သုတကျော်၊ ချယ်ရီ (NSS) - စက်တင်ဘာ ၁၂

အွန်လိုင်း လိမ်လည်သူများသည် ဆင်းရဲသူများ နှင့် လူလတ်တန်းစားများကို ပစ်မှတ်ထားနေပြီး လိမ်နည်း လေးမျိုးထက် မနည်းကို အဖန်တလဲလဲ အသုံး ပြုနေကြောင်း ကျားဖျန့်တိုက်ဖျက်ရေး နှင့် အသိပညာပေးလုပ်ငန်းများကို ဆောင်ရွက်နေသော ဦးဝေယံတင်မောင်ဝင်းက NSS သို့ သုံးသပ်ပြောကြားထားချက်အရ သိရသည်။ 

အွန်လိုင်းမှ လိမ်လည်မှုများသည် ယခုနောက်ပိုင်းကာလများတွင် ပိုမိုများ ပြားလာကာ ကျပ်ငွေထောင်ဂဏန်းမှစတင်ကာ ကျပ်သိန်းရာဂဏန်းအထိ လိမ်လည်မှုများရှိနေခြင်းဖြစ်ကြောင်း NSS က စုံစမ်းမေးမြန်းထားချက်များအရ သိရသည်။ ယခုကဲ့သို့ အွန်လိုင်းမှ လိမ်လည်နည်းမျိုး မတိုင်မီ ယခင်ကပင် ဆက်သွယ်ရေးစနစ်သုံး လိမ်လည်မှုအချို့ရှိခဲ့ခြင်းဖြစ်သည်။ “လွန်ခဲ့တဲ့ (၁ဝ)နှစ်ပတ်ချာလည်လောက်က (၁ဝ)နှစ်နဲ့အထက် နှစ်(၂ဝ) အတွင်းမှာကျတော့ နိုင်ငံခြားကနေ စာတွေ၊ ဘာတွေလာတယ်။ အဲဒါက ဘာလဲဆိုတော့ ဥပမာအားဖြင့် နှစ်မျိုးပေါ့နော်။ သူက လူတစ်ယောက်ကသေဆုံးခါနီးဖြစ်တယ်။ ပြီးတော့ သူ့မှာအမွေတွေရစရာအများကြီးပဲ ရထားတဲ့ဟာတွေ။ အဲဒီလိုဟာမျိုးမှာ သူကအမွေပေးခဲ့ချင်တယ်ပေါ့။ အဲဒီလိုပုံစံမျိုးနဲ့လာတယ်။ ငွေပေးခဲ့ဖို့ စာရွက်စာတမ်းတွေ အတုတွေလုပ်ပြီးတော့ လွှဲပေးတယ်ပေါ့နော်။ ရှေ့နေတွေ၊ ဘာတွေပုံစံနဲ့လုပ်တယ်။ ပြီးတော့ ငွေပို့ဖို့အတွက်ကို ငွေလွှဲခပေါ့နော်၊ ငွေလွှဲခဆိုပြီးတော့ တောင်းပြီးတော့ သူတို့ရဲ့လိမ်ညာတဲ့ပုံစံတစ်မျိုးပါ”ဟု ဦးဝေယံတင်မောင်ဝင်း က ဆိုသည်။ 

ထို့နောက် အင်တာနက်ခေတ်တွင် ကံစမ်းမဲပေါက်သည်၊ ပရိုမိုးရှင်း ပေး သည်ဆိုသော အီးမေလ်များ ပေးပို့လိမ်လည်မှုများရှိခဲ့ကာ ထို့နောက်တွင်မူ ကျားဖျန့်တို့သည် လိမ်နည်းကို အဆင့်ဆင့်မွမ်းမံတိုးမြှင့်လာခဲ့ခြင်း ဖြစ် သည်။ 

“အစောဆုံးကတော့သူတို့က ကံစမ်းမဲပေါက်တာတို့၊ ပရိုမိုးရှင်းလုပ်တာတို့။ ပြီးရင် ငွေချေးတဲ့ဟာတို့၊ ဘောလုံးပွဲရယ်၊ လောင်းကစားရယ်ဆိုပြီးပေါ်လာတယ်။ ပြီးရင် ဂိမ်းကစားတဲ့ကိစ္စလာတယ်။ ပြီးရင် အလိမ်အများဆုံးက Online Shop ကို ခရစ်ပတိုတို့၊ Forex တို့ပေါ့။ လုပ်ငန်းတစ်ခုနဲ့တွဲတွဲပြီးတော့ လာတယ်။ ပြီးတော့ နောက်ဆုံးတစ်ခုက Payment တစ်ခုကို အခြေခံတာပေါ့။ ရှိပြီးသား Bussiness ကို အခြေခံပြီးအတုလုပ်ပြီးတော့မှ လိမ်တယ်။ ပြီးတော့ ရှယ်ယာခေါ်တယ်။ အမြတ်အများပေးတယ်။ လူတွေက လောဘသားကောင်သွားဖြစ်လို့။ အမြတ်ဆိုတာက တကယ့်စီးပွားရေးလုပ်နေတာ တစ်ရာမှာ ၅ ကျပ်မြတ်ဖို့တောင် အနိုင်နိုင်လေ”ဟု ၎င်းက ရှင်းပြသည်။ 

လတ်တလော ပေါပေါများများ တွေ့နေရသည့် လိမ်နည်းတမျိုးမှာ ဖုန်းအော် ပရေတာတစ်ခုခုမှ ကံစမ်းမဲပေါက်သည်ဟု လိမ်နည်းမျိုးဖြစ်ပြီး အခြားတစ်မျိုးမှာ KBZ Pay သို့မဟုတ် Wave Pay အပလီကေးရှင်းမှာ မလုံခြုံသော ကြောင့် အဆင့်မြှင့်ရမည်ဟုဆိုကာ ဖုန်းအတွင်းဝင်လာသော OTP ကုတ်ကို တောင်းခြင်းမျိုး ဖြစ်သည်။ ထို့ပြင် အင်တာနက်လူမှုကွန်ယက်များ ခေတ်စားလာပြီးနောက် ချေးငွေလုပ်ငန်းများ အမည်ခံကာ လိမ်နည်းတမျိုးပေါ် လာပြီး အဆိုပါ လိမ်နည်းမှာ မသိနားမလည်သူများအတွက် အလိမ်ခံရရန် ပိုမိုအခွင့်အလမ်းများခဲ့သည်။

“စာရွက်၊ စာတမ်းတွေ၊ CV တွေ၊ ဓာတ်ပုံတွေ၊ မှတ်ပုံတင်တွေ၊ အိမ်ထောင်စုဇယားတွေနဲ့တောင်းပြီးတော့ သူတို့ကဘာလဲဆိုတော့ Deposit အနေနဲ့ ပိုက်ဆံလွှဲခိုင်းတယ်။ ပြီးရင် ပထမလရဲ့အတိုး နောက်ပြီးဘယ်လောက်ချေးမှာလဲ (၁ဝ)သိန်းဟုတ်ပြီ ပထမလအတိုးက (၁)ကျပ်ဆိုတော့ (၁)သောင်းကျပ်ပေါ့၊ အဲဒီ (၁)သောင်း အရင်လွှဲပေးရမယ် ပထမလကိုပေါ့၊ ဒီလူက ယုံရလား၊ မယုံရလား စမ်းသပ်တာ ဘာညာပေါ့။ ငွေလွှဲပေးတာနဲ့ တစ်ဖက်မှာ ငွေထုတ်တယ်၊ ထုတ်ပြီးတာနဲ့ ကိုယ်နဲ့ပတ်သက်တဲ့ ဖုန်းတွေအားလုံးကို block ပြီးတော့ ပြေးသွားတယ်”ဟု ဦးဝေယံ တင်မောင်ဝင်းက ဆိုသည်။ 

ထို့နောက်တွင်မှ လောင်းကစားဂိမ်းဖြင့် လိမ်သည့်နည်း အွန်လိုင်းတွင် ပေါ်ပေါက်လာပြီး အဆိုပါလိမ်နည်းဖြင့် အလိမ်ခံရသူ ပမာဏမှာလည်း မနည်းလှပေ။ “ဘောလုံးပွဲနဲ့ဂိမ်းတို့ ဝင်လာတဲ့အခါမှာလည်း  သူတို့ပြောတဲ့အတိုင်းကို လောင်းရတယ်။ အနိုင်ပေးထားတယ်။ ပထမဦးဆုံးတစ်ကြိမ်၊ နှစ်ကြိမ်ပေါ့နော်။ ဦးဆုံးစဝင်တဲ့သူရဲ့ယုံကြည်မှုရပြီဆိုမှ ထပ်ခေါ်လာမှာ။  သူငယ်ချင်းမိတ်ဆွေတွေကို ဟ ဒါရတယ်လုပ်ကြည့်ပါ၊ ငါတောင် ဘယ်နှစ်သိန်းရသွားပြီဆိုတဲ့အခါမှာမှ သိန်းဆယ်ဂဏန်း၊ ရာဂဏန်းလုပ်မယ့်သူတွေ လူလတ်တန်းစားကို မက်လုံးထားတယ်။ အရမ်းချမ်းသာတဲ့သူတွေက သိတယ်လေ အဲဒီဟာကိုမလုပ်ကြဘူးပေါ့နော်။ အဲဒါကြောင့် ဆင်းရဲသားအုပ်စုနဲ့ လူလတ်တန်းစားတွေကိုပဲ ပစ်မှတ်ထားတယ်။ သူတို့တွေရဲ့ ထမင်းအိုးတွေကို ခွဲတာပေါ့နော်”ဟု ဦးဝေယံတင်မောင်ဝင်းက ရှင်းပြသည်။ 

ထို့ပြင် အခြားသောထင်ရှားသည့် လိမ်နည်းတစ်မျိုးမှာ Online Shop ပရိုမိုးရှင် ပေးသည်ဆိုသော လိမ်နည်တစ်မျိုး ဖြစ်သည်။ “Online Shop ပုံစံနဲ့ လာတဲ့အခါမှာ တုံးပြီးကြောက်ရွံ့လွန်းတဲ့သူကိုလည်း ပစ်မှတ်မထားဘူး။ အွန်လိုင်းကို နားလည်တဲ့သူတွေ၊ ဝင်ငွေကြပ်တည်းနေတဲ့လူတွေပေါ့နော်။ ပြောရမယ်ဆို မုန်တိုင်းကျတဲ့အချိန်မှာ ငါးရှာ၊ ဖားရှာပေါ့ကွယ် အဲဒီလိုမျိုးပစ်မှတ်ထားတာ”ဟု ၎င်းက ဆိုသည်။ 

Online Shop ပုံစံ လိမ်လည်ရာတွင် Promotion ပေးသည်ဟု ဆိုကာ Online Shop ရောင်းသူထံ  ပစ္စည်းများကို စျေးပေါပေါဖြင့် လက္ကားဖြန့်ပေးပြီး တစ်ကြိမ်၊ နှစ်ကြိမ်ခန့်ကို မလိမ်ပဲလွှတ်ပြီးနောက် ယုံကြည်သည်ဟုဆိုသောအခါမှ ဝယ်သူက ထပ်ပေးသော ငွေပမာဏများစွာကို လိမ်လည်သွားခြင်း ဖြစ်ကြောင်း ၎င်းက ရှင်းပြသည်။   

ထို့ပြင် ငွေကြေးစျေးကစားခြင်းပြုလုပ်နိုင်မည်ဟုဆိုကာ လိမ်လည်ခြင်းလည်းရှိနေပြီး အဆိုပါ လိမ်နည်းအတွက် သင်တန်းဆရာအတုဖြင့် သင် တန်းပေးခြင်းကိုပါ ပြုလုပ်ပေးပြီး ၎င်းတို့က စိတ်ကြိုက်ချယ်လှယ်နိုင်မည့် ငွေကြေး စျေးကစားနိုင်သော ဝက်ဘ်ဆိုက်အတု၌ သားကောင်ကို ငွေထည့်ပြီး စျေးကစားစေကာ တစ်ကြိမ်၊ နှစ်ကြိမ် အနိုင်ရပြီးနောက် လောဘဖြင့် ငွေထပ်သွင်း၍ ကိုယ်တိုင်ကြိုးစားပါက အနိုင်မပေးတော့ပဲ လိမ်ခြင်း ဖြစ် ကြောင်းလည်း ၎င်းက ရှင်းပြသည်။