စော (NSS) - ဩဂုတ် ၁၆

ကျောက်ကပ်လှူဒါန်းသူနှင့် အစားထိုးကုသမှု ခံယူသူကြား သွေးသားတော်စပ်မှုမရှိပါက တရားရုံး ကျမ်းကျိန်လွှာ ပူးတွဲတင်ပြရမည်ဖြစ်ကြောင်း ကျန်းမာရေးဝန်ကြီးဌာန၏ အချက်အလက်များအရ သိရသည်။

ကိုယ်အင်္ဂါအစိတ်အပိုင်းလှူဒါန်းခြင်းဆိုင်ရာ ဥပဒေပုဒ်မ ၃၀၊ ပုဒ်မခွဲ (ခ)အရ ကျောက်ကပ်လှူဒါန်းခြင်းနှင့် ကျောက်ကပ်အစားထိုးကုသခြင်းနှင့် စပ်လျဉ်း၍ ဝန်ကြီးဌာနက အထက်ပါညွှန်ကြားချက်ကို ထုတ်ပြန်ထားခြင်းဖြစ်သည်။

အဆိုပါညွှန်ကြားချက်တွင် ပြည်သူဆေးရုံများအနေဖြင့် ကျောက်ကပ်လှူဒါန်းသူနှင့် ကျောက်ကပ် အစားထိုးကုသမှုခံယူသူတို့သည် သွေးသားရင်းအုပ်စု  သို့မဟုတ် သွေးချင်းစပ်အုပ်စု သို့မဟုတ် သွေးမစပ် အုပ်စုဖြစ်ပါက သက်ဆိုင်ရာဆေးရုံကျင့်ဝတ်ဆိုင်ရာ လုပ်ငန်းအဖွဲ့၏ သဘောထားမှတ်ချက်ရယူပြီး ကော်မတီ၏ အတည်ပြုဆုံးဖြတ်ချက်ဖြင့် ဆောင်ရွက်ရမည်ဖြစ်ကြောင်း ဖော်ပြထားသည်။

ထို့ပြင် ကျောက်ကပ်လှူဒါန်းသူနှင့် ကျောက်ကပ်အစားထိုးကုသမှုခံယူသူတို့သည် သွေးမစပ် အုပ်စုဖြစ်ပါက သက်ဆိုင်ရာမြို့နယ်တရားသူကြီး ရှေ့မှောက်တွင် ကျမ်းကျိန်ထားသော လှူဒါန်းသူ၏ ကျမ်းကျိန်လွှာနှင့် အစားထိုးခွဲစိတ်ကုသမှုခံယူသူ၏ ကျမ်းကျိန်လွှာများ ပူးတွဲပါရှိရမည်ဖြစ်ကြောင်းလည်း  ကျန်းမာရေးဝန်ကြီးဌာနက ဆိုသည်။

"အရင်က ကျောက်ကပ်လှူတဲ့လူနဲ့ အလှူခံ တဲ့လူရဲ့  သဘောတူပါတယ်ဆိုတဲ့ consent လေးပဲ ကျန်းမာရေးဝန်ကြီးဌာနအောက်က ခွင့်ပြုထားတဲ့ ဆေးရုံတွေမှာ လုပ်ကြတယ်။ ပြီးတော့  သက်ဆိုင်ရာ ကော်မတီအဆင့်ဆင့်ကို တင်ပြတယ်။ အဲဒီလိုအဆင့်ဆင့်လုပ်ရာကနေ  ကျွန်တော်ထင်တာတော့ အငြင်းပွားမှုတွေ ရှိလာပုံရတယ်။ သွေးမတော်သား မစပ်လူတွေက လှူတဲ့အလှူတွေမှာ သဘောတူတယ်။ မတူဘူး။ ငွေရေးကြေးရေးကိစ္စတွေ ပါလာပုံရတယ်လို့ ကျွန်တော်မြင်တယ်။ အဲဒါကြောင့်မို့  သူက ကျမ်းကျိန် ရမယ်ဆိုပြီး ပါလာတာဖြစ်မယ်။ ကျွန်တော်မြင်တာက တော့ တရားပိုဝင်သွားတဲ့ဟာဖြစ်သွားတာပေါ့။ procedureတော့ နည်းနည်းရှုပ်သွားပေမယ့် နောက် ပိုင်းဒီဟာက တရားရုံးကို ကျမ်းကျိန်ထားတာ ဖြစ်တဲ့ အတွက် official ဖြစ်မှု၊legal ဖြစ်မှုက ပိုသာသွား တာပေါ့"ဟု ကာကွယ်ရေးနှင့် အပူပိုင်းဆေးပညာမှ အထူးကုသမားတော် ဒေါက်တာပြည့်ထူးက NSS ဂျာနယ်ကိုပြောသည်။

အလားတူ ကျောက်ကပ်အစားထိုး ကုသခြင်းပြု ရန် ကျန်းမာရေးဝန်ကြီး ဌာနကခွင့်ပြုထားသည့်ပုဂ္ဂလိကဆေးရုံများအနေဖြင့်လည်း  ကျောက်ကပ်လှူ ဒါန်းသူနှင့် ကျောက်ကပ်အစားထိုး ကုသမှုခံယူသူတို့ သည် သွေးသားရင်းအုပ်စု သို့မဟုတ် သွေးချင်းစပ် အုပ်စု သို့မဟုတ် သွေးမစပ်အုပ်စုဖြစ်ပါက သက် ဆိုင်ရာ ပုဂ္ဂလိကဆေးရုံကျင့်ဝတ်ဆိုင်ရာလုပ်ငန်းအဖွဲ့၏သဘောထားမှတ်ချက်ဖြင့် ကိုယ်အင်္ဂါအစိတ်အပိုင်း အရည်အသွေးစစ်ဆေးရေးအဖွဲ့မှတစ်ဆင့် ကော်မတီသို့တင်ပြ၍ ကော်မတီ၏အတည်ပြု ဆုံးဖြတ်ချက်ဖြင့်ဆောင်ရွက်ရမည်ဖြစ်ကြောင်း သိရသည်။

ထိုသို့ အစားထိုးခံယူရာတွင်  သွေးမစပ်အုပ်စုဖြစ်ပါက သက်ဆိုင်ရာမြို့နယ်တရားသူကြီးရှေ့ မှောက်တွင် ကျမ်းကျိန်ထားသော လှူဒါန်းသူ၏ ကျမ်းကျိန်လွှာနှင့် အစားထိုးခွဲစိတ်ကုသမှုခံယူသူ၏ ကျမ်းကျိန်လွှာများ ပူးတွဲပါရှိရမည်ဖြစ်ကြောင်း ကျန်းမာရေးဝန်ကြီးဌာနက ထုတ်ပြန်ထား သည်။