Pearl (NSS) - စက်တင်ဘာ ၁၄

(၈)လအတွင်း ယာဉ်တိုက်မှုပေါင်း (၃၀၀၀)ကျော်ဖြစ်ပွားခဲ့ပြီး  လူ(၁၅၀၀)ကျော် သေဆုံးခဲ့ကြောင်း ပို့ဆောင်ရေး နှင့် ဆက်သွယ်ရေးဝန်ကြီးဌာနမှ ထုတ်ပြန်ထားသည်။ 

၂၀၂၃ ခုနှစ် ၊ ဇန်နဝါရီလမှ သြဂုတ်လအထိ (၈)လအတွင်း တိုင်း/ပြည်နယ်များ နှင့် အမြန်လမ်းတို့၌ ယာဉ်တိုက်မှု ပေါင်း(၃၂၆၂)ကြိမ်ဖြစ်ပွားခဲ့ပြီး သေဆုံးသူ(၁၆၈၇)ဦး နှင့် ဒဏ်ရာရရှိသူ (၄၅၁၅)ဦးရှိကြောင်း သိရသည်။ 

ယာဉ်တိုက်မှုများတွင် ရန်ကုန်တိုင်း၌ အများဆုံးဖြစ်ပွားခဲ့ရာ ယာဉ်တိုက်မှု (၅၆၆)ကြိမ် ၊ သေဆုံးသူ (၂၈၁)ဦးရှိပြီး ဒုတိယအများဆုံးဖြစ်သည့် ဧရာဝတီတိုင်း၌ ယာဉ်တိုက်မှုပေါင်း  (၅၀၆)ကြိမ် နှင့် သေဆုံးသူ (၁၆၆)ဦး ရှိကြောင်း သိရသည်။ 

အလားတူ ရန်ကုန်-မန္တလေးအမြန်လမ်း၌ ယာဉ်တိုက်မှုပေါင်း(၁၀၆)ကြိမ်၊ ထိခိုက်ဒဏ်ရာရရှိသူ(၂၀၆)ဦး နှင့် သေဆုံးသူ(၆၃)ဦးရှိကြောင်း သိရသည်။ 

ယာဉ်တိုက်မှုနှင့်ပတ်သက်၍ "အိပ်ငိုက်တာ၊ ကီလို ၁၀၀ ထက်ကျော်ပြီး သတ်မှတ်နှုန်းအတိုင်း မမောင်းတာကြောင့် ဖြစ်တာများတယ်။ တကယ်ဆို သတ်မှတ်ကီလိုထက် လျှော့မောင်းသင့်ပါတယ်"ဟု အမြန်လမ်းမီးသတ်၏ တာဝန်ရှိသူတစ်ဦးက NSS ကို မှတ်ချက်ပြုပြောကြားထားသည်။

ယခင်နှစ် (၂၀၂၂ခုနှစ်) အလားတူကာလ၌ ယာဉ်တိုက်မှုပေါင်း (၃၉၂၁)ကြိမ်၊ ထိခိုက်ဒဏ်ရာရရှိသူ (၅၃၇၇)ဦး နှင့် သေဆုံးသူ (၁၉၃၆)ဦးရှိကြောင်း ထုတ်ပြန်ချက်အရသိရသည်။ 

ထို့ကြောင့် ယခင်နှစ်၏အလားတူကာလနှင့်နှိုင်းယှဉ်ပါက ယခုနှစ်တွင် ယာဉ်တိုက်မှုအကြိမ်ရေ (၆၅၉)ကြိမ် နှင့် သေဆုံးသူ (၂၄၉)ဦး လျော့နည်းခဲ့ကြောင်း သိရသည်။