ယွန်း (NSS) - ဇူလိုင် ၇

သင်္ကြန်ပွဲတော် အပါအဝင် ဒြပ်မဲ့ယဥ်ကျေးမှုအမွေအနှစ်များကို အခြားနိုင်ငံများ၏ ပုံတူကူးယူခံရမှုမှ ကာကွယ်ရေးကို စဥ်ဆက်မပြတ် ဆောင်ရွက်ရန် လိုအပ်ကြောင်း ပြည်ထောင်စုဝန်ကြီးက ပြောကြားခဲ့သည်။

ကာကွယ်ရေးဝန်ကြီးဌာန၊ ပြည်ထောင်စုဝန်ကြီး ဗိုလ်ချုပ်ကြီးမြထွန်းဦးက ဇူလိုင်လ(၆)ရက်တွင် နေပြည်တော်ရှိ သာသနာရေးနှင့် အမျိုးသားစာကြည့်တိုက် ဝန်ဇင်းမင်းရာဇာခန်းမတွင် ကျင်းပခဲ့သော မြန်မာနိုင်ငံ အမျိုးသားယဥ်ကျေးမှုဗဟိုကော်မတီအစည်းအဝေး၌ အထက်ပါကဲ့သို့ ပြောကြားခဲ့ခြင်းဖြစ်သည်။

နိုင်ငံတွင်းရှိ ဒြပ်ရှိယဥ်ကျေးမှုအမွေအနှစ်များကို ကာကွယ်ထိန်းသိမ်းသည့်နည်းတူ ဒြပ်မဲ့ယဥ်ကျေးမှုအမွေအနှစ်များကိုလည်း ပို၍မှတ်တမ်းတင်နိုင်ရေးကို ဆောင်ရွက်ရန် ဗိုလ်ချုပ်ကြီးမြထွန်းဦးက တိုက်တွန်းပြောဆိုထားသည်။

ထို့ပြင် နိုင်ငံ၏ဒြပ်မဲ့ယဥ်ကျေးမှုအမွေအနှစ်များကို အခြားနိုင်ငံများက ပုံတူကူးယူခံရမှုမှ ကာကွယ်ရေးကိုလည်း စဥ်ဆက်မပြတ် ဆောင်ရွက်သွားရန် ၎င်းကဆက်လက်ပြောဆိုထားသည်။

သာသနာရေးနှင့် ယဥ်ကျေးမှုဝန်ကြီးဌာနက စာရင်းကောက်ယူမှတ်တမ်းတင်ထားသည့် ဒြပ်မဲ့ယဥ်ကျေးမှုအမွေအနှစ်ပေါင်း (၂၂၈၉)ခုရှိပြီး ၎င်းတို့အား မြန်မာနိုင်ငံ အမျိုးသားဒြပ်မဲ့ယဥ်ကျေးမှု အမွေအနှစ် မှတ်ပုံတင်စာရင်းအဖြစ် ၂ဝ၂ဝ ပြည့်နှစ်၊ မတ်လ(၂၆)ရက်တွင် အမိန့် ကြေညာစာအမှတ် ၂/၂ဝ၂ဝ ဖြင့် သတ်မှတ်ခဲ့ပြီးဖြစ်ကြောင်း သိရသည်။

အဆိုပါ ထောင်ပေါင်းများစွာသော ဒြပ်မဲ့ယဥ်ကျေးမှုအမွေအနှစ်များအနက် မြန်မာနိုင်ငံ၏ ပထမဆုံးဒြပ်မဲ့ယဥ်ကျေးမှုအဖြစ် မြန်မာ့သနပ်ခါး ယဥ်ကျေးမှုဓလေ့ကို UNESCO သို့ ပြီးခဲ့သည့် ၂ဝ၂ဝ ပြည့်နှစ်ကတင်ပြခဲ့ကြောင်း သိရသည်။

သို့သော် ပြန်လည်ပြည့်စုံအောင် ရေးသွင်းရမည့် အချက်အလက်အချို့လိုအပ်နေကြောင်း အကြောင်းကြားလာသည့်အတွက် ပြန်လည်ရေးသားလျက်ရှိကြောင်း ပြည်ထောင်စုဝန်ကြီးက ပြောကြားခဲ့သည်။

ထို့ပြင် မြန်မာ့ရိုးရာမဟာသင်္ကြန်ပွဲတော်ကိုလည်း ကမ္ဘာ့ဒြပ်မဲ့ယဥ်ကျေးမှု အမွေအနှစ်စာရင်းသို့ တင်သွင်းနိုင်ရေးအတွက် အဆိုပြုစာတွဲကို ၂ဝ၂၃ ခုနှစ်၊ မတ်လ(၂၄)ရက်တွင် UNESCO သို့ ပေးပို့ခဲ့ပြီးဖြစ်ကြောင်း သိရသည်။

ယဥ်ကျေးမှုအမွေအနှစ်များကို ထိန်းသိမ်းစောင့်ရှောက်ရာတွင် လိုအပ်သည့် ဥပဒေ၊ နည်း ဥပဒေများကို ခေတ်နှင့်ညီအောင် ပြင်ဆင်ဖြည့်စွက်ကာရေးဆွဲထုတ်ပြန်ပြီးဖြစ်ကြောင်း သိရသည်။

အလားတူ ဒြပ်ရှိယဥ်ကျေးမှုအမွေအနှစ်များဖြစ်သော အစောဆုံး မြို့ပြယဥ်ကျေးမှု ထွန်းကားခဲ့သည့် ပျူမြို့ဟောင်းသုံးမြို့ဖြစ်သည့် ဟန်လင်း၊ သရေခေတ္တရာ၊ ဗိဿနိုးနှင့် ပုဂံယဥ်‌ကျေးမှု အမွေအနှစ်ဒေသတို့ကို ကမ္ဘာ့စာရင်းဝင်အဖြစ်သတ်မှတ်ခဲ့ပြီးဖြစ်ကြောင်း သိရသည်။

ထို့ကြောင့် မြောက်ဦးယဥ်ကျေးမှု အမွေအနှစ်ဒေသကိုလည်း ကမ္ဘာ့အမွေအနှစ်စာရင်းဝင်ဖြစ်စေရေးအတွက် Nomination Dossier (Complete) ကို ကမ္ဘာ့အမွေအနှစ်ကော်မတီသို့ ၂ဝ၂၁ ခုနှစ်၊ ဒီဇင်ဘာလ(၃ဝ)ရက်တွင် ပေးပို့ခဲ့ပြီးဖြစ်ကြောင်း သိရသည်။