Pika (NSS) - စက်တင်ဘာ ၁၆

အမေရိကန်နိုင်ငံခြားရေးဝန်ကြီးဌာနသည် MQ-9B ဒရုန်းများတွင် တပ်ဆင်နိုင်သော  ခဲယမ်း မီးကျောက်များနှင့် အခြားစနစ်များကို  ကနေဒါနိုင်ငံသို့ အမေရိကန်ဒေါ်လာ (၃၁၃ ဒသမ ၄)သန်းဖြင့် ရောင်းချပေးရန်  အတည်ပြုလိုက်ပြီဖြစ်ကြောင်း အမေရိကန်စစ်ဌာနချုပ် ပင်တဂွန်က စက်တင်ဘာလ(၁၅)ရက်တွင် ပြောကြားခဲ့သည်။

ပင်တဂွန်က"အဆိုပါရောင်းချမှုတွေကြောင့် ကနေဒါရဲ့ မြောက်ပိုင်းအာတိတ်နယ်မြေတွေမှာ ဒရုန်းတွေနဲ့ စောင့်ကြည့်ခြင်း၊ ကင်းလှည့်ခြင်းတို့ကို လုပ်ဆောင်နိုင်မယ့်အပြင် လက်ရှိနဲ့ အနာ ဂတ်ခြိမ်းခြောက်မှုတွေကို ရင်ဆိုင်နိုင်ဖို့အတွက် ကနေဒါနိုင်ငံရဲ့စစ်ရေးစွမ်းရည်တွေကို မြှင့်တင်ပေးနိုင်ပါလိမ့်မယ်"ဟု ပြောဆိုခဲ့သည်။

အဆိုပါရောင်းချမှုကို အမေရိကန်နိုင်ငံခြားရေးဝန်ကြီးဌာနက အတည်ပြုထားသော်လည်း သဘောတူစာချုပ်တွင် လက်မှတ်ရေးထိုးခြင်း သို့မဟုတ် ဆွေးနွေးခြင်းများနှင့်ပတ်သက်သည့် အချက်အလက်များကို ထုတ်ပြန်ထားခြင်းမျိုးမရှိကြောင်းလည်း သိရသည်။ အဆိုပါရောင်းချမှုတွင် Hellfire II ဒုံးကျည် (၂၁၉) လုံး၊ Mk82 general purpose bombs ဗုံး(၁၂)လုံး၊ Mk82 filled inert bombs(၆)လုံး နှင့် Due Regard Radars တို့ပါဝင်ကြောင်း ပင်တဂွန်က ပြောကြားခဲ့သည်။

အဆိုပါရောင်းချမှုအတွက် အဓိက ကန်ထရိုက်တာသည် General Atomics ကုမ္ပဏီဖြစ် ကြောင်း ပင်တဂွန်ကပြောကြားခဲ့သည်။ ကနေဒါနိုင်ငံသို့ ရောင်းချမည့် လက်နက်ပစ္စည်းများနှင့်ပတ်သက်ပြီး အမေရိကန်လွှတ်တော်ကို စက်တင်ဘာလ(၁၃)ရက်တွင် အကြောင်းကြားခဲ့ကြောင်း ပင်တဂွန်ကပြောကြားခဲ့သည်။