ဂျန်ဇက် (NSS) - သြဂုတ် ၃

ထိုင်းဖွဲ့စည်းပုံအခြေခံဥပဒေခုံရုံးဟာ Move Forward ပါတီခေါင်းဆောင် ပီတလင်ဂျာရိုအမ်ရက်ကို ဝန်ကြီးချုပ် လောင်းအဖြစ် ထပ်မံအမည်စာရင်းတင်သွင်းခြင်းကိုပယ်ချခဲ့တဲ့ လွှတ်တော်ရဲ့လုပ်ရပ်နဲ့ပတ်သက်ပြီး ombudsmen ရုံးရဲ့တိုင်တန်းချက်များကို လက်ခံစဉ်းစားဖို့ သင့်/မသင့် ဆိုတဲ့အချက်ကို အပြီးသတ်ဆုံးဖြတ်မယ့်အစီအစဉ်ကို ရွှေ့ဆိုင်းလိုက်ကြောင်း သြဂုတ် ၃ ရက်မှာ သတင်းထုတ်ပြန်လိုက်ပါတယ်။

ထိုင်းအစိုးရက ခန့်အပ်ထားတဲ့ အစိုးရဌာနများအပေါ် မကျေနပ်ချက်များစုံစမ်းတင်ပြရေးရုံး Ombudsman Office က ပြီးခဲ့တဲ့လအတွင်း ကျင်းပခဲ့တဲ့ ဝန်ကြီးချုပ်လောင်းရွေးချယ်ပွဲ ဒုတိယအကျော့မှာ ရှေ့သို့ချီပါတီခေါင်းဆောင် ပီတကို ဝန်ကြီးချုပ်လောင်းအဖြစ် ထပ်မံအမည်စာရင်းတင်သွင်းခဲ့ခြင်းကို လွှတ်တော်က ငြင်းပယ်ခြင်းနဲ့ပတ်သက် ပြီး ပြည်သူများ မကျေနပ်မှုများရှိနေတဲ့အတွက် စုံစမ်းစစ်ဆေးပေးဖို့ ဖွဲ့စည်းပုံအခြေခံဥပဒေခုံရုံးကို တင်ပြထား ကြောင်း သိရပါတယ်။

ဖွဲ့စည်းပုံအခြေခံဥပဒေခုံရုံးဟာ အဆိုပါကိစ္စနဲ့ပတ်သက်ပြီး သြဂုတ် ၁၆ ရက်မှာ တွေ့ဆုံဆွေးနွေးဖွယ်ရှိနေပြီး Ombudsman Office  ရုံးရဲ့တင်ပြချက်များကို လက်ခံစစ်ဆေးပေးဖို့ သင့်/မသင့်ကို စဉ်းစားသွားဖွယ်ရှိနေကြောင်း သိရပါတယ်။ 

ဖွဲ့စည်းပုံအခြေခံဥပဒေခုံရုံးက အဆိုပါအမှုကိုဆုံးဖြတ်ပြီးချိန်မှ ဝန်ကြီးချုပ်အသစ်ရွေးချယ်ပွဲကို ကျင်းပမှာဖြစ်တဲ့အတွက် သြဂုတ်လ ၄ ရက်မှာ ဝန်ကြီးချုပ်အသစ်ရွေးချယ်ပွဲကျင်းပမယ်လို့ ထိုင်းအောက်လွှတ်တော်ဥက္ကဋ္ဌ က အဲဒီအချိန်တုန်းက ကြေညာခဲ့ဖူးပါတယ်။ ထိုင်းအောက်လွှတ်တော်ဥက္ကဋ္ဌ Wan Muhammad Noor Matha ဟာ ဝန်ကြီးချုပ်ရွေးချယ်ပွဲကျင်းပမယ်ဆိုရင် ထိုင်းဖွဲ့စည်းပုံအခြေခံဥပဒေခုံရုံး ဆုံးဖြတ်ချက်နဲ့ ဆန့်ကျင်ဘက်ဖြစ်နေမှာ စိုးရိမ်တဲ့အတွက် ဝန်ကြီးချုပ်ရွေးချယ်ပွဲကို ရွှေဆိုင်းခဲ့ခြင်းဖြစ်ကြောင်း ဆိုခဲ့ဖူးပါတယ်။ 

လက်ရှိအချိန်မှာ ထိုင်းဖွဲ့စည်းပုံအခြေခံဥပဒေခုံရုံးဟာ Ombudsman Office ရုံးရဲ့တင်ပြချက်များကို လက်ခံ စဉ်းစားဖို့ သင့်/မသင့် ဆိုတဲ့အချက်ကို ဆုံးဖြတ်ဖို့ အချိန်ထပ်မံရွှေဆိုင်းခဲ့ရာ ထိုင်းအောက်လွှတ်တော်ဥက္ကဋ္ဌအနေနဲ့ ဝန်ကြီးချုပ်အသစ်ရွေးချယ်ပွဲကို ထပ်မံရွှေ့ဆိုင်းခြင်း ရှိ/မရှိ ဆိုတဲ့အချက်ကို သတင်းထုတ်ပြန်ခြင်းမျိုး မရှိသေး ကြောင်း သိရပါတယ်။