သန့်ဇင် (NSS) - ဇူလိုင် ၃

ရန်ကုန်တိုင်း၊ လှိုင်သာယာ(အနောက်ပိုင်း)မြို့နယ်၊ အနော်ရထာစက်မှုဇုန်၊ ဂန္ဓမာလမ်းရှိ ငါးရှဉ့်သိုလှောင်ရုံ၌ မီးလောင်မှုဖြစ်ပွားခဲ့ကြောင်း သွေးဒါနမျိုုးဆက်လူမှုကူညီရေးအသင်းထံမှ သိရသည်။

ဖြစ်စဥ်မှာ ယနေ့ (ဇူလိုင်လ ၃ ရက်)၊ နံနက် ၂ နာရီကျော်တွင် အထက်ပါကဲ့သို့ဖြစ်ပွားခဲ့ကြောင်း သိရသည်။

“မနက် ၂ နာရီလောက်က သတင်းရတယ်။ ငါးရှဉ့်တွေဘာတွေသိုလှောင်တဲ့ ဂိုထောင် အအေးခန်းတွေလဲ ပါတယ်။ အဲဒီကနေစပြီး လောင်တယ်လို့တော့ သိရတယ်” ဟု သွေးဒါနမျိုးဆက် လူမှုကူညီရေးအသင်းမှ တာဝန်ရှိသူတစ်ဦးက NP News ကိုပြောသည်။

အဆိုပါမီးလောင်မှုအား မရမ်းကုန်းမီးသတ်၊ လှိုင်သာယာမီးသတ်နှင့် သွေးဒါနမျိုးဆက်လူမှုကူညီရေးအသင်းမှ မိနစ်(၃ဝ)ခန့် ပူးပေါင်းငြှိမ်းသတ်ခဲ့ရကြောင်း သိရသည်။

“ဆုံးရှုံးမှုအနေနဲ့ကတော့ တော်တော်များများတော့ပျက်စီးသွားတယ်။ အလုပ်သမားအိပ်ခန်းတွေရော၊ သိုလှောင်ခန်းတွေရောပေါ့။ အခြားလူထိခိုက်မှုတော့မရှိဘူး” ဟု ၎င်းကဆက်လက်ပြောသည်။

မီးလောင်မှုဖြစ်စဥ်ကြောင့် ထိခိုက်ဒဏ်ရာရရှိခဲ့သူ မရှိသော်လည်း ပျက်စီးဆုံးရှုံးမှု များပြားကြောင်း အထက်ပါအသင်းမှ သိရသည်။