NP News - ဇွန် ၆

အဆိုတော် လီလီနိုင်ကျော်အား လုပ်ကြံသတ်ဖြတ်သည့် Special Task Force – STF အမည်ခံ အကြမ်း ဖက်အဖွဲ့ဝင်များအား ဖမ်းဆီးရမိကြောင်း နစကမှထုတ်ပြန်ထားသည်။

နစကမှ ယနေ့ (ဇွန်လ ၆ရက်)တွင် အထက်ပါကဲ့သို့ ထုတ်ပြန်ထားခြင်းဖြစ်သည်။ပြီးခဲ့သည့် မေလ ၃ဝ ရက်၊ ညနေပိုင်းတွင် သရုပ်ဆောင်အဆိုတော် လီလီနိုင်ကျော်အား ၎င်းနေထိုင်သည့် ရန်ကုန်တိုင်း၊ ရန်ကင်းမြို့နယ်၊ အမှတ်(၂)ရပ်ကွက်တွင် အကြမ်းဖက်သမားတစ်ဦးမှ ပစ်ခတ်ထွက်ပြေးသွားခဲ့သဖြင့် သေဆုံးခဲ့သည့်ဖြစ်စဉ်ဖြစ်ပွားခဲ့သည်။

ထို့ကြောင့် လုံခြုံရေးတပ်ဖွဲ့ဝင်များမှ တရားခံအားဖမ်းဆီးရမိရေးအတွက်  ဖြစ်စဉ်ဖြစ်ပွားရာနေရာဝန်း ကျင်တွင် စောင့်ကြည့်စစ်ဆေးမှုများ ပြုလုပ်ခဲ့ကြောင်းသိရသည်။ 

ထိုသို့ ပြုလုပ်ခဲ့ရာ ပြီးခဲ့သည့် ဇွန်လ (၄)ရက်၊ နံနက်ပိုင်းတွင် ကမာရွတ်မြို့နယ်အတွင်းရှိ အမျိုးသားအဆောင်တစ်ခု၌ အဆိုတော်လီလီနိုင်ကျော်အား လုပ်ကြံသတ်ဖြတ်ခဲ့သည့် ကောင်းဇာနည်ဟိန်း (ခ) လပြည့် နှင့် ကျော်သူရ (ခ) အီးတီတို့ (၂)ဦးအား ဖမ်းဆီးရမိခဲ့ကြောင်း နစကမှ ဆိုသည်။ 

ထွက်ဆိုချက်အရ ၎င်းတို့(၂)ဦးသည် ပြီးခဲ့သည့် ၂ဝ၂၁ ခုနှစ်၊ ဇွန်လတွင် KNLA တပ်မဟာ(၁)လှုပ်ရှားနယ်မြေ၌ အကြမ်းဖက်ဖောက်ခွဲရေး‌သင်တန်း (၁)လနှင့် ၂၀၂၂ ခုနှစ် ဇွန်လတွင် ကော့ကရိတ်မြို့နယ်၊ ဘော်ဒိုင်းကျေးရွာအနီး၌ Special Task Force – STF အမည်ခံအကြမ်းဖက်အဖွဲ့မှဖွင့်လှစ်သည့် အကြမ်းဖက်ဖောက်ခွဲရေး‌သင်တန်းတို့ကို တတ်ရောက်ခဲ့ကြောင်းသိရသည်။ 

အလားတူ ၎င်းတို့ထွက်ဆိုချက်များအရ  ဖမ်းဆီးရန်ကျန် ဒီငြိမ်းလင်းနှင့် ဟေဇယ်တို့ ဦးဆောင်၍ ၂ဝ၂၂ ခုနှစ် ဇန်နဝါရီလတွင် STF အမည်ခံအကြမ်းဖက်အဖွဲ့အား ရန်ကုန်မြို့၌ အကြမ်းဖက်လုပ်ငန်းများ ဆောင်ရွက်ရန်အတွက်ဖွင့်လှစ်ခဲ့ပြီး ဇူလိုင်လတွင် တပ်မတော်စစ်ကြောင်းမှ ဝင်ရောက်တိုက်ခိုက်သိမ်းပိုက်မှုကြောင့် ကော့ကရိတ်မြို့နယ်ဘက်သို့ထွက်ပြေးတိမ်းရှောင်ခဲ့ကြောင်း သိရသည်။ 

ထို့နောက် ၂ဝ၂၃ ခုနှစ်၊ ဇန်နဝါရီလ၊ ပထမပတ်တွင် ဖမ်းဆီးရန်ကျန် ဒီငြိမ်းလင်းမှ အဖွဲ့ဝင် (၂၆)ဦးအား အဖွဲ့များခွဲကာ ရန်ကုန်တိုင်းအတွင်းစေလွှတ်ခဲ့ပြီး ကောင်းဇာနည်ဟိန်း နှင့် ကျော်သူရတို့ (၂)ဦးသည်  ရန်ကုန်မြို့သို့ပြန်လာကာ ကမာရွတ်မြို့နယ်အတွင်းရှိ အမျိုးသားအဆောင်(၁)ခုတွင် တစ်လလျှင်တစ်သိန်းကျပ်ဖြင့် အခန်းငှားနေထိုင်ခဲ့ကြောင်း ထွက်ဆိုချက်အရ သိရသည်။

ထို့ပြင် ကောင်းဇာနည်ဟိန်းသည် ဘုရင့်နောင်ကုန်စည်ပွဲရုံဝင်းအတွင်းရှိ ကားဝပ်ရှော့တစ်ခု၌ လည်း ကောင်း၊ ကျော်သူရသည် မင်္ဂလာဒုံမြို့နယ်၊ သင်္ကန်းကျွန်းကြီးရပ်ကွက်ရှိ လေထိုးကျွတ်ဖာဆိုင်တစ်ခု၌လည်းကောင်းလုပ်ကိုင်၍ ဒီငြိမ်းလင်းမှခိုင်းစေမည့် အကြမ်းဖက်လုပ်ငန်းများ ဆောင်ရွက်ရန်စောင့် ဆိုင်းခဲ့ကြောင်း ဖော်ထုတ်သိရှိရသည်ဟု နစကမှ ဆိုသည်။

ထို့နောက်  ဖမ်းဆီးရန်ကျန်ရှိနေသည့် ဒီငြိမ်းလင်း၊ ဟေဇယ်၊ ယသော် နှင့် ‌နွေးနွေးတို့ (၄)ဦးသည် ရန်ကုန်မြို့အတွင်း ရောက်ရှိနေသော အဖွဲ့ဝင်များအား Telegram မှတဆင့် အကြမ်းဖက်လုပ်ငန်းများ ဆောင်ရွက်ရန် ခိုင်းစေခဲ့ကြောင်း သိရသည်။

ထို့ပြင် ကောင်းဇာနည်ဟိန်း၏ ထွက်ဆိုချက်အရ ဒီငြိမ်းလင်းနှင့် ‌ဟေဇယ်မှ ပြီးခဲ့သည့် မေလ (၂၅)ရက်တွင် ဒေါ်လီလီနိုင်ကျော်၏ ဓာတ်ပုံအချက်အလက်များအား Telegram မှတဆင့်ပေးပို့၍ လုပ်ကြံသတ် ဖြတ်ရန် စေခိုင်းခဲ့ပြီး မေလ (၂၈)ရက်တွင် Sig Sauer ပစ္စတို (၁)လက်၊ ၎င်းကျည်အိမ် (၂)ခု၊ ၎င်းကျည် (၂ဝ)တောင့်တို့အား ဟေဇယ်မှပေးပို့ခဲ့ကြောင်း သိရသည်။ 

၎င်းတို့၏ ထွက်ဆိုချက်အများအရ ကောင်းဇာနည်ဟိန်း နှင့် ကျော်သူရတို့ (၂)ဦးသည်  ဒေါ်လီလီနိုင်ကျော်အား လုပ်ကြံသတ်ဖြတ်ရန်အတွက် ၎င်းနေထိုင်သည့် တိုက်ခန်းအနီးသို့ နေ့စဉ်သွားရောက်၍ အခြေအနေစောင့်ကြည့်ခဲ့ပြီး မေလ(၃ဝ)ရက်၊ ညနေပိုင်းတွင် ကောင်းဇာနည်ဟိန်းသည် ဒေါ်လီလီနိုင်ကျော်အား ၎င်း၏ အိမ်ရှေ့၌  လုပ်ကြံသတ်ဖြတ်ခဲ့ခြင်းဖြစ်ကြောင်း သိရသည်။ 

ထို့နောက် လုပ်ကြံသတ်ဖြတ်ရာတွင် အသုံးပြုသည့် လက်နက်ခဲယမ်းများအား  မေလ (၃၁)ရက်တွင်  ဖမ်းဆီးရန်ကျန် ယသော်၏ စီစဉ်ပေးမှုဖြင့် STF အဖွဲ့ဝင် တစ်ဦးထံပြန်လည်ပေးအပ်ခဲ့ပြီး လုပ်ကြံသတ် ဖြတ်ရန်အတွက် ဒီငြိမ်းလင်းနှင့် ဟေဇယ်တို့မှ ငွေကျပ် (၃)သိန်းအား Wave Pay မှတဆင့် ထောက်ပံ့ခဲ့ကြောင်း သိရသည်။ 

လက်ရှိတွင် ဖမ်းဆီးရမိသူ(၂)ဦးအား ဥပဒေအရထိရောက်စွာ အရေးယူနိုင်ရေးနှင့်  ဖမ်းဆီးရန်ကျန်သူများအား  ဖမ်းဆီးရမိရေးအတွက် ဆက်လက်ဆောင်ရွက်သွားမည်ဖြစ်ကြောင်း နစကမှ ထုတ်ပြန်ထားသည်။