ယွန်း (NSS) - သြဂုတ် ၂၉

ရှားပါးမျိုးစိပ်ဖြစ်သည့် ဧရာဝတီလင်းပိုင်းများကို ဘတ္ထရီဖြင့် ရှော့တိုက်ဖမ်းဆီးမှုများရှိနေကြောင်း ငါးလုပ်ငန်းဦးစီးဌာနမှ သိရသည်။

ဘတ္ထရီရှော့တိုက်မှုကြောင့် သေဆုံးသည်ဟု ယူဆရသည့် ဧရာဝတီလင်းပိုင်အမတစ်ကောင်ကို ပြီးခဲ့သည့် သြဂုတ်လ(၂၆)ရက်က ညောင်ဦးမြို့နယ်၊ ရွာသာအုပ်စု၊ မြို့လှကျေးရွာအနီးရှိ ကြအို၊ ပျော်ဘွယ်ရိုးပျော်ဘွယ် တင်ဒါနယ်နိမိတ်အတွင်း တွေ့ရှိခဲ့ကြောင်း သိရသည်။

အဆိုပါ ဒေသများသည် လင်းပိုင်များ ကျက်စားရာဒေသမဟုတ်ခြင်းကြောင့် ၎င်းသေဆုံးမှုနှင့် ပတ် သက်၍ သက်ဆိုင်တာဝန်ရှိသူများက စစ်ဆေးမှုများ ဆောင်ရွက်နေကြောင်း ငါးလုပ်ငန်းဦး စီးဌာနမှ သိရသည်။

"ဒဏ်ရာဒဏ်ချက်တော့မတွေ့ဘူး။ ဘတ္ထရီရှော့တိုက်တာလည်းဖြစ်နိုင်သလို အုပ်စုကွဲပြီးတော့ အစာငတ်ပြီးသေတယ်လို့တော့ ဌာနကသုံးသပ်ပြီးတင်ပြလာပါတယ်။ ဘတ္ထရီရှော့တိုက်တာဆိုရင်တော့ လင်းပိုင်တွေက အဲဒီလိုဖြစ်တတ်တယ် ဒဏ်ရာမပါဘူး မူးပြီးတော့ဆုံးသွားတယ် ပြီးတော့ ရေမြောလာတတ်တယ်။ အဆိပ်မိတယ်ဆိုရင်တော့ လျှာတွေမျက်လုံးတွေရဲပြီးတော့ သွေးကြောတွေပေါက်ပြီးသေတယ်။ အခုကတော့ အဲဒီအချက်တွေမရှိတော့ ဘတ္ထရီရှော့တိုက်တာဖြစ်ဖို့များတယ်လို့ သုံးသပ်ပါတယ်"ဟု ငါးလုပ်ငန်းဦးစီးဌာန အမြဲတန်းအတွင်းဝန် ဦးလှထွန်းက NSS ကိုပြောသည်။ 

အဆိုပါ လင်းပိုင်သည် ခန့်မှန်းအားဖြင့် အသက်(၈)နှစ်ခန့်ရှိနိုင်ပြီး သေဆုံးနေသည်မှာ ခြောက်ရက်ခန့်ရှိနေပြီဖြစ်ကြောင်း ဦးလှထွန်းက ဆက်လက်ပြောသည်။

ရေနေနို့တိုက်သတ္တဝါများဖြစ်သည့် ဧရာဝတီလင်းပိုင်များကို ၂၀၂၂ ခုနှစ်တွင် ကောက်ယူရရှိသည့် စာရင်းများအရ တစ်နိုင်ငံလုံးတွင် (၇၆)ကောင်ခန့်သာရှိကြောင်း သိရသည်။

လက်ရှိတွင် ငါးဖမ်းသမားအများစုသည် ဘတ္ထရီအသုံးပြု၍ ဝါယာကြိုးဖြင့် ရေထဲသို့လျှပ်စစ်လွှတ်ပြီး ငါးများကို ဓါတ်လိုက်စေသည့် နည်းဖြင့် ဖမ်းဆီးမှုများကို ဆောင်ရွက်လျက်ရှိ‌ကြောင်း သိရသည်။

ထိုသို့လုပ်ဆောင်မှုများအား သက်ဆိုင်ရာတာဝန်ရှိသူများမှ တားဆီးမှုများ၊ အသိပေးမှုများ လုပ်ဆောင်နေသော်လည်း အချို့ငါးဖမ်းသမားများသည် လိုက်နာခြင်းမရှိဘဲ ဆက်လက်လုပ်ဆောင်မှုများရှိနေကြောင်း သိရသည်။

"တချို့ကလည်း လစ်ရင်လစ်သလိုလုပ်တယ်။ လက်ရှိအချိန်တွေမှာတော့ ပိုဆိုးတာပေါ့။ လုံခြုံရေးအရလည်း safe မဖြစ်တော့ ပြန်ပြီးတော့ လုပ်လာကြပါတယ်။ ဧရာဝတီလင်းပိုင်ဆိုတာ ရှားပါးတော့ ကျွန်တော်တို့ဌာနကတော့ ဆက်ပြီးထိန်းနေပါတယ်။ ရှိတဲ့ဝန်ထမ်းရယ် နိုင်ငံတော်ကပေးတဲ့ဘတ်ဂျက်နဲ့ တတ်နိုင်သရွေ့တော့လုပ်နေပါတယ်။ အဓိကကတော့ သက်ဆိုင်ရာ ငါးဖမ်းသမားတွေက လိုက်နာဖို့ပဲလိုပါတယ်" ဟု ဦးလှထွန်းက အသိပေးပြောကြားထားသည်။

ဧရာဝတီလင်းပိုင်များသည် အများအားဖြင့် ဧရာဝတီမြစ်ကြောတစ်လျှောက်ရှိ အထက်ပိုင်းနေရာများဖြစ် သည့် မန္တလေး၊ စစ်ကိုင်းတိုင်းတို့တွင် အများဆုံးနေထိုင်ကျက်စားကြောင်း သိရသည်။