ဂျန်ဇက် (NSS) - စက်တင်ဘာ ၁

ထိုင်းဘုရင်ဟာ လွတ်ငြိမ်းချမ်းသာခွင့်တောင်းဆိုခဲ့တဲ့ ထိုင်းဝန်ကြီးချုပ်ဟောင်း သက်ဆင်ကို စက်တင်ဘာ ၁ ရက်မှာ ထောင်ဒဏ်လျော့ပေါ့ပေးခဲ့ကြောင်း၊ သက်ဆင်ဟာ ထောင်ဒဏ် ၈ နှစ်ကနေ ၁ နှစ်အထိ ပြစ်ဒဏ်လျော့ပေါ့ပေးခံရကြောင်း ထိုင်းသတင်းတွေက ဖော်ပြပါတယ်။

ထိုင်းဘုရင်နန်းတော်ဟာ သြဂုတ် ၃၁ ရက်က သက်ဆင်ကို ထောင်ဒဏ်လျော့ပေါ့ပေးခဲ့ကြောင်း သတင်းထုတ်ပြန်ခဲ့ခြင်းဖြစ်ပါတယ်။ သက်ဆင်ဟာ ပြည်ပြေးအဖြစ် နှစ်ပေါင်းများစွာကြာ ပြည်ပနိုင်ငံမှာ နေထိုင်ခဲ့ပြီးနောက် ထိုင်းနိုင်ငံကို ပြန်လာခဲ့ပြီးနောက် ၉ ရက်အကြာမှာ ထောင်ဒဏ်လျော့ပေါ့ပေးခံရတာဖြစ်ပြီး ထောင်ဒဏ် တစ်နှစ်သာ ပြစ်ဒဏ်အဖြစ် ကျခံရတော့မှာဖြစ်ကြောင်း သိရပါတယ်။

သက်ဆင်ဟာ ထိုင်းနိုင်ငံကိုပြန်လာခဲ့ပြီးနောက် ဝန်ကြီးချုပ်အဖြစ် တာဝန်ယူချိန်အတွင်း အကျင့်ပျက်လာဘ်စားမှုတွေ၊ အာဏာအလွဲသုံးစားမှုတွေလုပ်ခဲ့တယ်လို့စွပ်စွဲခံရကာ ထောင်ဒဏ် ၈ နှစ်အမိန့်ချမှတ်ခံရပြီး အကျဉ်းထောင်ကို ပို့ဆောင်ခံခဲ့ရကြောင်း သိရပါတယ်။ 

သက်ဆင်ဟာ ထိုင်းအကျဉ်းထောင်မှာ နေထိုင်တဲ့ ၁ရက်တာကာလအတွင်း မှာ နှလုံးရောဂါပြန်ဖြစ်လာတဲ့အတွက်အကျဉ်းထောင်ကနေ ရဲဆေးရုံကို ပို့ဆောင်ခံရပြီး ရဲဆေးရုံမှာ ကုသမှုများခံနေကြောင်းသိရပါတယ်။သက်ဆင်ဟာ ပြီးခဲ့တဲ့ရက်ပိုင်းမှာ ထိုင်းဘုရင်မင်းမြတ်ထံ လွတ်ငြိမ်းချမ်းသာခွင့်ပေးဖို့ တောင်းဆိုလျှောက်ထားမှုတွေလည်းရှိခဲ့ကြောင်းသတင်းတွေထွက်ပေါ်ခဲ့ပါတယ်။သက်ဆင်ဟာ ဝန်ကြီးချုပ်အဖြစ်တာဝန်ယူချိန်အတွင်း ပြည်သူများနဲ့ နိုင်ငံအတွက် အကျိုးစီးပွားများစွာဖြစ်စေမယ့် အလုပ်တွေကို လုပ်ဆောင်ပေးခဲ့ခြင်းအတွက် ထောင်ဒဏ် လျော့ပေါ့ပေးခဲ့ခြင်းဖြစ်ကြောင်း၊ ၎င်းကိုယ်တိုင်ကလည်း အမှားယွင်းတွေလုပ်ဆောင်ခဲ့ကြောင်း ဝန်ခံထားကြောင်း ထိုင်းဘုရင်က ပြောပါတယ်။

သက်ဆင်အနေနဲ့ လက်ရှိအချိန်မှာ အသက်အရွယ်ကြီးရင့်နေပြီး သူရဲ့အတွေ့အကြုံတွေနဲ့ ထိုင်းပြည်သူတွေ၊ ထိုင်း လူ့အဖွဲ့အစည်းနဲ့ နိုင်ငံကို အကူအညီများ ဆက်လက်လုပ်ဆောင်ပေးနိုင်ဖို့ မျှော်လင့်ချက်နဲ့ ပြစ်ဒဏ်ကိုလျော့ပေးခဲ့ခြင်းဖြစ်ကြောင်း ထိုင်းဘုရင်နန်းတော်က သတင်းထုတ်ပြန်ထားပါတယ်။