ယွန်း (NP News) - ဇွန် ၆

ပလတ်စတစ်ညစ်ညမ်းမှု လျှော့ချရန်အတွက် 3R စနစ်ကို ရေရှည်အစီအမံများ ချမှတ်ဆောင်ရွက်ရန် နစကဥက္ကဋ္ဌက တိုက်တွန်းပြောဆိုထားသည်။

နစကဥက္ကဋ္ဌ၊ ဗိုလ်ချုပ်မှူးကြီး မင်းအောင်လှိုင်က ပြီးခဲ့သည့် မေလ(၅)ရက်တွင် နေပြည်တော်ရှိ မြန်မာအပြည်ပြည်ဆိုင်ရာ ကွန်ဗင်းရှင်း ဗဟိုဌာန-၂ တွင် ကျင်းပခဲ့သော ကမ္ဘာ့ပတ်ဝန်းကျင်ထိန်းသိမ်းရေးနေ့ အထိမ်းအမှတ်အခမ်းအနားတွင် အထက်ပါကဲ့သို့ ပြောဆိုခဲ့ခြင်းဖြစ်သည်။

ပလတ်စတစ်ညစ်ညမ်းမှုကို လျှော့ချရန်အတွက် 3R စနစ်ဖြစ်သည့် သုံးစွဲမှုလျှော့ချခြင်း (Reduce)၊ တစ်ခါသုံးပလတ်စတစ်သုံးစွဲမှုကို ရှောင်ကြဥ်ပြီး ပြန်လည်သုံးစွဲခြင်း (Reuse)နှင့် စွန့်ပစ်ပစ္စည်းများကို ကုန်ကြမ်းအ‌ဖြစ် ပြန်လည်ပြုပြင်ထုတ်လုပ်ခြင်း (Recycle)တို့ကို ရေရှည်အစီအမံများဖြင့် ချမှတ်ဆောင်ရွက်ရန် နစကဥက္ကဋ္ဌက တိုက်တွန်းပြောဆိုထားသည်။

မြန်မာနိုင်ငံအနေဖြင့် မြေပေါ်သယံဇာတဖြစ်သည့် သစ်နှင့်ဝါးကုန်ကြမ်းများ ပေါကြွယ်ဝသည့် နိုင်ငံဖြစ်ခြင်းကြောင့် တစ်ခါသုံးပလတ်စတစ်အစားထိုးသုံးပစ္စည်းများကို စနစ်တကျ ထုတ်လုပ်နိုင်သည့် အခြေခံများရှိပြီးဖြစ်သည်။ 

ထို့ကြောင့် ပလတ်စတစ်အစားထိုး စက္ကူမျိုးစုံ ထုတ်လုပ်ခြင်းကို သစ်တောများပြန်လည်ထိန်းသိမ်းခြင်းအနေဖြင့် ဆောင်ရွက်သွားမည်ဖြစ်ကြောင်း ၎င်းက ဆက်လက်ပြောဆိုခဲ့သည်။

အလားတူ ပြည်တွင်းမှ ပလတ်စတစ်စွန့်ပစ်ပစ္စည်းများ အပါအဝင် ပတ်ဝန်းကျင်ကို ညစ်ညမ်းစေသည့် စွန့်ပစ်ပစ္စည်းများကို တတ်နိုင်သမျှလျှော့ချရန် နစကဥက္ကဋ္ဌက တိုက်တွန်းထားသည်။

ထို့ပြင် စွန့်ပစ်ပစ္စည်းများကို ပြန်လည်သုံးစွဲရန်နှင့် ပြန်လည်ပြုပြင်ထုတ်လုပ်သည့် ပြည်တွင်းရှိ အသေးစား၊ အငယ်စားနှင့် အလတ်စားလုပ်ငန်းများ ဖွံ့ဖြိုးတိုးတက်ရေးကိုလည်း အားပေးဆောင်ရွက်မည်ဖြစ်ကြောင်း သိရသည်။

လက်ရှိတွင် သမုဒ္ဒရာများအတွင်း ပလက်စတစ်တန်ချိန် (၇၅)သန်းနှင့် (၁၉၉)သန်းအထိ တွေ့နိုင်ကြောင်း လေ့လာချက်များအရ သိရသည်။

ရေနေဂေဟစနစ်အတွင်း ပလတ်စတစ်အမှိုက်ဝင်ရောက်မှု ပမာဏသည် တစ်နှစ်လျှင် တန်ချိန် (၁၉)သန်းမှ (၂၃)သန်းအထိရှိနေပြီး ပလတ်စတစ်ထုတ်လုပ်မှု၊ သုံးစွဲမှုနှင့် စွန့်ပစ်မှုပုံစံများ မပြောင်းလဲပါက (၂ဝ၄ဝ)ပြည့်နှစ်တွင် သုံးဆနီးပါးတိုးလာနိုင်ကြောင်း ကုလသမဂ္ဂပတ်ဝန်းကျင်အစီအစဥ်၏ ဖော်ပြချက်များအရ သိရသည်။