မျိုးကြီး (NSS) - သြဂုတ် ၂

NCA ရေးထိုးထားသည့်အဖွဲ့များအနက် လက်နက်ကိုင်(၃)ဖွဲ့သည် တိုင်းပြည်တည်ငြိမ်အေးချမ်းရေးကို အချိန်မရွေးဖျက်ဆီးလာနိုင်ကြောင်း တပ်မတော်ကာကွယ်ရေးဦးစီးချုပ်က ပြောသည်။

တပ်မတော်ကာကွယ်ရေးဦးစီးချုပ် ဗိုလ်ချုပ်မှူးကြီးမင်းအောင်လှိုင်က ယခုရက်ပိုင်းအတွင်း နေပြည်တော်၌ ကျင်းပသည့် အမျိုးသားကာကွယ်ရေးနှင့်လုံခြုံရေးကောင်စီအစည်းအဝေးတွင် အထက်ပါကဲ့သို့ သတိပေးပြောကြားခဲ့ခြင်းဖြစ်သည်။

တစ်နိုင်ငံလုံးပစ်ခတ်တိုက်ခိုက်မှုရပ်စဲရေး သဘောတူစာချုပ် (NCA)သည် အစိုးရနှင့် EAO များအကြား၊ နိုင်ငံတကာအဖွဲ့အစည်းများအကြားထားရှိခဲ့သော ကတိကဝတ်များပင်ဖြစ် ကြောင်း တပ်မတော်ကာကွယ်ရေးဦးစီးချုပ်က ပြောသည်။

ဒုတိယဗိုလ်ချုပ်ကြီးရာပြည့် ဦးဆောင်သော အမျိုးသားစည်းလုံးညီညွတ်ရေးနှင့် ငြိမ်းချမ်းရေးဖော်ဆောင်မှုညှိနှိုင်းရေးကော်မတီ(NSPNC)သည် ယခု ၂၀၂၃ ခုနှစ် ဖေဖော်ဝါရီလ ၁ ရက်မှ ဇူလိုင်လ ၂၇ ရက်အထိ NCA လက်မှတ်ရေးထိုးထားသော အဖွဲ့ (၇)ဖွဲ့၊ ရေးထိုးခြင်းမရှိသေးသည့်အဖွဲ့ (၃)ဖွဲ့တို့နှင့် ဆွေးနွေးမှုပေါင်း (၂၂)ကြိမ်ပြုလုပ်ခဲ့ကြောင်း သိရသည်။

NCA လက်မှတ်ရေးထိုးထားသည့် လက်နက်ကိုင်အဖွဲ့များအနက် KNU/KNLA-PC၊ PNLO၊ DKBA၊ LDU၊ ALP၊ NMSP နှင့် RCSS အဖွဲ့တို့သည် နစကနှင့် ငြိမ်းချမ်းရေးတွေ့ဆုံဆွေးနွေးလျက်ရှိသည်။ 

သို့သော် NCA ရေးထိုးသည့် ကရင်အမျိုးသားအစည်းအရုံး(KNU)၊ ချင်းအမျိုးသားတပ်ဦး (CNF)နှင့် မြန်မာနိုင်ငံလုံးဆိုင်ရာ ကျောင်းသားများဒီမိုကရက်တစ်တပ်ဦး(ABSDF) လက်နက်ကိုင်အဖွဲ့တို့သည် နစကနှင့် တွေ့ဆုံဆွေးနွေးခြင်းမရှိသည့်အပြင် တပ်မတော်နှင့် ထိတွေ့တိုက်ပွဲများ ဖြစ်ပွားလျက်ရှိသည်။

NCA လက်မှတ်ရေးထိုးထားသည့်အဖွဲ့များအနက် လက်နက်ကိုင်အဖွဲ့(၃)ဖွဲ့သည် အကြောင်း ပြချက်အချို့နှင့် ငြိမ်းချမ်းရေး ဆွေးနွေးပွဲများတွင် ပါဝင်တက်ရောက်ဆွေးနွေးမှု မရှိကြောင်းတွေ့ရှိရသည်ဟု ဗိုလ်ချုပ်မှူးကြီးမင်းအောင်လှိုင်က ကာလုံအစည်းအဝေး၌ ထည့်သွင်းပြောကြားခဲ့သည်။

၎င်းအဖွဲ့များအနေဖြင့် တိုင်းပြည်၏ တည်ငြိမ်အေးချမ်းရေးကို အချိန်မရွေးနှောင့်ယှက်ဖျက်ဆီးမှုများ ဆောင်ရွက်လာနိုင်သည်ကိုလည်း သတိပြုမိစေလိုကြောင်းနှင့် လက်ရှိတွင်လည်း ၎င်းအဖွဲ့များသည် အကြမ်းဖက်တိုက်ခိုက်မှုများ ဆောင်ရွက်နေကြောင်း တပ်ချုပ်က ပြောသည်။

ထို့ပြင် ငြိမ်းချမ်းရေးဆွေးနွေးမှုတိုင်း၌ တက်ရောက်ဆွေးနွေးခဲ့သော အဖွဲ့များ၏ လိုလား ချက်၊ ဆွေးနွေးချက်၊ ဆုံးဖြတ်ချက်များကိုလည်း စနစ်တကျစုစည်းထားရှိကာ ငြိမ်းချမ်းရေးလုပ်ငန်းစဉ်ကို အရှိန်မပျက်ဆောင်ရွက်နိုင်ရန် စီစဉ်ထားကြောင်း သိရသည်။

မြန်မာနိုင်ငံတွင် နေထိုင်သော တိုင်းရင်းသားများအနေဖြင့် ဆန္ဒနှင့်လိုလားချက်များကို လက်နက်ကိုင်တောင်းဆိုနေ၍ မရဘဲ ဒီမိုကရေစီစံနှုန်းနှင့်အညီ ပေါင်းစပ်ညှိနှိုင်းကာ ဆွေးနွေးဆုံးဖြတ်ဆောင်ရွက်သွားရမည်ဟု တပ်ချုပ်က ပြောသည်။

မြန်မာနိုင်ငံ ငြိမ်းချမ်းကာ ဖွံ့ဖြိုးတိုးတက်စေလိုသော စိတ်ဆန္ဒရှိသည့် တိုင်းရင်းသားလက်နက်ကိုင်အဖွဲ့အစည်းများကို ငြိမ်းချမ်းရေးဆွေးနွေးရန် အစဉ်အမြဲတံခါးဖွင့်ထားသည်ဟုလည်း ၎င်းက ထပ်မံဖိတ်ခေါ်ခဲ့သည်။