မြိုင်မြို့ပေါ်ရှိ ရဲစခန်းကို PDF အဖွဲ့ဝင် အင်အား(၅၀)ခန့်က လာရောက်တိုက်ခိုက်ခဲ့ပြီးနောက် အခြေခံပညာကျောင်းမှ ဆရာ/ဆရာမ (၁၁)ဦးကို ဖမ်းဆီးခေါ်ဆောင်သွား
မြူနစ် (NSS) - စက်တင်ဘာ ၂
မကွေးတိုင်း၊ မြိုင်မြို့ပေါ်ရှိ မြို့မရဲစခန်းကို PDF အဖွဲ့ဝင် အင်အား(၅၀)ခန့်က လာရောက်ပစ်ခတ်တိုက်ခိုက်ခဲ့ပြီးနောက် အခြေခံပညာကျောင်းမှ ဆရာ/ဆရာမ (၁၁)ဦးကို ဖမ်းဆီးခေါ်ဆောင်သွားခဲ့ကြောင်း သတင်းရရှိသည်။
ယနေ့(စက်တင်ဘာလ ၂ ရက်)၊ နံနက် ၈ နာရီခွဲအချိန်တွင် မြိုင်မြို့ပေါ်ရှိ မြို့မရဲစခန်းကို PDF အဖွဲ့ဝင်များက သေနတ်များဖြင့် လာရောက်ပစ်ခတ်တိုက်ခိုက်ခဲ့သည်ဟု မြိုင်မြို့ဒေသခံများက NSS ကိုပြောသည်။
ထိုသို့ လာရောက်ပစ်ခတ်တိုက်ခိုက်စဉ် မြိုင်မြို့မရဲစခန်းရှိ လုံခြုံရေးအဖွဲ့ဝင်များကလည်း ပြန်လည်ပစ်ခတ်တိုက်ခိုက်ခဲ့ပြီး နံနက် ၉ နာရီခွဲအချိန်ခန့်တွင် နှစ်ဖက်အကြား ပစ်ခတ်မှုများရပ်တန့်သွားခဲ့သည်ဟု မြို့ခံများက ပြောသည်။
အဆိုပါပစ်ခတ်မှုဖြစ်စဉ်အတွင်း မြို့မရဲစခန်းဘက်မှ လုံခြုံရေးအဖွဲ့ဝင်များအပါအဝင် မိသားစုဝင်များ ထိခိုက်ဒဏ်ရာရရှိခဲ့ခြင်းမရှိသော်လည်း PDF အဖွဲ့ဝင်များသည် မြို့မအခြေခံပညာအလယ်တန်းကျောင်းခွဲ(၃)၌ ပညာသင်ကြားပေးနေသည့် ဆရာ/ဆရာမ (၁၁)ဦးကို ဖမ်းဆီးခေါ်ဆောင်သွားခဲ့ကြောင်း သိရသည်။
“အကြမ်းဖက်သမားတွေက မနက် ၈ နာရီခွဲလောက်မှာ ရဲစခန်းကို လာတိုက်တာပေါ့။ လူအင်အားက (၅၀)လောက်နဲ့ လာတိုက်တာလို့ သိရတယ်။ ရဲစခန်းကလည်း ပြန်ပစ်တာပေါ့။ အဲဒီမှာ အပြန်အလှန်ပစ်ကြတယ်။ မနက် ၉ နာရီခွဲလောက်မှာတော့ ပစ်တာတွေ ရပ်သွားပြီးတော့ အကြမ်းဖက်တွေက စာသင်ကျောင်းက ဆရာ/ဆရာမတွေကို ဝင်ဖမ်းသွားတာ”ဟု မြိုင်မြို့ခံတစ်ဦးက ပြောသည်။
PDF အဖွဲ့ဝင် (၅၀)ဦးခန့်သည် မြို့မအလကခွဲ(၃)သို့ လာရောက်ကာ ပညာသင်ကြားပေးနေသည့် ဆရာ/ဆရာမ(၁၈)ဦးအနက်(၁၁)ဦးကို အတင်းအဓမ္မဖမ်းဆီးခေါ်ဆောင်သွားခဲ့သည်ဟု မြိုင်မြို့ခံများက ဆက်လက်ပြောသည်။
ထိုသို့ ဖမ်းဆီးခံခဲ့ရသော ဆရာ/ဆရာမ (၁၁)ဦးအနက်တွင် ဦးအောင်ဝင်းနိုင်နှင့် ဦးမြင့်ငွေ ကျောင်းဆရာ(၂)ဦးပါဝင်ခဲ့ပြီး ကျန်ရှိသော (၉)ဦးသည် ဆရာမများဖြစ်ကြောင်း သိရသည်။
ထပ်မံသိရှိရသည့်သတင်းများအရ ယင်းကဲ့သို့ ဖမ်းဆီးခံခဲ့ရသည့် ဆရာ/ဆရာမ (၁၁)ဦးအနက် (၇)ဦးသည် ထွက်ပြေးလွတ်မြောက်သွားခဲ့သည်ဟု ကြားသိရသော်လည်း ကျန်ရှိသည့် (၄)ဦးမှာ ဆက်လက်ဖမ်းဆီးခံထားရကြောင်း မြို့ခံများက ပြောသည်။
မြိုင်မြို့ပေါ်၌ ယနေ့ နံနက်ပိုင်းတွင် အထက်ပါကဲ့သို့ ဖြစ်ပွားခဲ့သည့်အပြင် လူနေအိမ် (၃)လုံးသည်လည်း PDF အဖွဲ့၏ မီးရှို့ ဖျက်ဆီးခြင်းကို ခံခဲ့ရကြောင်း သိရသည်။
PDF ခေါင်းဆောင် စိုးမင်းကို ဦးဆောင်သောအဖွဲ့က မြိုင်မြို့ရဲစခန်းအား ပစ်ခတ်တိုက်ခိုက်ခြင်းနှင့် မြိုင်မြို့မအခြေခံပညာအလယ်တန်းကျောင်းခွဲ(၃)မှ ဆရာ/ဆရာမများကို ဖမ်းဆီးခေါ်ဆောင်သွားခြင်းဖြစ်ကြောင်း မြို့ခံများက ထပ်မံပြောသည်။
Comments :
0 comments
မကွေးတိုင်းဒေသကြီး၊ စလင်းမြို့နယ်၊ အုတ်ဖိုကန်ကျေးရွာ၊ မင်းဘူး- စလင်းကားလမ်းပေါ်တွင် သစ်ပင်လဲကျမှုဖြစ်ပွား
မြောက်ကိုရီးယားက ပင်လယ်ဝါထဲသို့ ခရုဇ်ဒုံးကျည်အများအပြား ထပ်မံစမ်းသပ်ပစ်လွှတ်ခဲ့ဟုဆို
RELATED POSTS
24 Sep 2024 | မှုခင်း,ပြည်တွင်း
24 Sep 2024 | မှုခင်း,နိုင်ငံတကာ
24 Sep 2024 | မှုခင်း,ပြည်တွင်း
24 Sep 2024 | မှုခင်း,ပြည်တွင်း