NSS - သြဂုတ် ၂၆

စစ်ကိုင်းတိုင်း၊ ကန့်ဘလူမြို့နယ်၌ (၅)လောင်းပြိုင် လူသတ်မှုဖြစ်ပွားပြီး နှစ်ပတ်နီးပါးအကြာတွင် အမျိုးသမီးများအပါအဝင် (၅)ဦး ဓါးဖြင့် ထပ်မံခုတ်သတ်ခံခဲ့ရကြောင်း သတင်းရရှိသည်။

ကန့်ဘလူမြို့နယ်၊ ငါးမြောင်ကျေးရွာရှိ အမျိုးသမီး(၃)ဦးနှင့် အမျိုးသား(၂)ဦး စုစုပေါင်း(၅)ဦးသည် ယမန်နေ့(သြဂုတ်လ ၂၅ ရက်)၊ ည ၈ နာရီခွဲအချိန်တွင် လက်နက်ကိုင်အုပ်စု၏ အကြမ်းဖက်သတ်ဖြတ်ခြင်းကို ခံခဲ့ရကြောင်း သိရသည်။

ငါးမြောင်ကျေးရွာအတွင်းသို့ အင်အား(၁၀၀)နီးပါးခန့်ရှိသော လက်နက်ကိုင်အုပ်စု ဝင်ရောက်လာပြီးနောက်ပိုင်းတွင် အထက်ပါလူ(၅)ဦးအား သတ်ဖြတ်သွားခဲ့ခြင်းဖြစ်ကြောင်း ကျေးရွာဒေသခံတစ်ဦးက NSS ကို ပြောသည်။

“မနေ့က ည ၈ နာရီခွဲလောက်မှာ (၅)ယောက်ကို သတ်သွားတာ။ လင်မယားနှစ်ယောက်က တစ်တွဲ၊ ပြီးတော့ နောက်ထပ် (၃)ယောက်က တစ်အိမ်စီမှာ သတ်သွားတာ။ သတ်သွားတာက တကယ့်ကို ရုပ်ပျက်ဆင်းပျက်ကို ဖြစ်လို့။ အမျိုးသမီးတွေဆိုလို့ရှိရင် မျက်နှာတောင် မမှတ်မိဘူး။ ဓါးနဲ့ခုတ်သတ်ထားတာ” ဟု ငါးမြောင်ကျေးရွာခံက ဆက်လက်ပြောသည်။

ထိုသို့ သတ်ဖြတ်ခံရမှုကြောင့် ဒေါ်ခင်စန်းဝင်း (၅၅)နှစ်၊ ဒေါ်သန်းငွေ (၅၅)နှစ်၊ မကြိုင် (၄၆)နှစ်၊ ဦးသန်းဝင်း (၆၅)နှစ် နှင့် ဦးကျော်အေး (၆၅)နှစ်တို့သည် နေရာ၌ပင် သေဆုံးသွားခဲ့ကြောင်း သိရသည်။

“ဒီဘက်တွေမှာ အဲဒီလိုမျိုး လူသတ်မှုတွေက မကြာခဏဆိုသလိုဖြစ်နေတာ။ အေးအေးဆေးဆေးနေချင်တဲ့ လူတွေအတွက်တော့ ဘယ်လိုမှ မလုံခြုံပါဘူး။ ဘယ်သူမှလည်း ထိထိရောက်ရောက်အကာအကွယ်မပေးပါဘူး။ ပစ်တာ၊ ခတ်တာတွေဆိုရင် မကြာမကြာ ဖြစ်တယ်။ တော်တော်လည်း စိတ်ကုန်နေပါပြီ။ အေးအေးချမ်းချမ်းလည်း ရှိစေချင်ပါပြီ” ဟု ကန့်ဘလူမြို့ခံတစ်ဦးကလည်း NSS ကို မှတ်ချက်ပြုထားသည်။

ပြီးခဲ့သော သြဂုတ်လ ၁၃ ရက်တွင်လည်း ကန့်ဘလူမြို့၊ အမှတ်(၂)ရပ်ကွက်ရှိ နေအိမ်ခြံဝန်းတစ်ခုအတွင်း၌ မိသားစုဝင်(၅)ဦး အစုလိုက်အပြုံလိုက် သတ်ဖြတ်ခံခဲ့ရဖူးသည်။

၎င်းမိသားစုဝင်(၅)ဦးသည် မျက်နှာအား အဝတ်စည်းကာ လက်ပြန်ကြိုးတုပ်ပြီးနောက် အကြမ်းဖက်သတ်ဖြတ်ခံခဲ့ရခြင်းဖြစ်သည်။

ထို့ကြောင့် ကန့်ဘလူမြို့နယ်အတွင်း၌ (၅)လောင်းပြိုင် လူသတ်မှုဖြစ်ပွားခဲ့ပြီး (၁၂)ရက်ခန့်အကြာတွင် လူ(၅)ဦး ထပ်မံအကြမ်းဖက်သတ်ဖြတ်ခံခဲ့ရခြင်းလည်း ဖြစ်သည်။

လက်ရှိတွင် နိုင်ငံတော် တာဝန်ရရှိယူထားသည့် နစကအစိုးရအနေဖြင့် အထက်ပါကဲ့သို့ သတ်ဖြတ်မှုများ ဖြစ်ပွားနေမှုအပေါ် ထိရောက်စွာ အကာအကွယ်ပေးနိုင်ခြင်း မရှိသကဲ့သို့ အကြမ်းဖက်သမားများအနေဖြင့်လည်း လက်နက်မဲ့ပြည်သူများကို အကြောင်းအမျိုးမျိုးစွပ်စွဲကာ သတ်ဖြတ်လျက်ရှိသည်။