ဂျန်ဇက် (NSS) - အောက်တိုဘာ ၂၃ 

အမေရိကန်ဟာ အစ္စရေးနိုင်ငံကို စစ်မျက်နှာ နှစ်ခုတိုက်ခိုက်ရမယ့်အခြေအနေမျိုးမလုပ်ဆောင်ဖို့ သတိပေးထားကြောင်း အမေရိကန်အခြေစိုက်နယူးယောက်တိုင်းမ်သတင်းဌာနက ဖော်ပြထားပါတယ်။ 

သမ္မတဂျိုးဘိုင်ဒန်ဦးဆောင်တဲ့ အမေရိကန်အစိုးရအဖွဲ့ဟာ လက်ဘနွန်နိုင်ငံအခြေစိုက် ဟစ်ဘိုလာအဖွဲ့အပေါ် ကြီးမားတဲ့တိုက်ခိုက်မှုတွေမလုပ်ဆောင်ဖို့ အစ္စရေးနိုင်ငံကို ဖျောင်းဖျနိုင်အောင် ကြိုးပမ်းနေကြောင်း သတင်းတွေ ဖော်ပြထားပါတယ်။

ဟစ်ဘိုလာအဖွဲ့ကို တိုက်ခိုက်မယ်ဆိုရင် အစ္စရေးနဲ့ ဟားမက်စ်အဖွဲ့ကြားဖြစ်ပွားနေတဲ့စစ်ပွဲဟာ ဒေသအတွင်း တစ်ခုလုံးကို ကူးစက်ပျံ့နှံ့လာမှာကို စိုးရိမ်မှုမြင့်တက်နေကြောင်း သိရပါတယ်။ အမေရိကန်အစိုးရတာဝန်ရှိသူတွေက အစ္စရေးဟာ ဟားမက်စ်သာမက ဟစ်ဘိုလာအဖွဲ့တွေကို အဓိကထား တိုက်ခိုက်မယ်ဆိုရင်တော့ အစ္စရေးဟာ စစ်မျက်နှာနှစ်ခုမှာ ရုန်းကန်းရဖွယ်ရှိနေကြောင်း သုံးသပ်ထားတယ်လို့ နယူးယောက်တိုင်းမ်သတင်းစာက ဖော်ပြထားပါတယ်။ 

ဒါ့အပြင် အစ္စရေးဟာ အီရန်နိုင်ငံနဲ့အတူ အမေရိကန်နိုင်ငံကိုလည်း စစ်ပွဲထဲ ဆွဲသွင်းမှာကို အမေရိကန်အစိုးရ စိုးရိမ်နေကြောင်း အမေရိကန်သတင်းစာက ထပ်မံဖော်ပြထားပါတယ်။ အီရန်နိုင်ငံဟာ လက်ဘနွန်အခြေစိုက် လက်နက်ကိုင်အဖွဲ့ ဟားမက်စ် နဲ့ လက်ဘနွန်အခြေစိုက် ဟစ်ဘိုလာအဖွဲ့တွေအပြင် အရှေ့အလယ်ပိုင်းဒေသရှိ လက်နက်ကိုင်အဖွဲ့တွေကို နောက်ကွယ်ကနေ အဓိကထားကူညီပေးနေတဲ့နိုင်ငံဖြစ်ကြောင်း သိရပါတယ်။

အမေရိကန်အစိုးရတာဝန်ရှိသူတွေဟာ အီရန်၊ ဟစ်ဘိုလာလက်နက်ကိုင်အဖွဲ့တွေနဲ့ ထိတွေ့ဆက်ဆံနိုင်ဖို့ အာရပ်နိုင်ငံတွေကို ကြားဝင်စေ့စပ်ဆွေးနွေးဖို့ တောင်းဆိုနေကြောင်း သိရပါတယ်။ အမေရိကန်အစိုးရတာဝန်ရှိသူ တွေဟာ အစ္စရေးအစိုးရတာဝန်ရှိသူများနဲ့ တွေ့ဆုံဆွေးနွေးချိန်အတွင်း  ဟစ်ဘိုလာအဖွဲ့တွေကို တိုက်ခိုက်ခြင်းများ၊ မလုပ်ဆောင်ဖို့ နဲ့ စစ်ပွဲထဲမှာ ဟစ်ဘိုလာအဖွဲ့တွေ အလွယ်တကူ ပါဝင်လာခြင်းမျိုးကို ရှောင်ရှားနိုင်အောင် ဂါဇာဒေသတောင်ပိုင်းကို ဖိအားပေးနေခြင်းကို သတိထားဂရုစိုက်ဖို့ တောင်းဆိုခဲ့ကြောင်း သိရပါတယ်။