန်မာအမျိုးသမီးတစ်ဦးဖြစ်ပြီး ထိုင်းနိုင်ငံသား မှတ်ပုံတင်ကဒ် ကိုင်ဆောင်ထားသူဖြစ်ကြောင်း ထိုင်းရဲတပ်ဖွဲ့က ပြောပါတယ်။ ထိုင်းရဲတပ်ဖွဲ့ရဲ့အဆိုအရ အဆိုပါ ကားသူခိုးဂိုဏ်းမှာ ပါဝင်နေသူတွေဟာ ထိုင်းနိုင်ငံသားတွေနဲ့ မြန်မာနိုင်ငံသားတွေဖြစ်ကြောင်း သိရပါတယ်။