ရောင်နီ (NSS) - ဩဂုတ် ၁၂

        အမေရိကန်မှာ ပြီးခဲ့တဲ့ ၂၀၂၂ ခုနှစ်ဟာ ကိုယ့်ကိုယ်ကိုသတ်သေတဲ့ လူပေါင်း ၄၉၀၀၀ ထက်မနည်း ရှိခဲ့ပြီး ကိုယ့်ကိုယ်ကို သတ်သေမှု အများဆုံး စံချိန်တင်နှစ်တစ်နှစ် ဖြစ်လာခဲ့တယ်လို့ အစိုးရမှ အသစ်ထုတ်ပြန်တဲ့ အချက်အလက်များအရ ကြာသပတေးနေ့ (သြဂုတ်လ ၁၀ ရက်)မှာ သိရပါတယ်။ 

အမေရိကန် ရောဂါထိန်းချုပ်ရေးနဲ့ကာကွယ်ရေးဗဟိုဌာန(CDC)က နိုင်ငံမှာ ဒုတိယကမ္ဘာစစ်နောက်ပိုင်း အချိန်ကထက် မိမိကိုယ်ကို သတ်သေမှုတွေ ပိုမိုအဖြစ်များလာတယ်လို့ ကြာသပတေးနေ့( သြဂုတ်လ ၁၀ ရက်)မှာ အချက်အလက်တွေနဲ့အတူ ထုတ်ပြန်ခဲ့ပါတယ်။ အမေရိကန်နိုင်ငံမှာ ကိုယ့်ကိုယ်ကို သတ်သေမှုနှုန်းဟာ ၁၉၄၁ ခုနှစ်ကစ ၂၀၁၈ ခုနှစ်အထိ တဖြည်းဖြည်းမြင့်တက်ခဲ့ပြီး ၂၀၁၉ ခုနှစ်နဲ့ ၂၀၂၀ ခုနှစ်မှာ အနည်းငယ်ကျဆင်းခဲ့ပေမယ့် ၂၀၂၁ ခုနှစ်မှာ အနည်းငယ် မြင့်တက်လာရာမှ ၂၀၂၂ မှာတော့ အမြင့်ဆုံးထိ ပြန်လည်မြင့်တက်လာခဲ့ပါတယ်။ 

၂၀၂၂ ခုနှစ်ရဲ့ ကိုယ့်ကိုယ်ကို သတ်သေမှု အရေအတွက်ဟာ ၄၉၄၄၉ ထိခုန်တက်ခဲ့ပြီး ၄င်းရဲ့အရင် ၂၀၂၁ ခုနှစ်နဲ့ နှိုင်းယှဉ်ရင် ၃ ရာခိုင်နှုန်းတိုးလာခဲ့ပါတယ်။ CDC အချက်အလက်များအရ အဆိုပါ သတ်သေမှုအရေအတွက်ထဲမှာ အမျိုးသားတွေက ၇၉ ရာခိုင်နှုန်းအထိ ပါဝင်တယ်လို့ သိရပါတယ်။ သေဆုံးမှုတွေဟာ စိတ်ကျရောဂါအပါအဝင် အကြောင်းအရင်းများစွာကြောင့် ဖြစ်နိုင်တယ်လို့ ကျွမ်းကျင်သူတွေက ဆိုထားပါတယ်။ 

ဒါပေမယ့်လည်း အခုလိုသေဆုံးမှုတွေ တိုးလာရတဲ့ အကြောင်းအရင်းဟာ သေနတ်ကိုင်ဆောင်ခွင့်ပေးထားခြင်းကြောင့်လည်း ဖြစ်နိုင်တယ်လို့ American Foundation for Suicide Prevention ရဲ့ သုတေ သန အကြီးတန်း ဒုတိယဥက္ကဋ္ဌ ဂျေးလ်ဟာကာဗီဖရိုက်မန်က ပြောကြားခဲ့ပါတယ်။ မကြာသေးမီက Johns Hopkins တက္ကသိုလ်မှ ခွဲခြမ်းစိတ်ဖြာမှုတစ်ခုအရ ၂၀၂၂ ခုနှစ်အတွင်းနိုင်ငံမှာ သေနတ်နဲ့ သတ်သေမှုနှုန်းမြင့်မားလာတာတွေ့ရပြီး ပထမဆုံးအကြိမ်အဖြစ် လူမည်းဆယ်ကျော်သက်တွေဟာ လူဖြူဆယ်ကျော်သက်တွေထက် သေနတ်နဲ့ သတ်သေမှုနှုန်း ပိုများတာကို သုတေသီများက တွေ့ရှိခဲ့ပါတယ်။       

သေဆုံးမှု အလုံးစုံမှာ သက်ကြီးရွယ်အိုတွေကြား (အသက် ၆၅ နှစ်အထက်) သေဆုံးမှုက အမြင့်ဆုံး ၈ ရာခိုင်နှုန်းထိ တိုးလာပြီး လူလတ်ပိုင်း (အသက် ၄၅ နှစ်မှ ၆၄ နှစ်ကြား)မှာတော့ သေဆုံးမှု ၇ ရာခိုင်နှုန်းထိ တိုးလာခဲ့ပါတယ်။ လူလတ်ပိုင်းနဲ့ သက်ကြီးရွယ်အိုတွေဟာ အလုပ်အကိုင် ဆုံးရှုံးခြင်း၊ အိမ်ထောင် ဖက်ဆုံးရှုံးခြင်းလို ပြဿနာတွေ ကြုံတွေ့နေရပြီး ဒီပြဿနာကို ဖြေရှင်းဖို့ ၄င်းတို့ကို လျှော့ချဖို့ အရေးကြီးတယ်လို့ CDC က ပြောကြားပါတယ်။ အဆိုးထဲက အကောင်းအနေနဲ့ အသက် ၁၀ နှစ်မှ ၂၄ နှစ်ကြား လူငယ်တွေကြားမှာတော့ ကိုယ့်ကိုယ်ကိုယ်သတ် သေဆုံးမှု ၈ ရာခိုင်နှုန်းကျော် လျော့နည်းလာခဲ့တယ်လို့ သိရပါတယ်။