Pika (NSS) - အောက်တိုဘာ ၁၉

လာမယ့် နိုဝင်ဘာလမှာ ဘရာဇီးနိုင်ငံမှာ ကျင်းပမယ့် G20 ထိပ်သီးအစည်းအဝေးကို တက်ရောက်မှာမဟုတ်ဘူးလို့ ရုရှားသမ္မတပူတင်က ယနေ့ (အောက်တိုဘာလ ၁၉ ရက်)မှာ ထုတ်ဖော်ပြောဆိုခဲ့ပါတယ်။ 

နိုင်ငံတကာရာဇဝတ်တရားရုံး(ICC)ရဲ့ ဖမ်းဝရမ်းကြောင့် ဘရာဇီးနိုင်ငံမှာ ကျင်းပမယ့် G20 ထိပ်သီးအစည်းအဝေးကို မတက်ရောက်တာမျိုးလည်းမဟုတ်ဘူးလို့ ပူတင်က ပြောကြားခဲ့ပါတယ်။ ဒါ့ပြင် ICC ရဲ့ ဖမ်းဝရမ်းလိုမျိုး စီရင်ချက်တွေကို လွယ်လွယ်ကူကူပဲ ရှောင်ရှားဖို့ဆောင်ရွက်နိုင်တယ်လို့လည်း ပူတင်က ပြောကြားခဲ့ပါတယ်။ ရုရှားနိုင်ငံ မော်စကိုမြို့မှာကျင်းပမယ့် BRICS ထိပ်သီးအစည်းအဝေးမတိုင်မီ ပူတင်က ယခုလိုအတည်ပြုပြောကြားခဲ့တာလည်း ဖြစ်ပါတယ်။

ပူတင်က "ဒီလို G20 ထိပ်သီးအစည်းအဝေးကို ကျွန်တော်က ဘာကြောင့်တက်ရမှာလဲ။ကျွန်တော်တက်ရောက်ခဲ့မယ်ဆိုရင်တောင် ပြောဆိုမယ့် အကြောင်းအရာတွေက ဒီအ ကြောင်းအရာတွေပဲဖြစ်နေမှာပါ။ ဘရာဇီးနိုင်ငံမှာ ကျွန်တော်တို့နိုင်ငံရဲ့ အကျိုးစီးပွားကို ကိုယ်စားပြုပေးနိုင်မယ့် တစ်စုံတစ်ဦးကို ရုရှားမှာကျွန်တော်တို့ရှာလို့ရပါတယ်"လို့ ပြောဆိုခဲ့ပါတယ်။ ၂၀၂၂ ခုနှစ် ဖေဖော်ဝါရီလမှာ ရုရှားက ယူကရိန်းကို ကျူးကျော်တိုက်ခိုက်ပြီးနောက် နိုင်ငံတကာရာဇဝတ်တရားရုံး ICC ဟာ ၂၀၂၃ ခုနှစ် မတ်လမှာ ပူတင်ကို ဖမ်းဝရမ်းထုတ်ခဲ့တာလည်း ဖြစ်ပါတယ်။ 

ဒါပေမဲ့လည်း ရုရှားအစိုးရဟာ စစ်ရာဇဝတ်မှုကျူးလွန်တာမျိုးမရှိကြောင်းနဲ့ (ICC)ရဲ့ ဖမ်းဝရမ်းဟာ တရားမဝင်ဘူးလို့ ရုရှားအစိုးရဘက်က အကြိမ်ကြိမ်ပြောဆိုခဲ့ပါတယ်။ ဒါ့ပြင် ဘရာဇီးနိုင်ငံကို သွားရောက်ခဲ့မယ်ဆိုရင် ဖမ်းဆီးခံရမယ်ဆိုတဲ့ ပြောဆိုချက်တွေကို ပူတင်က ငြင်းဆန်ပယ်ချခဲ့တယ်လို့လည်း သိရပါတယ်။ ပူတင်က "ရုရှားနဲ့ဘရာဇီးက နွေးထွးပြီးကောင်းမွန်တဲ့ ဆက်ဆံရေးတွေရှိပါတယ်။ ဒါကြောင့်မလို့ ဒီလိုခက်ခဲတဲ့အခြေအနေမျိုးကို ဘယ်သူကမှ လုပ်ဆောင်မှာမဟုတ်ပါဘူး"လို့ ပြောဆိုခဲ့ပါတယ်။