NSS - ဩဂုတ် ၂

ဒေါ်အောင်ဆန်းစုကြည်နှင့် ဦးဝင်းမြင့်တိုအပေါ် ပြစ်ဒဏ်လျှော့ပေါ့သက်သာခွင့်ပြုခြင်းသည် အပြုသဘောဆောင်ကြောင်း လူ့အခွင့်အရေးကော်မရှင်က ဩဂုတ်လ ၁ ရက်တွင် ထုတ်ပြန် ကြေညာခဲ့သည်။

နစက ဥက္ကဋ္ဌက ဩဂုတ်လ ၁ ရက်၊ ဒုတိယဝါဆိုလပြည့်နေ့၊ ဓမ္မစကြာအခါတော်နေ့တွင် ဒေါ်အောင်ဆန်းစုကြည်နှင့် ဦးဝင်းမြင့်တို့အပါအဝင် အကျဉ်းထောင်အသီးသီးတွင် ပြစ်ဒဏ်ကျခံနေသည့် အကျဉ်းသား၊ အကျဉ်းသူ (၈ဝဝဝ) နီးပါးကို ပြစ်ဒဏ်လျှော့ပေါ့ လွတ်ငြိမ်းသက်သာ ခွင့်များ ပြုခဲ့ခြင်းဖြစ်သည်။

ထို့ပြင် ပြစ်ဒဏ်ကျခံလျက်ရှိသည့် တိုင်းရင်းသားလက်နက်ကိုင်အဖွဲ့ဝင် ၂၂ ဦးအား ပြစ်ဒဏ်မှ လွတ်ငြိမ်းခွင့်ပြုခြင်း၊ နိုင်ငံခြားသား အကျဉ်းသား/သူ ၁၂၅ ဦးအား ပြစ်ဒဏ်များလျှော့ပေါ့ပြီး ပြစ်ဒဏ်လွတ်ငြိမ်းခွင့်ပြု၍ ပြည်နှင်ဒဏ်ပေးခြင်းနှင့် တရားရုံးအသီးသီးတွင် တရားစွဲဆိုထားဆဲဖြစ်သည့် တိုင်းရင်းသားလက်နက်ကိုင် အဖွဲဝင်များ နှင့် ဆက်စပ်သူ ၇၂ ဦး၏ တရား ရုံးစစ်ဆေးဆဲပြစ်မှုဆိုင်ရာအမှုများကိုလည်း ပိတ်သိမ်း၍ အမှုမှလွှတ်ခြင်းတို့ကို ဆောင်ရွက်ခဲ့သည်။

အဆိုပါ ပြစ်ဒဏ်လျှော့ပေါ့ လွတ်ငြိမ်းခွင့်များနှင့်ပတ်သက်၍ မြန်မာနိုင်ငံအမျိုးသားလူ့အခွင့်အရေးကော်မရှင်က ဒေါ်အောင်ဆန်းစုကြည်နှင့် ဦးဝင်းမြင့်တို့ကို အမိန့်အမှတ် ၄၈/ ၂၀၂၃ နှင့် ၄၉/ ၂၀၂၃ တိုအရ ပြစ်ဒဏ်လွတ်ငြိမ်း သက်သာခွင့်ပြုခြင်းသည် အပြုသဘောဆောင်ကြောင်း၊ နိုင်ငံခြားသား အကျဉ်းသား/ သူ ၁၂၅ ဦးကို ပြစ်ဒဏ်များလျှော့ပေါ့ပြီး လွတ်ငြိမ်းခွင့်ပြုခြင်းသည် နိုင်ငံအချင်းချင်း မိတ်ဝတ်မပျက်ဆက်ဆံရေးကို မြှင့်တင် ဆောင်ရွက်ရာ ရောက်သည်ဟု ရှုမြင်ကြောင်း ထုတ်ပြန်ချက်တွင် ရေးသားထားသည်။

ယင်းကဲ့သို့ ဆောင်ရွက်မှုများသည် နစက၏ လူ့အခွင့်အရေးဆိုင်ရာ အပြုသဘောဆောင်သည့် လုပ်ဆောင်ချက်ဖြစ်သည့်အပြင် လူသားချင်းစာနာထောက်ထားမှုကိုလည်း အလေး ထားရာရောက်ပြီး တိုင်းရင်းသားစည်းလုံးညီညွတ်ရေးနှင့် ပြည်တွင်းငြိမ်းချမ်းရေးကို အထောက်အပံ့ဖြစ်စေသည်ဟုလည်း အသိပေးထားသည်။ 

ပြစ်ဒဏ်လွတ်ငြိမ်းခွင့်နှင့် ပြစ်ဒဏ်သက်သာခွင့်ရရှိသူများသည် မိသားစုဝင်များနှင့် ပြန်လည်ပေါင်းစည်းခွင့်ရကြမည်ဖြစ်သကဲ့သို့ နိုင်ငံတော်၏စေတနာကို အလေးထားပြီး ဒီမိုကရေစီနှင့် ဖက်ဒရယ်စနစ်ကိုအခြေခံသည့် ပြည်ထောင်စုတည်ဆောက်ရေးတွင်လည်း ဥပဒေဘောင်အတွင်းမှ ပါဝင်ဆောင်ရွက်နိုင်မည်ဟု ကော်မရှင်အနေဖြင့် ယုံကြည်ကြောင်းလည်း ထည့်သွင်းထုတ်ပြန်ထားသည်။