NSS - စက်တင်ဘာ ၄

မကွေးတိုင်း၊ ပခုက္ကူမြို့နယ်တွင် လမ်း၌ PDF အဖွဲ့ထောင်ထားသည့် လက်လုပ်မိုင်းတစ်လုံး ပေါက်ကွဲမှုကြောင့် ကျောင်းသို့စာသင်ကြားရန်သွားသည့် ကျောင်းဆရာမတစ်ဦး ထိခိုက်ဒဏ်ရာများရရှိခဲ့ကြောင်း သိရသည်။

ဖြစ်စဉ်မှာ ပြီးခဲ့သည့် စက်တင်ဘာလ ၁ရက်၊ နံနက် ၁၁နာရီ ၁၅မိနစ်အချိန်တွင် ပခုက္ကူမြို့နယ်၊ ရေလာလေးကျေးရွာအနီးတွင် ဖြစ်ပွားခဲ့ကြောင်း မြန်မာနိုင်ငံရဲတပ်ဖွဲ့က သတင်းထုတ်ပြန်ထားသည်။

ထန်းတပင်ကျေးရွာတွင်နေထိုင်သည့် အလယ်တန်းပြဆရာမဒေါ်ခင်မာအေးသည် ၎င်းတာဝန်ထမ်းဆောင်သည့် ရေလာလေးကျေးရွာ အခြေခံပညာမူလတန်း(မူလွန်)ကျောင်းသို့ ဆိုင်ကယ်ဖြင့်သွားစဉ် အခင်းဖြစ်ရာနေရာအရောက်၌ PDF အဖွဲ့ထောင်ထားသည့် လက်လုပ်မိုင်းတစ်လုံး ပေါက်ကွဲခဲ့ကြောင်း သိရသည်။

ထိုသို့ ပေါက်ကွဲမှုကြောင့် ဒေါ်ခင်မာအေး(၅၄)နှစ်၏ ကျော၊ ခါးနှင့် ခြေထောက်တို့တွင် မိုင်းစထိမှန်ဒဏ်ရာများရရှိခဲ့သဖြင့် ဆေးကုသရန် ပခုက္ကူခရိုင်ပြည်သူ့ဆေးရုံကြီးသို့ ပိုဆောင်ထားခဲ့ရကြောင်း သိရသည်။

အထက်ပါ မိုင်းထောင်ဖောက်ခွဲမှုတွင် ပါဝင်ပတ်သက်သူများအား ဖော်ထုတ်ဖမ်းဆီး၍ ဥပဒေနှင့်အညီအပြစ်ပေးအရေးယူနိုင်ရေး လုံခြုံရေးတပ်ဖွဲ့ဝင်များက စုံစမ်းဖော်ထုတ်လျက်ရှိကြောင်း မြန်မာနိုင်ငံရဲတပ်ဖွဲ့က သတင်းထုတ်ပြန်ထားသည်။