Pika (NSS) - ဩဂုတ် ၂၄

ရွှေ(၄၀ဝ)ဂရမ်ဖြင့် ပြုလုပ်ထားပြီး နီလာ(၁၅၂)လုံးဖြင့် အလှဆင်ထားသော Louis XIII Fleur de Parme  မီးခြစ်သည် ကမ္ဘာ့ဈေးအကြီးဆုံးဆေးပြင်းလိပ် မီးခြစ်အဖြစ် အသိအမှတ်ပြုခံခဲ့ရသည်။ 

ပြင်သစ်ဇိမ်ခံအမှတ်တံဆိပ် S.T. Dupont  ကုမ္ပဏီသည် ပြင်သစ်သမိုင်းကို စိတ်ဝင်စားသော ဟောင်ကောင် ဘီလျံနာ စတီဗင်ဟွန်း၏တောင်းဆိုချက်အရ  Louis XIII Fleur de Parme ဆေးပြင်းလိပ်မီးခြစ်ကို စတင်ဖန်တီးခဲ့ခြင်းဖြစ်ကြောင်းသိရသည်။ စတီဗင်ဟွန်းက အသေးစိတ်အချက်အလက်က အစ တိကျသည်ကိုလိုချင်သောကြောင့် အဆိုပါမီးခြစ်ကို ဖန်တီးရန်အတွက် ပြင်သစ်ယဉ်ကျေးမှုနှင့်သမိုင်းကို ရင်းနှီးကျွမ်းဝင်သော အထူးဒီဇိုင်နာတစ်ဦးက လုပ်ဆောင်ခဲ့ရကြောင်းလည်း သိရသည်။ 

ပြင်သစ်နာမည်ကြီး ဒီဇိုင်နာတစ်ဦးဖြစ်သူ Tania de Bourbon Parme သည် ကမ္ဘာ့ဈေးအကြီးဆုံးမီးခြစ်ကို ဖန်တီးရန်အတွက် လက်မှုပညာသည် (၈၀)ဦးပါဝင်သောအဖွဲ့နှင့်အတူ (၆)လကြာ အလုပ်လုပ်ခဲ့ရကြောင်းလည်းသိရသည်။ ပြင်သစ်ဘုရင် Louis XIII ခေတ်၏ စတိုင်ဖြင့် ဖန်တီးထားသော LOUIS XIII Fleur de Parme မီးခြစ်ကို အလှဆင်ထားသောခုံပေါ်တွင် တပ်ဆင်ထားသော တော်ဝင်ရွှေသရဖူအဖြစ် ဖန်တီးထားကြောင်းလည်း သိရသည်။ အဆိုပါ မီးခြစ်ကို ရွှေ (၄၀ဝ) ဂရမ်ဖြင့် ပြုလုပ်ထားပြီး စုစုပေါင်း (၄၁)ကရက်ရှိသော နီလာ(၁၅၂)လုံးဖြင့် အလှဆင်ထား သည်။ 

(၂၀၁၃) ခုနှစ်တွင် စတင်ထုတ်ဖော်ပြသခဲ့သော LOUIS XIII Fleur de Parme  မီးခြစ်ကို ကမ္ဘာ့ဈေးအကြီးဆုံး ဆေးပြင်းလိပ်မီးခြစ်အဖြစ် ဂင်းနစ် စံချိန်မှတ်တမ်းအဖွဲ့က အသိအမှတ်ပြုခဲ့ပြီး ဝယ်ယူသူများက အမေရိကန်ဒေါ်လာ(၅)သိန်းထိ ဈေးပေးခဲ့ကြသည်။ ဆယ်စုနှစ်တစ်ခုကျော်ကြာပြီဖြစ်သော်လည်း LOUIS XIII Fleur de Parme မီးခြစ်သည် ကမ္ဘာ့ဈေးအကြီးဆုံးမီးခြစ်အဖြစ် ယနေ့အချိန်အထိ ရှိနေဆဲဖြစ်ကြောင်း သိရသည်။