Pika (NSS) - ဇူလိုင် ၉

ဩစတေးလျနိုင်ငံသားတစ်ဦးဖြစ်သည့် Phil Gore အမည်ရှိ အမျိုးသားသည် လေးရက်အတွင်း (၄၂၅)မိုင်အထိပြေးခဲ့ပြီးနောက် 2023 Dead Cow Gully Backyard Masters Ultramarathon တွင် ကမ္ဘာ့ဂင်းနစ်စံချိန်သစ်တင်နိုင်ခဲ့ကြောင်းသိရသည်။ 

စီစဉ်သူများသည် Dead Cow Gully Backyard Masters Ultramarathon ကို အဆုံးမရှိသော အပြေးပြိုင်ပွဲတစ်ခုအဖြစ်သတ်မှတ်ထားပြီး အပြေးသမားများသည် တစ်နာရီလျှင်(၆ ဒသမ ၇)ကီလိုမီတာ အကွာအဝေးထိပြေးရန်လိုအပ်ပြီး အပြေးသမားတစ်ဦးကျန်ရှိတော့သည့်အချိန်အထိ ပြိုင်ပွဲကို ဆက် လက်လုပ်ဆောင်ရမည်ဖြစ်ကြောင်းသိရသည်။

(၂၀၂၃)ခုနှစ် အပြေးပြိုင်ပွဲကို ဩစတေးလျနိုင်ငံ Brisbane မြို့၏ အနောက်မြောက်ဘက် (၁၁၂)မိုင်အကွာတွင်ရှိသော Nanango မြို့ငယ်လေး၏ လယ်ကွင်းထဲတွင် ကျင်းပခဲ့ခြင်းဖြစ်ကြောင်းသိရသည်။အဆိုပါအပြေးပြိုင်ပွဲကို ဇွန်လ(၁၇)ရက်က စတင်ခဲ့ခြင်းဖြစ်ပြီး လေးရက်ခွဲကြာပြီးနောက် ဩစတေးလျနိုင်ငံသား Phil Gore တစ်ဦးတည်းသာကျန်ရှိတော့သည့်အချိန်တွင် ပြိုင်ပွဲအဆုံးသတ်ခဲ့ခြင်းဖြစ်ကြောင်းသိရသည်။ Phil Goreသည် (၆ ဒသမ ၇)ကီလိုမီတာကို အနည်းဆုံး(၁၀၂)ကြိမ်ထိပြေးနိုင်ခဲ့ပြီးနောက် အနိုင်ရရှိသူအဖြစ် သတ်မှတ်ခံခဲ့ရကြောင်းသိရသည်။

Phil Goreက"ဒါက တကယ်ကိုဆန်းကြယ်တဲ့ ကိစ္စတစ်ခုပါပဲ။ ဘယ်လ်ဂျီယံနိုင်ငံသားတွေက အကွာအဝေးအများဆုံးပြေးတဲ့ စံချိန်တင်ထားတာကို သိခဲ့ရပါတယ်။ အဲဒီစံချိန်ကို ချိုးဖျက်နိုင်မယ်လို့ ဘယ်တုန်းကမှမတွေးထားမိပါဘူး။ ကျွန်တော့်အတွက်ကတော့ ပြေးတာက ဘဝရဲ့အစိတ်အပိုင်းတစ်ခုပါပဲ။ အိမ်ကနေ အလုပ်ကို ပြေးတာတောင်ပါ ပါတယ်"ဟုပြောဆိုခဲ့သည်။

ပြီးခဲ့သည့်နှစ် အောက်တိုဘာလတွင် ဘယ်လ်ဂျီယံနိုင်ငံသား Merijn Geerts နှင့် Ivo Steyaert တို့သည် (၆ ဒသမ ၇)ကီလိုမီတာကို (၁၀၁)ကြိမ်ပြေးခဲ့ပြီးနောက် ကမ္ဘာ့ဂင်းနစ်စံချိန်တင်ထားခဲ့ခြင်းဖြစ်ပြီး Phil Goreသည် အနည်းဆုံး(၁၀၂)ကြိမ်ပြေးခဲ့ပြီး အဆိုပါစံချိန်ကို ချိုးဖျက်ခဲ့ခြင်းဖြစ်ကြောင်းသိရသည်။