NSS - ဩဂုတ် ၁၁

မကွေးတိုင်း၊ ပခုက္ကူမြို့နယ်တွင် အုပ်ချုပ်ရေးမှူးတစ်ဦးကို PDF အဖွဲ့မှ သေနတ်ဖြင့်ပစ်သတ်၍ Light Truck ကားတစ်စီး၊ ဖုန်း(၂)လုံးနှင့်အတူ အမျိုးသမီးတစ်ဦးအား ဖမ်းဆီးခေါ်ဆောင်သွားခဲ့ကြောင်း သိရသည်။

အဆိုပါဖြစ်စဉ်မှာ ပြီးခဲ့သော ဩဂုတ်လ ၈ ရက်၊ မွန်းလွဲ ၁နာရီ ၄၅မိနစ်အချိန်တွင် ပခုက္ကူမြို့နယ်၊ ကျွဲတဲကျေးရွာအုပ်စု အောင်ချမ်းသာကွက်သစ်၌ ဖြစ်ပွားခဲ့ကြောင်း  ရဲတပ်ဖွဲ့မှထုတ်ပြန်ထားသည်။

ကျွဲတဲကျေးရွာအုပ်ချုပ်ရေးမှူးဖြစ်သူ ဦးခင်မောင်အေးသည် ၎င်း၏နေအိမ်၌ရှိနေစဉ် အမျိုးသား(၄)ဦးနှင့် အမျိုးသမီးတစ်ဦးပါဝင်သည့် PDF အဖွဲ့သည် ဆိုင်ကယ်(၃)စီးဖြင့်ရောက်ရှိလာပြီး သေနတ်ဖြင့် ပစ်သတ် ၍ လက်ကိုင်ဖုန်း(၂)လုံးအား လုယက်ယူဆောင်သွားခဲ့ကြောင်း သိရသည်။

ထိုသို့ သေနတ်ဖြင့် ပစ်ခတ်ခံရမှုကြောင့် ကျွဲတဲကျေးရွာအုပ်ချုပ်ရေးမှူးဖြစ်သူ ဦးခင်မောင်အေး(၆၂)နှစ်၏ နဖူးတွင် ကျည်ဖောက်ဝင်ဒဏ်ရာ(၂)ချက်ရရှိကာ အခင်းဖြစ်ပွားရာနေရာ၌ သေဆုံးသွားခဲ့ကြောင်း ရဲတပ်ဖွဲ့မှ ထုတ်ပြန်ထားသည်။

ထို့နောက် သေဆုံးသူဦးခင်မောင်အေးနေအိမ်၏တောင်ဘက်တွင်ရှိသော နေအိမ်သို့ ထပ်မံဝင်ရောက်ကာ ဦးသိန်းတင့်ထွန်းနှင့် ၎င်း၏ဇနီးဖြစ်သူ ဒေါ်နွယ်နွယ်မြင့်တို့အား သေနတ်ဖြင့်ခြိမ်းခြောက်ခဲ့ကြောင်း သိရသည်။

ထိုသို့ခြိမ်း‌ခြောက်ပြီးနောက် ဦးသိန်းတင့်ထွန်းပိုင်ဆိုင်သည့် Light Truck ကားတစ်စီးနှင့် ဖုန်းတစ်လုံးအား လုယက်ယူဆောင်သွားပြီး ဒေါ်နွယ်နွယ်မြင့်အားဖမ်းဆီးခေါ်ဆောင်သွားခဲ့ကြောင်း သိရသည်။

အထက်ပါဖြစ်စဉ်တွင် ပါဝင်ပတ်သက်သူများအား ဖော်ထုတ်ဖမ်းဆီး၍ ဥပဒေနှင့်အညီအပြစ်ပေး အရေး ယူနိုင်ရေး လုံခြုံရေးတပ်ဖွဲ့ဝင်များက ဆက်လက်လုပ်ဆောင်လျက်ရှိကြောင်း မြန်မာနိုင်ငံရဲတပ်ဖွဲ့က သတင်းထုတ်ပြန်ထားသည်။