NSS - ဇူလိုင် ၁၆

မကွေးတိုင်း၊ ပခုက္ကူခရိုင်၊ ရေစကြိုမြို့နယ်၊ ဂွေးချိုရွာမှ ဒေသခံ(၅)ဦးနှင့် ကားတစ်စီးကို PDF မှ ဖမ်းဆီးသွားပြီးနောက် ယနေ့အထိ အဆက်သွယ်ပြတ်တောက်နေ၍ မိသားစုဝင်များက စိုးရိမ်နေကြောင်း သိရသည်။

ဂွေးချိုရွာတွင် နေထိုင်သော အမျိုးသား(၃)ဦးနှင့် အမျိုးသမီး(၂ဝ)ဦးတို့သည် ၎င်းတို့ရွာအနီးရှိ မြေဖြူရွာမှ ကားတစ်စီးကို ငှားရမ်းကာ ပြီးခဲ့သော ဇူလိုင်လ ၁၁ ရက်တွင် ပခုက္ကူမြို့ပေါ်သို့ ဈေးဝယ်သွားခဲ့ကြောင်း ဒေသခံများက NP News ကို ပြောသည်။

“ညနေ ၃ နာရီလောက်မှာ ပခုက္ကူမြို့ကနေ ဈေးဝယ်ပြီးပြန်လာတာပေါ့။ ဈေးဝယ်သွားတာ အကုန်လုံးက ကျွန်တော်တို့ ဂွေးချိုရွာက လူတွေချည်းပဲ။ ပြန်လာတော့ ကျောက်လှေခါးရွာလမ်းဆုံရဲ့ အနားမှ တိုးဂိတ်အဆောက်အဦးရှိတယ်။ အဲဒီတိုးဂိတ်နားမှာ PDF (၂၀)လောက်က ကားကို တားပြီးတော့ ကားပေါ်မှာပါတဲ့သူတွေကို အကုန်ဆင်းခိုင်းတယ်။ ပြီးတော့ ယောကျာ်လေးတွေကို ကားပေါ်ကို အကုန်ပြန်တက်ခိုင်းတယ်။ အဲဒီမှာ ဂွေးချိုရွာ အမျိုးသား(၃)ယောက်နဲ့ မြေဖြူရွာက ကားသမား(၁)ယောက် ကားပေါ်ပြန်တက်ရတယ်။ နောက်တစ်ခါ အမျိုးသမီးတစ်ယောက်က ကားပေါ်မှာ သူ့ပစ္စည်းယူစရာရှိလို့ တက်ယူနေတဲ့အချိန်မှာ ပြန်အဆင်းမခံတော့ဘဲ မောင်းထွက်သွားတယ်”ဟု ဒေသခံတစ်ဦးက ပြောသည်။

ထိုသို့ ဖမ်းဆီးခေါ်ဆောင်ခြင်းခံခဲ့ရသူများသည် မြေဖြူရွာမှ ယာဉ်မောင်း ကိုရဲမင်းဇော်၊ ဂွေးချိုရွာမှ ဦးတင့်၊ ဦးရဲလွင်၊ ကိုမင်းသူ နှင့် ဒေါ်အေးကြင်မော်တို့ဖြစ်ကြောင်း ဒေသခံများက ပြောသည်။

“ကားသမားအပါအဝင် ယောကျာ်းလေး(၄)ယောက်နဲ့ မိန်းကလေးတစ်ယောက် စုစုပေါင်း (၅)ယောက်ပါသွားတယ်။ အဲဒီမှာ သူတို့မှာပါတဲ့ ငွေကြေးတွေလည်း ပါသွားတယ်။ ဆန်တွေ၊ ဆီတွေလည်းပါသွားတယ်။ ဂွေးချိုရွာမှာ မင်္ဂလာဆောင်ရှိတော့ အဲဒီအတွက်သွားဝယ်တဲ့ ဆန်တွေ၊ ဆီတွေ၊ ဆားတွေ အကုန်လုံးပါသွားတယ်။ စက်သုံးဆီပေပါတွေလည်း ပါသွားတယ်” ဟု ဒေသခံတစ်ဦးက ဆက်လက်ပြောသည်။

အထက်ပါကဲ့သို့ ဖမ်းဆီးခေါ်ဆောင်ခြင်းခံခဲ့ရသည့် ဒေသခံ(၅)ဦးသည် ယနေ့(ဇူလိုင်လ ၁၆ ရက်)အထိ မိသားစုဝင်များနှင့်အဆက်အသွယ်ပြတ်တောက်နေသည့်အတွက် စိုးရိမ်ပူပန်နေကြကြောင်း ဒေသခံများက ပြောကြားထားသည်။

ဒေသခံ PDF အဖွဲ့ခေါင်းဆောင် အောင်လှိုင်ဝင်း ဦးဆောင်သောအဖွဲ့နှင့် ဗိုလ်ဟိန်း(ခ)အောင်မောင်း ဦးဆောင်သောအဖွဲ့ (၂)ဖွဲ့ပူးပေါင်းကာ ဒေသခံ(၅)ဦးနှင့် ကားတစ်စီးကို ဖမ်းဆီးခေါ်သွားခြင်းဖြစ်ကြောင်း ၎င်းတို့က ဆက်လက်ပြောကြားသည်။

“အဖမ်းခံရတဲ့ အမျိုးသမီးတစ်ယောက်ဆိုရင် သူက မုဆိုးမ။ သူ့မှာ သားသမီး(၈)ယောက်ရှိတယ်။ သူ့မှာ ကလေးငယ်တွေနဲ့ပေါ့။ ကျန်တဲ့ ယောကျာ်လေးတွေကလည်း တစ်နေ့လုပ်တစ်နေ့စားတွေပေါ့။ အခုထိလည်း အဆက်အသွယ်က မရဖြစ်နေတော့ သူတို့ရဲ့ မိသားစုဝင်တွေက စိတ်ပူနေကြတာပေါ့" ဟု ဂွေးချိုရွာခံတစ်ဦးက ပြောသည်။

ထို့ပြင် ယင်းကဲ့သို့ ဖမ်းဆီးခံခဲ့ရသူများအနက် ဒေါ်အေးကြင်မော်သည် အသက်(၅၀)အရွယ်ခန့် ရှိပြီဖြစ်ကာ ကျန်းမာရေးချို့တဲ့သူတစ်ဦးဖြစ်ကြောင်း ၎င်း၏ မိသားစုဝင်များက ပြောသည်။

“ဒေါ်အေးကြင်မော်မှာက (၃)နှစ်လောက်ပဲရှိသေးတဲ့ ကလေးငယ်လေးရှိတယ်။ အဲဒီကလေးက ညဆိုရင် မေမေ၊ မေမေနဲ့ ခေါ်ပြီး ငိုငိုနေလို့ မွေးချင်းတွေလည်း စိတ်ဆင်းရဲနေကြတယ်။ ကလေးတွေက စားဝတ်နေရေးနဲ့ဘာနဲ့ဆိုတော့ ကျောင်းလည်း မတက်ရ။ ဖြစ်နိုင်ရင်တော့ အမြန်ဆုံး ပြန်လွှတ်ပေးဖို့ မေတ္တာရပ်ခံပါတယ်” ဟု ဒေါ်အေးကြင်မော်၏ မိသားစုဝင်တစ်ဦးက NP News ကို ပြောသည်။

ထိုကဲ့သို့ PDF အဖွဲ့၏ ဖမ်းဆီးခေါ်ဆောင်ခြင်းကို ခံခဲ့ရသည့် ဂွေးချိုရွာဒေသခံ (၅)ဦးနှင့်ပတ်သက်၍ သက်ဆိုင်ရာလုံခြုံရေးအဖွဲ့၏ လှုပ်ရှားမှုများလည်း တစ်စုံတစ်ရာမတွေ့ရှိရသေးကြောင်း ဒေသခံများက ပြောကြားသည်။