ယွန်း (NSS) - သြဂုတ် ၂၁

ဒုတိယကမ္ဘာစစ်အတွင်း တိုက်ပွဲဝင်ခဲ့ကြသည့် “မြန်မာ့စစ်သည်တော်မဟာမိတ်များ” အမည်ရှိ အထိမ်းအမှတ်ရုပ်တုကို ရုရှားနိုင်ငံတွင် ဖွင့်လှစ်ခဲ့ကြောင်း နစကမှ သိရသည်။

အဆိုပါ အထိမ်းအမှတ်ရုပ်တုကို ပြီးခဲ့သည့် သြဂုတ်လ(၁၄)ရက်တွင် ရုရှားနိုင်ငံ၊ ရုရှားတပ်မတော်ပင်မဘုရားရှိခိုးကျောင်းတော်ကြီး Main Cathedral of the Armed Forces တည်ရှိရာ မော်စကိုခရိုင်၊ ကူဘင်ဘာမြို့ရှိ မျိုးချစ်ပန်းခြံ Patriot Park အတွင်း၌ ဖွင့်လှစ်ခဲ့ခြင်းဖြစ်သည်။

အဆိုပါ ဖွင့်ပွဲသို့ ကာကွယ်ရေးဝန်ကြီးဌာန၊ ပြည်ထောင်စုဝန်ကြီး ဗိုလ်ချုပ်ကြီး တင်အောင်စန်းနှင့် တာဝန်ရှိသူများ၊ မြန်မာစစ်သံ (ကြည်း၊ ရေ၊ လေ) ဗိုလ်မှူးချုပ် မိုးကျော်နှင့်အဖွဲ့ဝင်များလည်း တက်ရောက်ခဲ့ကြောင်း သိရသည်။ 

၎င်းရုပ်တုကိုစိုက်ထူးခြင်းသည် ယခုနှစ်(၂၀၂၃)တွင် ကျရောက်ခဲ့သည့် ရုရှားနိုင်ငံနှင့် မြန်မာနိုင်ငံအကြား သံတမန်ဆက်ဆံရေး (၇၅)နှစ်ပြည့် အထိမ်းအမှတ်ကို ဂုဏ်ပြုခြင်းဖြစ်ပြီး နှစ်နိုင်ငံချစ်ကြည်ရေးနှင့် ပူးပေါင်းဆောင်ရွက်ရေးတို့ ပိုမိုတောင့်တင်းခိုင်မာလာခြင်းကို ထုတ်ဖော်ပြသခြင်းဖြစ်ကြောင်း သိရသည်။

ထို့ပြင် “မြန်မာ့စစ်သည်တော် မဟာမိတ်များ”အမည်ရှိ အထိမ်းအမှတ်ရုပ်တုကို ဒုတိယကမ္ဘာစစ်အတွင်း ဖက်ဆစ်တော်လှန်ရေးတွင် အသက်စတေးကာပါဝင်တိုက်ပွဲဝင်ခဲ့ကြသော မြန်မာ့တပ်မတော်သားများကို ဂုဏ်ပြုလိုသည့်အတွက် မဟာမိတ်စစ်သည်တော်များ ပြင်ပပြကွက်တွင် စိုက်ထူခဲ့ကြောင်း နစကမှ ထုတ်ပြန်ထားသည်။

၎င်းရုပ်တုကို မော်စကိုမြို့ M.B Grekova အနုပညာစတူဒီယိုမှ ထုဆစ်ပုံဖော်ခဲ့ခြင်းဖြစ်ပြီး ရုရှားနိုင်ငံ ကာ ကွယ်ရေးဝန်ကြီး Army General Sergey Kuzugetovich Shoigu က စတင်အကြံပြုခဲ့ခြင်းဖြစ်ကြောင်း သိရသည်။ 

“မြန်မာစစ်သည်တော် မဟာမိတ်များ” ရုပ်တုကို ရုရှားနိုင်ငံတွင် စိုက်ထူလိုက်ခြင်းသည် နှစ်နိုင်ငံ၏ ယိုင်နဲ့သွားမည်မဟုတ်သည့် ညီရင်း အစ်ကိုပမာ ပူးပေါင်းဆောင်ရွက်တတ်သည့် မဟာမိတ်စိတ်ဓာတ်ကို ဖော် ကျူးနေခြင်းဖြစ်ကြောင်း နစကမှ ဆိုထားသည်။